"ასაფეთქებელი თვალთან აუფეთქდა " - ნათია მიქიაშვილი "მარშრუტკის" მძღოლის უმძიმეს მდგომარეობაზე საუბრობს

#192-ე სამარშრუტო ხაზის მიკროავტობუსში საახალწლო პიროტექნიკის აფეთქების შედეგად დაშავებული მძღოლის მდგომარეობა კვლავ მძიმეა. როგორც AMBEBI.GE-ს კომპანია "თბილისის მიკროავტობუსის" პრესსამსახურის უფროსმა ნათია მიქიაშვილმა განუცხადა, დაშავებული მძღოლი სამუელ საჯაია საავადმყოფოდან უკვე გამოწერეს, თუმცა მდგომარეობა კვლავ მძიმეა.

- სამუელ საჯაია გუშინ დღის მეორე ნახევარში გამოწერეს საავადმყოფოდან, მაგრამ მდგომარეობა საკმაოდ მძიმეა. ჯერჯერობით თვალი შეხვეული აქვს და უცნობია, როგორ დასრულდება ეს მდგომარეობა, ანუ დაკარგავს თუ არა მძღოლი მხედველობას. რა თქმა უნდა, კომპანია ყველანაირად ეხმარებას მას, იქნება ეს ფინანსური თუ სხვა სახის დახმარება, მაგრამ ჯერჯერობით ველოდებით შედეგებს, შეძლებს თუ არა ის მუშაობის გაგრძელებას თავის ძველ პოზიციაზე.

- თუ მხედველობა დაკარგა, ალბათ ვეღარ შეძლებს ხომ მუშაობას?

- ბუნებრივია ის ვერ გააგრძელებს მუშაობას, მგზავრების უსაფრთხოებიდან გამომდინარე. სამწუხაროდ, მძიმე მდგომარეობაა, ფაქტობრივად, თვალში აუფეთქდა ასაფეთქებელი, რომელიც სახეში შეაყარეს.

- თუ ასე მოხდა, მძღოლი უმუშევარი დარჩება, კომპანია თუ დაეხმარება?

- კომპანია შეეცდება რაიმე სხვა პოზიციაზე მაინც შესთავაზოს სამსახურის გაგრძელება იმიტომ, რომ დღეს ძალიან მძიმე სოციალური ვითარებაა და შესაბამისად, ადამიანი უბრალოდ ცოდოა ამის გამო უმუშევარი დარჩეს.

- ოჯახი თუ ჰყავს, მეუღლე ან შვილები?

- კი, ჰყავს ცოლიც და შვილებიც.

შემთხვევა გუშინ, 6 დეკემბერს მოხდა. არსებული ინფორმაციით, სამარშრუტო ტაქსი ერთ-ერთმა პირმა გააჩერა და ასაფეთქებელი მოწყობილობა ავტომობილში შეაგდო.

შინაგან საქმეთა სამინისტროს განცხადებით, პირი, რომელმაც აღნიშნული ქმედება ჩაიდინა, ცხელ კვალზე დააკავეს. გამოძიება 187-ე მუხლით მიმდინარეობს, რაც ნივთის დაზიანებას ან განადგურებას გულისხმობს, რამაც მნიშვნელოვანი ზიანი გამოიწვია. გავრცელებული ინფორმაციით, დაკავებული სრულწლოვანია.

თეა ბეჟიტაშვილი

AMBEBI.GE