კრისტი ყიფშიძე - ესპანელი მკითხავი, როლი ფილმისთვის, რომელიც გენიალურ გიტარისტს, პაკო დე ლუსიოს ეძღვნება

მოდელმა კრისტი ყიფშიძემ ესპანელი მკითხავის როლი განასახიერა. ხშირად ასეც ხდება, როცა მოდელებს მსახიობობაც უწევთ. კრისტისთვის ამ ამპლუაში ყოფნა პირველი არ არის, კინოში სხვა დროსაც უთამაშია. ფილმზე "ვისაუბროთ პაკოზე" უცხოელი კინორეჟისორი, ჟენია გორინი მუშაობს. პრემიერა თებერვალში იგეგმება, სურათს მონაწილეობის მიღება ესპანურ კინოფესტივალშიც მოუწევს. გადაღებებისას მოდელს არაერთ ცნობილ მსახიობთან მოუწია ურთიერთობამ.

პროექტი გენიალურ გიტარისტს, პაკო დე ლუსიოს ეძღვნება, მაგრამ როგორც რეჟისორი ამბობს, ეს კინო იმაზე არ არის გათვლილი, თუ რა საოცრად უკრავდა პაკო ინსტრუმენტზე, აქ გენიოს მუსიკოსს სხვა გენიოსი გიტარისტები წარმოაჩენენ.

კრისტი:

- ჩემი სცენები უძველეს და ულამაზეს ქალაქ ვენჰერში გადავიღეთ, რომელიც საკმაოდ მაღლა, მთაშია. სახლსა და ეზოში, რომელიც იმ კონკრეტულ სიტუაციაში ჩემს პერსონაჟს ეკუთვნოდა, ანუ მკითხავს, მთლიანად იქაურად ვიგრძენი თავი... ფილმში ბათუმელი მუსიკოსებიც უკრავენ.

რეჟისორის თქმით, ქართველები ძალიან ჰგვანან ესპანელებს და ამიტომაც დააკავა ისინი.

კრისტი:

- ფილმის რეჟისორი მეგობრის საშუალებით, მოსკოვში გავიცანი. მან ჩემში ამ კონკრეტული როლის შემსრულებელი დაინახა და გადაღება შემომთავაზა. ძალიან საინტერესო სამუშაო იყო, არ არის ჩვეულებრივი მხატვრული ფილმი. მასში ცნობილი მუსიკოსები მონაწილეობენ, მაგალითად, კარტერი, ჯიბსი კინგი... ფილმის მანძილზე მე ვხსნი ტაროს კარტს, რომელზეც გამოსახულები არიან მუსიკოსები.

პაკო დე ლუსიო მსოფლიო დონის გიტარისტი იყო, რომელსაც რეჟისორი კარგად იცნობდა და მისთვის ფილმის მიძღვნა გადაწყვიტა.

- იხილავს თუ არა ამ ნამუშევარს ქართველი მაყურებელი?

- თებერვალში ამ გენიოსი მუსიკოსის გარდაცვალების დღეა და სწორედ მაშინ იგეგმება პრემიერაც. მთავარი პრემიერა კი მოსკოვში გაიმართება. შემდეგ მას ესპანეთის კინოფესტივალზე გაიტანენ. უნდათ, რომ თბილისური პრემიერაც შედგეს, ვნახოთ.

- როდის მიმდინარეობდა გადაღებები?

- მაისში, ესპანეთში 10 დღე ვიყავით. ვცხოვრობდით ევროპის ერთ-ერთ უძველეს ქალაქ კადისში, საიდანაც კოლუმბი სამოგზაუროდ გავიდა, იმ პორტშიც გადავიღეთ რამდენიმე სცენა. ვიღებდით ასევე სხვადასხვა ქალაქში. სამუშაოდ კარგი პირობები შემიქმნეს და ამიტომაც არ გამჭირვებია როლის მორგება. ისე კომფორტულად ვგრძნობდი თავს, თითქოს იმ სახლის დიასახლისი მართლაც მე ვყოფილიყავი...

კრისტის გარეგნულად ცნობილ მსახიობ, პენელოპა კრუზს ამსაგავსებენ. ამიტომაც ამბობენ, რომ შესაძლოა, ამ რეჟისორისთვის კრისტი ისევე გახდეს წარმატების მომტანი, როგორც ალმადოვარისთვის თავის დროზე პენელოპა...

ლალი ფაცია

AMBEBI.GE