როგორ "გავყიდოთ" საკუთარი თავი საქართველოში სწორად და ვპოზიციონირდეთ ბაზარზე

საქართველოში დასაქმება ბევრი ადამიანისთვის გადაუჭრელი პრობლემაა. როგორც დასაქმების სააგენტოებში აცხადებენ, ერთ ვაკანტურ ადგილზე ხშირად ასეულობით კანდიდატი აგზავნის საკუთარ რეზიუმეს, და  შესაბამისად, კონკურენცია ძალიან მაღალია. ბიზნეს-კონსულტანტი დავით კენჭაძე AMBEBI.GE-ს სწორედ ამ თემაზე ესაუბრა. ინტერვიუდან გაიგებთ, თუ როგორ გახდეთ დამსაქმებლისთვის ყველაზე სასურველი კანდიდატი და რა გჭირდებათ წარმატებისთვის ყველაზე მეტად.

- როგორ მოვახდინოთ საკუთარი თავის სწორად პოზიციონირება, "გაყიდვა"?

- ჩვენ ხშირად "ვყიდით" საკუთარ თავს. ამ შემთხვევაში მიზანი არის შემდეგი: ძალიან კარგად მოვემზადოთ და მივიდეთ გასაუბრებაზე ისე, რომ ვიცოდეთ, რა უნდა მეორე მხარეს. მეორე მხარე, ამ შემთხვევაში დამსაქმებელი არის ჩვენი პოტენციური კლიენტი, შესაბამისად, კარგად უნდა დავფიქრდეთ და გავიგოთ, თუ როგორი პროდუქტი ანუ როგორი ადამიანი სჭირდება მას ამ კონკრეტულ პოზიციაზე სამუშაოდ. ერთი, რაც მათ აუცილებლად მოსწონთ, არის ადამიანური თვისებები: პასუხისმგებლობა, მიზანდასახულობა, ენთუზიაზმი და ასე შემდეგ. მეორე - მნიშვნელოვანია ვიცოდეთ, რა შედეგების მიღება უნდა სავარაუდო დამსაქმებელს იმ პოზიციის ადამიანისგან, ვის აყვანასაც აპირებს. უნდა მოვიფიქროთ, რა პასუხები გავცეთ შეკითხვებზე მას იმისათვის, რომ დავუტოვოთ სწორედ ის შთაბეჭდილება, როგორიც გვინდა რომ ჰქონდეს ჩვენზე.

-პრეზენტაბელურობის უნარის გამომუშავება შესაძლებელია?

-რა თქმა უნდა. იმიტომ რომ, ეს არის ის უნარი, რომელიც დაკავშირებულია ადამიანის თვისებებთან, ხოლო ადამიანის თვისებების გამომუშავება რომ შესაძლებელია, ეს ცხადია, რადგან ის დაკავშირებულია ჩვენს თავთან. იმისათვის, რომ ჩვენ თვითონ შევიცვალოთ, არ არის აუცილებელი რაიმე რადიკალური ძვრები მოხდეს ჩვენ გარშემო, ქვეყანაში, სტრუქტურებში, ბიზნესში და ა შ. აუცილებელია, უბრალოდ ჩვენ მივიღოთ გადაწყვეტილება, რომ გვინდა გავხდეთ სხვანაირები. როდესაც ვიღებთ გადაწყვეტილებას, რომ ჩვენ გვინდა გავხდეთ უფრო მეტად პრეზენტაბელურები, ვუსვამთ შეკითხვას ჩვენს თავს, - რა უნდა გავაკეთოთ ამისათვის. ამაზე პასუხის საპოვნელად უნდა მოვიშველიოთ სხვადასხვა საშუალებები. ვთქვათ, ინტერნეტი, რომელიც დღეს ინფორმაციის ძალიან დიდი წყაროა. ვკითხოთ გამოცდილ ადამიანებს, ვნახოთ რჩევები, შეცდომები, რომლებიც არ უნდა დავუშვათ, ეს ყველაფერი ჩამოვწეროთ სამოქმედო გეგმაში და რაც ყველაზე მთავარია - ვიმოქმედოთ!

