2
ივნისიდღის ზოგადი ასტროლოგიური პროგნოზი
ვარდების რევოლუციიდან დღეს 12 წელი გავიდა. უსისხლო რევოლუცია არჩევნების გაყალბებას მოჰყვა, ზუსტად 12 წლის წინ, 23 ნოემბერს, პარლამენტში შეიჭრნენ საპროტესტო აქციის მონაწილეები, რომლებმაც პრეზიდენტ ედუარდ შევარდნაძის გადადგომა მოითხოვეს. პრეზიდენტი გადადგა, ხოლო რამდენიმე თვეში გამართულ საპრეზიდენტო არჩევნებში "ერთიანი ნაციონალური მოძრაობის" ლიდერმა მიხეილ სააკაშვილმა გაიმარჯვა. სააკაშვილის ხელისუფლებაში მოსვლას ქვეყნის მოსახლეობა და სხვადასხვა სფეროს წარმომადგენლები დადებითად შეხვდნენ. მათ შორის იყვნენ ქართველი მომღერლები, რომლებმაც ვარდების რევოლუციაზე მუსიკალური ნამუშევარი, სახელწოდებით "ახალი დღე" შექმნეს.
აღსანიშნავია, რომ მომღერლების ნაწილი, რომლებმაც სააკაშვილის ხელისუფლებაში მოსვლას უმღერეს, შემდეგ თავად სააკაშვილის ხელისუფლებამ გამოაცხადა ე.წ. ჩარეცხილებად და დაბლოკეს.
ვარდების რევოლუციის ჰიმნის, პროექტის იდეის ავტორი მსახიობი ია ფარულავა გახლდათ. როგორც თავად ამბობს, უნდოდა რევოლუციაში საკუთარი წვლილი თავადაც შეეტანა და ამიტომაც გაუჩნდა ამ პროექტის შექმნის იდეა, რაშიც სტეფანე, მაია დარსმელიძე, სანო და რეჟისორი გაგა რაზმაძე დაეხმარნენ. ამბობს, რომ პროექტში მონაწილეობაზე უარი არცერთი მომღერლისგან მიუღია.
ია ფარულავა:
- იმდენად ვიყავი აღფრთოვანებული ვარდების რევოლუციით, გადავწყვიტე მეც შემეტანა საკუთარი წვლილი ამ საქმეში, ამიტომაც გამიჩნდა ამ პროექტის შექმნის იდეა. დავუკავშირდი სტეფანეს, რომელმაც დაწერა მუსიკა, ტექსტზე კი მაია დარსმელიძემ იმუშავა. ძალიან კარგი სიმღერა გამოვიდა, რომელიც სანოს სტუდიაში ჩავწერეთ, კლიპი რეჟისორმა გაგა რაზმაძემ გადაიღო. ამ პროექტით ფული არ გაგვიკეთებია, საკმაოდ მიზერულ თანხად გაკეთდა ყველაფერი, ყველა მომღერალმა თანხმობა თქვა პროექტში მონაწილეობაზე. დიდი მოლოდინი გვქონდა ვარდების რევოლუციის შემდეგ, კარგად დაიწყეს, მაგრამ 12 წლის შემდეგ ისევ მძ*ნერში ვზივართ.
მომღერალი აჩიკო მეფარიძე 2003 წელს პოპულარობის მწვერვალზე იყო. ვარდების რევოლუციის ჰიმნში მონაწილეობა თავადაც მიიღო, თუმცა დღეს ამას ნანობს.
- ია ფარულავამ მთხოვა ამ პროექტში მონაწილეობის მიღება. ის ჩემი მეგობარია და დავთანხმდი. გაამართლა თუ არა მოლოდინმა, თავადაც ხედავთ; რა დროს გამართლებაა, ქვეყანა სადამდე არის მიყვანილი... ნებისმიერი ადამიანი ფიქრობს, რომ ახალი უკეთესს ნიშნავს, მაგრამ ვერ ვნახეთ უკეთესობა, უკუსვლა არის. ყველაზე ცუდად ჩემს ოჯახზე აისახა სააკაშვილის მმართველობა. შოუ-ბიზნესში ჩემნაირი დაზარალებული არ არის. დღეს ხომ გამოჩნდა, რასაც სააკაშვილი მამაჩემს აბრალებდა, თვითონ გააკეთა. გაჩეხილია ხეები და კაკლებია გაშენებული. იმისთვის უნდოდათ მამაჩემის მოშორება, რომ წყნეთის და ბაგების ტყეები გაეყიდათ.
- ნანობთ ვარდების რევოლუციის ჰიმნში მონაწილეობას?
- რა თქმა უნდა, ვნანობ. ტრაგიკული განცდა არ მაქვს, ის სიმღერა არაფერს არ ნიშნავს, ერთხელ გავიდა სადღაც, მაგრამ როგორც ფაქტს - ძალიან ვნანობ.
სააკაშვილის ხელისუფლებაში მოსვლას მხარს უჭერდა ირაკლი ჩარკვიანი და მისი ოჯახი.
- რა მოლოდინები გქონდათ ვარდების რევოლუციის შემდეგ და გამართლდა თუ არა ეს მოლოდინი?
ქეთათო ჩარკვიანი:
- ყველას ყოველთვის აქვს ერთი მოლოდინი, გვგონია, რომ ადამიანური რესურსი ქვეყანაში მაქსიმალურად იქნება გამოყენებული და ქვეყანა განვითარდება სწორი მიმართულებით და ყველა იქნება დაცული. ზოგ შემთხვევაში მართლდება ეს, ზოგ შემთხვევაში - არა. ჩემთვის არაფერი არ შეცვლილა. რაღაცები განვითარდა და ცვლილებები მოხდა, რაც იმ ეტაპზე ძალიან მნიშვნელოვანი იყო.
პროექტში მონაწილეობა მიიღო მომღერალმა დათო გომართელმაც, თუმცა დღეს ეს ეტაპი მისი კარიერიდან არ ახსოვს.
- რომელია ეგ კლიპი? არ ვყოფილვარ მე ამ კლიპში, არც მიმღერია ვარდების რევოლუციის ჰიმნი.
- კლიპში ხართ...
- არ მახსოვს.
- გაგიმართლათ მიხეილ სააკაშვილის რეჟიმმა მოლოდინი?
- რა თქმა უნდა, ნაწილობრივ გამართლდა ჩემი მოლოდინი. წლების შემდეგ იყო გადახრები, რაც გვეგონა, ისე არ მოხდა ყველაფერი. ჩემთვის მთავარი იყო ქვეყანაზე როგორ აისახებოდა ვარდების რევოლუცია, მე როგორც ვცხოვრობდი მანამდე, ისევ ისე ვცხოვრობ. მანამდეც ვმღეროდი და დღესაც ვმღერი. ვინ იბლოკებოდა და ვინ არა, არ ვიცი. მე სააკაშვილისთვის ხმა არასოდეს მიმიცია.
თამარ ბოჭორიშვილი
AMBEBI.GE
