ოპონენტების დისკრედიტაციისა თუ მხილების სააკაშვილისეული მახინჯი მეთოდის ტრადიცია გრძელდება?

ბოლო დღეებში გავრცელებული აუდიოჩანაწერების ავთენტურობა, რომელშიც, უკრაინული საიტის ინფორმაციით, საქართველოს ექსპრეზიდენტი მიხელ სააკაშვილი "ნაციონალური მოძრაობის" წევრებს, ასევე "რუსთავი 2"-ის გენერალურ დირექტორ ნიკა გვარამიას და მომღერალ სოფო ნიჟარაძეს ესაუბრება, დამტკიცებული არ არის. ამ საქმეზე გამოძიება დაწყებულია, თუმცა ფარული ჩანაწერები საზოგადოებისთვის ახალი არ არის და ამით "საუბარი" არც საქართველოს ხელისუფლებისთვისაა ახალი. სწორედაც რომ ფარული ჩანაწერების საფუძველზე დაუპატიმრებიათ საქართველოში ადამიანები მიხეილ სააკაშვილის ხელისუფლების დროს, ასეთი რამდენიმე ფაქტი კარგად ახსოვს საზოგადოებას. ოპონენტებთან ბრძოლის ეს უხეში და არაეთიკური მეთოდი ქართულ პოლიტიკაში სწორედ მიხეილ სააკაშვილის მთავრობამ დაამკვიდრა.

2007 წელს, იმ დროინდელმა ხელისუფლებამ გაავრცელა ფარული ჩანაწერები, რომლის მთავარი მონაწილე ბიზნესმენი ბადრი პატარკაციშვილი იყო. ყველაფერი 2006 წლის მარტში დაიწყო, როდესაც ბადრი პატარკაციშვილმა ბიზნესმენთა ასოციაციაში კერძო სექტორზე ხელისუფლების ზეწოლის შესახებ ღიად ისაუბრა, 2007 წლის 7 ნოემბერს კი პროცესები იმით დასრულდა, რომ სპეცდანიშნულების რაზმი, ხელკეტებით და რეზინის ტყვიებით იმედში შეიჭრა.

მაშინდელი გენერალური პროკურორის მოადგილემ, ნიკა გვარამიამ განაცხადა, რომ "ბადრი პატარკაციშვილი ეჭვმიტანილია დანაშაულში, რომელსაც ითვალისწინებს სისხლის სამართლის კოდექსის 315 მუხლი - შეთქმულება საქართველოს სახელმწიფო ხელისუფლების დასამხობად. ამ საკითხთან დაკავშირებით გატარებული იქნება ყველა საპროცესო ღონისძიება, რათა ბადრი პატარკაციშვილი გამოძიების ორგანოში იქნას მოწვეული და დაკითხული ეჭვმიტანილის სახით".

ერთ-ერთი ყველაზე სკანდალური ფარული ჩანაწერების სერია 7 ნოემბრის მოვლენებს მოჰყვა. პროკურატურის კამერების სამიზნე ამჯერად ოპოზიციური პარტიების წარმომადგენლები აღმოჩნდნენ - ლევან ბერძენიშვილი, გოგა ხაინდრავა, შალვა ნათელაშვილი, კოკო გამსახურდია. კიდევ ერთი გახმაურებული ჩანაწერის მთავარი გმირი ყოფილი "კონსერვატორი" კობა დავითაშვილი იყო.

ასევე, უშიშროების ყოფილი მინისტრის, ირაკლი ბათიაშვილის დაპატიმრებისას, მისი ბრალეულობის ერთადერთი დამადასტურებელი საბუთი სწორედ ფარული სატელეფონო ჩანაწერი იყო, რომელშიც ის კოდორში გამაგრებული აჯანყებულების მეთაურს ემზარ კვიციანს ესაუბრებოდა.

ფარული ჩანაწერებით სააკაშვილის ხელისუფლებისგან უხერხულობა შეექმნა ნინო ბურჯანაძესაც, რომელსაც 2011 წლის 26 მაისის ცნობილი მოვლენებისას შვილთან, ანზორ ბიწაძესთან ფარული ჩანაწერი გამოუქვეყნეს. საუბრის შინაარსის მიხედვით, ანზორ ბიწაძე ოპოზიციონერ დედას სამოქალაქო ომის დაშვებაზეც ესაუბრება.

"თუ პასუხისმგებლობას იღებ, მაშინ სამოქალაქო ომზე წასვლაც ღირს; ღირს 100 კაცის სიკვდილიც და 500-საც", - ამბობს ანზორ ბიწაძე ჩანაწერში, რომლის ავთენტურობა ამ დრომდე არ დადასტურებულა. მიუხედავად საუბრის შემაშფოთებელი შინაარსისა, მაშინდელ პროკურატურას არც ანზორ ბიწაძე და არც ნინო ბურჯანაძე დაკითხვაზე არ დაუბარებია.

