პარიზში მომხდარ ტერაქტებამდე ერთი დღით ადრე, ერაყის დაზვერვამ დაგეგმილი ტერაქტების შესახებ საერთაშორისო კოალიციის ქვეყნებს ინფორმაცია მიაწოდა. ამის შესახებ სააგენტო "ესოშიეთედ პრესი" იტყობინება.
ერაყული სპეცსამსახურების ინფორმაციით, ამ ქვეყნებში გაიგზავნა დეპეშა, რომ "ისლამური სახელმწიფოს" ლიდერმა აბუ ბაქრ ალ-ბაღდადიმ კოალიციის წევრ სახელმწიფოებზე, მათ შორის საფრანგეთსა და აშშ-ზე, ასევე რუსეთსა და ირანზე დარტყმების მიტანის ბრძანება გასცა. დეპეშაში არ იყო მითითებული დაგეგმილი თავდასხმების ზუსტი დრო და ადგილი.
თავის მხრივ, საფრანგეთის უშიშროების წარმომადგენელმა განუცხადა "ესოშიეთედ პრესს", რომ სხვადასხვა წყაროები ფრანგულ დაზვერვას მსგავსი ტიპის ინფორმაციას ყოველდღე აწვდიან. "ესოშიეითედ პრესი" წერს, რომ აღნიშნული დეპეშის ასლი მოიპოვა, გარდა ამისა, რამდენიმე ერაყელმა მაღალჩინოსანმა სააგენტოს დაუდასტურა, რომ ოფიციალურმა ბაღდადმა საფრანგეთი პოტენციურ რისკებზე წინასწარ გააფრთხილა.
კერძოდ, ფრანგულ მხარეს მიაწოდეს ინფორმაცია, რომ საფრანგეთის წინააღმდეგ დაიგეგმა თავდასხმები სირიის ქალაქ რაყაში. დაზვერვის ცნობით, სირიიდან ტერორისტები გაიგზავნენ, სადაც საფრანგეთში მათ მხარდამჭერები დახვდნენ. ოპერაციაში ჩართული იყო 24 ადამიანი - 19 შემსრულებელი და 5 თანაშემწე და ორგანიზატორი.
თავის მხრივ, ერაყის საგარეო საქმეთა მინისტრმა იბრაჰიმ ალ-ჯააფარიმ საჯაროდ დაადასტურა, რომ ერაყის სპეცსამსახურებმა მიაწოდეს ინფორმაცია საფრანგეთს, აშშ-სა და ირანს, რომ აღნიშნული ქვეყნები ტერორისტების სამიზნეში მოხვდნენ.