-რა თვისებებია საჭირო, რომ იყო წარმატებული დღევანდელ თანამედროვე სამყაროში, სადაც კონკურენციის დონე ძალიან მაღალია?

-როდესაც კონკურენცია ძალიან მაღალია, მნიშვნელოვანია გავითვალისწინოთ ერთი პრინციპი, რომელსაც "პაროტოს" პრინციპი ეწოდება. ადამიანების 80% იღებს მთლიანი შემოსავლების 20%-ს, ხოლო ადამიანების 20% იღებს მთლიანი შემოსავლების 80%-ს. ეს რას ნიშნავს? ადამიანები არიან საშუალო დონის და წარმატებულები. ეს წარმატებულები მთლიანი მასის 20%-ს შეადგენენ. მნიშვნელოვანია, განვსაზღვროთ თუ რას აკეთებენ ეს ადამიანები ერთმანეთისგან განსხვავებულს? მათ აქვთ რამდენიმე განსაკუთრებული თვისება, რომელიც ახასიათებთ მხოლოდ წარმატებულ ადამიანებს. პირველ რიგში, ეს არის მიზანდასახულობა. ადამიანი უნდა იყოს მიზანდასახული და ზუსტად უნდა იცოდეს,  რა სურს. სამწუხაროდ, დღევანდელ რეალობაში ეს პრობლემაა. იმიტომ რომ, ძალიან ბევრმა ქართველმა არ იცის, თუ რა უნდა. ან თუ იცის, ეს მიზნები ძალიან ზოგადად აქვს ჩამოყალიბებული. მეორე თვისება თავდაჯერებულობაა, რომელიც ახასიათებთ წარმატებულ ადამიანებს. მათ ყოველთვის ზუსტად იციან, რომ გამოუვათ ის, რაც სურთ. როდესაც რაღაც არ გამოგდის, სხვას კი არ უნდა დააბრალო, არამედ მხოლოდ საკუთარ თავს. ნახო, რას აკეთებ არასწორედ, შეცვალო მიდგომები და გახდე უფრო ძლიერი, უფრო თვითდაჯერებული.

ასევე საჭირო და აუცილებელი თვისებებია ბრძოლის ჟინი, ენთუზიაზმი და განათლება/გამოცდილების მიქსი. ბოლო ორის თანხვედრა მნიშვნელოვანია, თუ გინდა, რომ მიაღწიო წარმატებას. არასოდეს არ უნდა მოვრჩეთ სწავლას მაშინ, როდესაც ჩვენ ვამთავრებთ ბაკალავრიატს ან თუნდაც მაგისტრატურას. სწავლა მუდმივია, ეს არის "მენტალფიტნესი." ყოველთვის უნდა იყო ფორმაში, მოდუნება არ შეიძლება. ჩაინიშნე რას სწავლობ ყოველდღიურად, რათა ეს გამოცდილება გამოიყენო მომავალში. ცნობისთვის, საშუალო ადამიანს შეუძლია წაიკითხოს 50 წიგნი თავის პროფესიაში ყოველწლიურად, ხოლო მომავალი ათი წლის განმავლობაში უკვე 500. ჩაინიშნოს დღეში 4 ახალია იდეა, რაც შემდეგი ათი წლის განმავლობაში 1500 ახალ იდეას უდრის.

ქრისტინე გამთენაძე

AMBEBI.GE

გამოგვყევით, თუ დაინტრესებული ხართ მხოლოდ საზოგადოებრივი თემებით და არ გსურთ, მიიღოთ სხვა, თქვენთვის უინტერესო ინფორმაცია.

გამოიწერეთ საზოგადოების სიახლეები და იხილეთ ის თქვენს Newsfeed-ში!

AMBEBI.GE/საზოგადოება