კორტების სპეცოპერაციის საქმეზე გასამართლებული ცააძისა და ფირცხალავას ოჯახის წევრები დღეს საგანგებო ბრიფინგს გამართავენ

კორტების სპეცოპერაციის საქმეზე გასამართლებული გიორგი ცააძისა და ირაკლი ფირცხალავას ოჯახის წევრები დღეს საგანგებო ბრიფინგს გამართავენ. ბრიფინგი "პირველი რადიოს" პრესკლუბში 12.00 საათზე ჩატარდება.

როგორც კორტების სპეცოპერაციის საქმეზე მსჯავრდებულების ოჯახის წევრებმა "ინტერპრესნიუსს" აცნობეს, საქმე ეხება ამ საქმეზე ახლად აღმოჩენილ გარემოებებს. მათი განცხადებით, მოსამართლე ბადრი კოჭლამაზაშვილის მიმართ გაჩნდა ეჭვი, რომელზეც დღევანდელ ბრიფინგზე ისაუბრებენ. ოჯახის წევრების ინფორმაციით, მოსამართლის გადაწყვეტილება სრულად მათ გუშინ გადაეცათ.

"ჩვენ გვაქვს გონივრული ეჭვი, რომ კორტების განაჩენის მიღების სანაცვლოდ სოლიდური თანხა ქრთამის სახით აიღო. თუ რატომ გაჩნდა ეს ინფორმაცია, ჩვენ ამის სავარაუდო მამხილებელი დოკუმენტაცია მოვიპოვეთ", - განაცხადა ერთ-ერთი გასამართლებულის, გიორგი ცააძის დამ, ირინა ცააძემ.

კიდევ ერთი გასამართლებულის, ირაკლი ფირცხალავას მეუღლის შეფასებით, კორტების საქმის მოსამართლემ პოლიტიკური გადაწყვეტილება მიიღო. "კორტების სპეცოპერაციის საქმის მოსამართლე ბადრი კოჭლამაზაშვილმა ყაჩაღი და "ნარკობარიგა" იური ვაზაგაშვილის ანდერძი, რომელიც გარდაცვალებამდე ივანიშვილს ხელში გადასცა, ერთი ერთში მხოლოდ რამდენიმე ადამიანის მიმართ შეასრულა. ეს არის პოლიტიკური განაჩენი, რომელიც ჩვენ სრულად გუშინ გადმოგვეცა და ეს განაჩენი უპრეცედენტოა სასამართლოს ისტორიაში", - აცხადებს ბრალდებულ ირაკლი ფირცხალავას მეუღლე ნინო ხვიტია.

"ინტერპრესნიუსი"

გამოგვყევით, თუ დაინტრესებული ხართ მხოლოდ საზოგადოებრივი თემებით და არ გსურთ, მიიღოთ სხვა, თქვენთვის უინტერესო ინფორმაცია.

გამოიწერეთ საზოგადოების სიახლეები და იხილეთ ის თქვენს Newsfeed-ში!

AMBEBI.GE/საზოგადოება