პოლიტიკური ოპონენტების დისკრედიტაციის მიზნით, სააკაშვილის ხელისუფლების მიერ საზოგადოებაზე ფარული ჩანაწერებით აპელირების პიკი 2012 წლის წინასაარჩევნო პერიოდი იყო. მაშინ "ნაციონალური მოძრაობის" მთავარი სამიზნე "ქართული ოცნება" და მასში შემავალი პოლიტიკური სუბიექტები იყვნენ. ინტერნეტსივრცე დღემდე ინახავს იმ პერიოდში გამოქვეყნებული ფარული ჩანაწერების სერიას, სადაც ირაკლი ღარიბაშვილი თინა ხიდაშელს "ამკობს"[ვიდეო], გია ხუხაშვილი რამაზ საყვარელიძისა და "რესპუბლიკელების" შესახებ საუბრობს [ვიდეო], ალასანია და მისი ცნობილი "მე რა ვქნა, მე?" ივანიშვილის შესახებ [ვიდეო], გუბაზ სანიკიძის მხრიდან ბერას არაკორექტულად მოხსენიება და სურვილი, რომ "მილიონერი უნდა გახდეს [ვიდეო]... ჩამონათვალი დიდია, გუგლს კი ყოველი მათგანი ახსოვს...

საქართველოში ხელისუფლება შეიცვალა, თუმცა ჩანაწერების საშუალებით ოპონენტების დანაშაულში მხილება ან დისკრედიტაცია დღესაც გრძელდება.

გრძელდება თუ არა უკანონო მოსმენები საქართველოში - AMBEBI.GE უკანონო მოსმენების წინააღმდეგ კანონპროექტის ერთ-ერთ ავტორს, გაზეთ "რეზონანსის" მთავარ რედაქტორს, ლაშა ტუღუშს ესაუბრა. მისი თქმით, დღევანდელი ხელისუფლების დროსაც ჩნდება კითხვები, უსმენენ თუ არა ისევ ხალხს, თუმცა მისი თქმით, რა მასშტაბის არის ეს პროცესი, ანუ უსმენენ თუ არა ყველას, ან ადამიანთა გარკვეულ კატეგორიას, ეს ძნელი სათქმელია.

"ვფიქრობ, რომ საჭიროა უფრო გავამყაროთ კონტროლის მექანიზმები. ყოველთვის ვიქნებით პრობლემების წინაშე და ეს პრობლემები, რაც უფრო რთული პოლიტიკური ვითარება იქნება, უფრო მეტად გამოჩნდება ხოლმე, ანუ საჭიროების დროს საჭირო ხალხი, საჭირო ადგილზე გამოაქვეყნებს არასაჭირო მასალებს.

ის, რომ ბოლო დროს უცნაურად ქვეყნდება ძალიან მძიმე მასალები, რომელიც ვიღაცამ რატომღაც ჩაწერა და სადღაც გამოქვეყნდა, ეს კიდევ ერთხელ გვაფიქრებს, რომ აუცილებელია დამატებითი გარანტიების შექმნა ჩვენთვის იმიტომ, რომ გამოდის, ჩვენ კვლავ ვართ მოწყვლადები და ამას სერიოზული ანალიზი სჭირდება".

როგორც ტუღუში ამბობს, პრობლემა არის ის, რომ ყველაფერს პოლიტიკური ელფერი დაჰკრავს - ადამიანებს, რომელთაც არ აქვთ კონკრეტული პოლიტიკური ინტერესი, არ შეუძლიათ თამამად გამოთქვან საკუთარი აზრი ამ საკითხზე ისე, რომ მათ რომელიმე მხარის პოზიცია არ "მიაკერონ".

- ჩვენ შეგვიძლია ვილაპარაკოთ წინა ხელისუფლების გამოცდილებაზე იქიდან გამომდინარე, თუ რა კატეგორიის ადამიანების შესახებ აღმოჩნდა ფარული, უკანონო მოსმენები, ეს სპექტრი გვაძლევს იმის საშუალებას, გამოვიტანოთ დასკვნა, თუ რატომ ხდებოდა ეს ყველაფერი, მიუხედავად ამისა, ძალიან უკმაყოფილო ვარ იმით, რომ ჩვენ სერიოზული ანალიზი ვერ მივაყოლეთ ამ მასალებს, რომლის ნაწილი განადგურდა, უფრო დიდი ნაწილი გადაეცა პროკურატურას, არ მოხდა ამის სერიოზული გამოძიება, ამიტომაც ჩნდება დღეს ეს კითხვები, რომ მართლა ისევ ისე ხდება, რაც ხდებოდა".

