4
ივნისიდღის ზოგადი ასტროლოგიური პროგნოზი
ხულოს მუნიციპალიტეტის სოფელ კორტოხში მცხოვრები ნადიმ პაქსაძის წინააღმდეგ, არასრულწლოვანთან სქესობრივი კავშირის გამო, სისხლის სამართლის საქმის აღძვრამ მისი ნათესავების პროტესტი გამოიწვია. პაქსაძის სიდედრი ნანი სოლომონიძე AMBEBI.GE-სთან საუბრისას აცხადებს, რომ ის თანახმა იყო, მისი 13 წლის გოგონა ცოლად გაჰყოლოდა 19 წლის ნადიმს იმიტომ, რომ ბიჭი კარგი ოჯახის შვილი იყო. გთავაზობთ ნანი სოლომონიძის კომენტარს, რომელიც მაღალმთიან ხულოში ადრეული ქორწინების ტრადიციასაც ეხება:
"რა თქმა უნდა, თანახმა ვიყავი, რომ ჩემი 13 წლის მაია ნადიმს გაჰყოლოდა. კარგი ოჯახის შვილი იყო და რატომ უნდა მეთქვა უარი. მშვენიერი ოჯახი შექმნეს, ორი შვილიც გაუჩნდათ. არ მინდა ჩემს სიძეს შეექმნას პრობლემები. მისი მშობლები ავად არიან, 80 წლის ბებოც მოსავლელია, ორი შვილი გასაზრდელი ჰყავს და არ მინდა, პირობითი მისცენ ან ჯარიმა დააკისრონ, არ აქვს საშუალება და ვერ გადაიხდის. მე რომ გავთხოვდი 16 წლის ვიყავი, ჩვენთან სოფელში ხშირია ამ ასაკში გათხოვება. ახლა გავიგე, რომ შემოვიდა რაღაც კანონი, რომელიც ადრეულ ქორწინებას კრძალავს.
ჩემს შვილს პირველი ბავშვი 14 წლის ასაკში შეეძინა, იუსტიციის სახლში მაშინ რეგისტრაციაზე არ ყოფილა პრობლემა. ახლა კი მეორე შვილი რომ შეეძინა და 12 ნოემბერს ნადიმი რეგისტრაციისთვის მივიდა, მაშინ აღუძრეს საქმე, ჩემი სიძე დაიბარეს დაკითხვაზე, მერე დაგვიბარეს მე და ჩემი მეუღლე და ნადიმის მშობლებიც. ჯერ ხულოში დაგვკითხეს, შემდეგ საქმე გადასცეს ბათუმს. დღეს რომ მივედი პროკურატურაში, გამომძიებელმა მითხრა, ადვოკატი აიყვანეთ და საკითხში ის გაგარკვევთო. არ გვაქვს ჩვენ ადვოკატის ფული, სოციალურად დაუცველები ვართ და გაჭირვებით ვახერხებთ თავის რჩენას.
ეს კანონი ახალია და ჩვენ არ უნდა შეგვეხოს. ამის მერე არასრულწლოვანს ვინც მოიყვას ცოლად, მხოლოდ იმათზე უნდა გავრცელდეს. ჩემი შვილი კარგ ოჯახი გათხოვდა და ნუ დაუნგრევენ ოჯახს, ნუ დაუპატიმრებენ ქმარს და ნუ გააუბედურებენ ხალხს", - აცხადებს ნანი სოლომონიძე.
მაია სოლომონიძე ახლა 16 წლის არის. ის მეცხრე კლასში იყო, როცა გათხოვდა, სკოლის დამთავრება კი ფეხმძიმობის გამო ვეღარ შეძლო. მისი მეუღლე ნადიმ პაქსაძე სისხლისსამართლებრივი პასუხისმგებლობისგან გათავისუფლებას ითხოვს:
"19 წლის ვიყავი როცა 13 წლის გოგო მოვიყვანე ცოლად. 2013 წელს ჩემი მეუღე 14 წლის იყო, როცა პირველი შვილი შეგვეძინა, ბათუმის იუსტიციის სახლში გავატარეთ რეგისტრაციაზე და არანაირი პრობლემა არ ყოფილა. გასულ თვეში, 12 ნოემბერს მეორე შვილი შეგვეძინა და იუსტიციის სახლს რეგისტრაციისთვის რომ მივმართე, სისხლის სამართლის საქმე აღმიძრეს. სამსახური არ მაქვს, მაგრამ მშობლების და ოჯახის მარჩენალი მე ვარ. თურქეთში გადავდივარ და ვმუშაობ. ჯარიმასაც ვერ გადავიხდი და ვითხოვ, არ მომცენ არც პირობითი, რადგან ვეღარ გადავალ თურქეთში და ოჯახის რჩენაც გამიჭირდება", - აღნიშნა ნადიმ პაქსაძემ.
პაქსაძის თქმით, 4 თვის წინ ოჯახს გეგმიური შემოწმების შემდეგ სოციალურად დაუცველის სტატუსიც მოუხსნეს მიუხედავად იმისა, სოციალურად დაუცველთა რეიტინგის მიხედვით დაბალი, 45 ათასი ქულა ჰქონდა.
შინაგან საქმეთა სამინისტროს ინფორმაციით, ნადიმ პაქსაძის მიმართ სისხლის სამართლის საქმე 140-ე მუხლით მიმდინარეობს, რაც გულისხმობს სქესობრივ კავშირს ან სექსუალური ხასიათის სხვაგვარ მოქმედებას თექვსმეტი წლის ასაკს მიუღწეველთან.
ნინო ხოზრევანიძე
AMBEBI.GE
გამოიწერეთ საზოგადოების სიახლეები და იხილეთ ის თქვენს Newsfeed-ში!
AMBEBI.GE/საზოგადოება