მისი თქმით, პროკურატურას უკვე ორი წელია გადაცემული აქვს უამრავი მასალა ფარული ჩანაწერების შესახებ, თუმცა ამბობს, რომ გამოძიებას შედეგი არ დაუდია და ამ საკითხზე პოლიტიკური შეფასებები არ გაკეთებულა.  "ეს კი იმის საშუალებას მოგვცემდა, რომ თავი დაგვეზღვია და არ ყოფილიყო ის კითხვები, რაც დღეს არსებობს მოსმენებთან დაკავშირებით. რაც ახლა ხდება, რა თქმა უნდა, ესეც სიგნალებია, რომ რაღაც მაინცდამაინც კარგად არ არის, მაგრამ მასშტაბზე მსჯელობა ძალიან ძნელია.

- კანონის მიხედვით, ფარულ მოსმენებზე ახლა ნებართვა პერსონალურ მონაცემთა დაცვის ინსპექტორისგან უნდა აიღონ...

- პირველ რიგში უნდა ვკითხოთ ამ ინსპექტორს, თუ როგორ იცავს ის პირად მონაცემებს, უნდა გავიგოთ, რამდენად ეფექტურია ეს ორგანო და ის კანონი, რომელიც მიღებულია ინსპექტორთან დაკავშირებით. ამას გარდა, შესაცვლელი გვაქვს უშიშროების სამსახურთან დაკავშირებული კანონი იმიტომ, რომ უშიშროება პრაქტიკულად კანონის გარეშეა, ამ სისტემას არავინ აკონტროლებს. შეიძლება ითქვას, რომ მოსმენებთან დაკავშირებით უშიროების სამსახური აბსოლუტურად უკონტროლოა.

ერთ რამეში დარწმუნებული ვარ, რომ დღეს არის თუ ხვალ, ამ საკითხს მაინც მოვუბრუნდებით, აუცილებლად გაჟონავს ასეთი ინფორმაციები, გასკდება ამბები, დაიდება კონკრეტული ფაქტები, თუ ვინმე კონკრეტულად იყენებს ძალაუფლებას - ეს ასე ვერ მიფუჩეჩდება, ამიტომ ძალიან არ მინდა, რომ მომავალში სავალალო ვითარებაში აღმოვჩნდეთ და გამოძიების მაგიდაზე დაიდოს ფაქტები, რომელიც გვეტყვის, რომ კიდევ რაღაც არის გაფუჭებული.

ეს პირველ რიგში იმ ადამიანებისთვის იქნება ცუდი, ვინც ახლა კარგად გრძნობს თავს და ჰგონიათ, რომ გასულები არიან კონტროლის სივრციდან, მაგრამ დარწმუნებული ვარ, რომ მათ ამ მძიმე კითხვებზე მოუწევთ პასუხების გაცემა, ამიტომ ჯერ გამოძიებამ უნდა დადოს ანალიზი, მერე პარლამენტმა გააკეთოს პოლიტიკური შეფასება და შეიქმნას დამატებითი ბერკეტები იმისათვის, რომ კონტროლის მექანიზმები ბევრად უფრო უკეთესი იყოს, ვიდრე დღეს გვაქვს, - ამბობს ლაშა ტუღუში.

აღსანიშნავია, რომ ბოლო დღეებში უკრაინული საიტის მიერ სატელეფონო ჩანაწერების (რომლის ავთენტურობა გამოძიებას არ დაუდასტურებია) გამოქვეყნების შემდეგ, საზოგადოების უდიდესი ნაწილი არა ფარული ჩანაწერების გამოქვეყნების ფაქტმა, არამედ მისმა შინაარსმა ააღელვა. ეს სრულიად ბუნებრივია, ვინაიდან მოქალაქეები მტკივნეულად რეაგირებენ პოლიტიკოსების მხილების ამ "ჟანრზე". ეს ელექტორატზე გავლენის კარგ ეფექტს იძლევა და ცხადია, ოპონენტებთან ბრძოლის ამ მეთოდის დათმობა არც მოქმედი და არც  მომდევნო მთავრობისთვის იქნება მარტივი. მაგრამ დავიტოვოთ იმედი, რომ პოლიტიკური სპექტრი სამომავლოდ უარს იტყვის პოლიტიკური ოპონენტების დისკრედიტების სააკაშვილისეულ ამ მეთოდზე და თუ სამომავლოდ მოვისმენთ ფარულ ჩანაწერს პოლიტიკურ სუბიექტებს შორის, სახელმწიფო მოქალაქეებს ეტყვის, რომ ჩანაწერი სახელმწიფოს არა უკანონოდ, არამედ კანონის სრული დაცვით აქვს მოპოვებული.

თეა ბეჟიტაშვილი

AMBEBI.GE