კრისტი ყიფშიძის წარმატების ფორმულა

21 წელია, პოდიუმზე დგას. ყოველთვის ფორმაშია და ამიტომაც, ყველა წარმატებული ქართველი დიზაინერი სიამოვნებით იწვევს საკუთარ ჩვენებაზე.

რა არის კრისტი ყიფშიძის წარმატების ფორმულა და როდის გრძნობს ის თავს ყველაზე თავისუფლად? - ამ და სხვა კითხვებზე მოდელმა გულახდილად გვიპასუხა.

ბავშვობა

- ძალიან ბეჯითი, ჭკვიანი ბავშვი ვიყავი. ჯერ კიდევ საბავშვო ბაღის ასაკიდან, აქტიურად გახლდით ჩართული ღონისძიებებში, სპექტაკლებში... მიყვარდა წიგნების კითხვა. გამუდმებით ვკითხულობდი ჩემთვის საინტერესო ზღაპრებსა და მოთხრობებს. ჯერ კიდევ სკოლაში შესვლამდე ვიცოდი წერა-კითხვა.

- ცელქი იყავი?

- ვერ ვიხსენებ, რომ ჩემი სიცელქით ვინმე გამებრაზებინოს. ისე კი, მეტ-ნაკლებად ყველა ბავშვი მოუსვენარია... განებივრებული ვიყავი, მაგრამ უზრდელურად არასდროს მოვქცეულვარ... ჩემი და რომ დაიბადა, თურმე, მშობლებს ეშინოდათ: ნეტავ, დედმამიშვილს როგორ მიიღებსო?

- პირველად რომ დაინახე, იეჭვიანე?

- არა, არ მიეჭვიანია... მახსოვს, ყურადღება არც კი მიმიქცევია მისთვის. რაღაცნაირად, `იგნორი~ გავუკეთე (იცინის)...

- ახლა ეჭვიანობ?

- არა, თამამად შემიძლია ვთქვა, რომ საყვარელ ადამიანებზე არასდროს ვეჭვიანობ.

- მშობლებისგან ყველაზე ხშირად, შენიშვნას რის გამო იღებდი?

- მშობლებს ყოველთვის ვუჯერებდი. ერთხელ რომ რაღაცის გამო მისაყვედურებდნენ, მეორედ იმას აღარ გავაკეთებდი. მოკლედ, დამჯერი გოგონა ვიყავი (იღიმის).

- საბავშვო ბაღში სიარული მოგწონდა?

- საბავშვო ბაღი სახლთან ძალიან ახლოს იყო და ჩემი ოთახის ფანჯრებიდან იქაურობა კარგად ჩანდა. ერთხელ, როცა სურდო მქონდა და ბაღი გავაცდინე. მთელი დღე ფანჯრის რაფაზე ვიჯექი და ველოდები, როდის გამოვიდოდნენ ჩემი მეგობრები ბაღიდან, რომ მათთვის ფანჯრიდან შოკოლადები ჩამეყარა.

- ანუ მეგობრების პატივისცემა ბავშვობიდან იცი?

- კი, მეგობრებსა და საყვარელ ადამიანებს უყურადღებოდ არასდროს ვტოვებ.

გამოუყენებელი პროფესია

- ყურადღების ცენტრში ყოფნა ყოველთვის მოგწონდა?

- დიახ, ყურადღების ცენტრში ყოფნა ბავშვობიდანვე მიყვარს. მიღწეულით არასდროს ვკმაყოფილდები... 21 წელია, სამოდელო საქმიანობას ვეწევი და ჩემი ცხოვრების ყველა ეტაპზე, დიდი ინტერესითა და მონდომებით ვაკეთებდი საქმეს. მინდა, მომავალში უფრო მეტს მივაღწიო და საზოგადოებისთვის ყოველთვის საინტერესო ადამიანი ვიყო.

- გარდა იმისა, რომ მოდელი ხარ, რა პროფესია გაქვს?

- სკოლის დამთავრების შემდეგ რატომღაც, უცხო ენებზე ჩავაბარე. უნივერსიტეტში მთელი 5 წელი ვისწავლე. ჩემი სტუდენტობის პერიოდი 90-იან წლებს დაემთხვა. ეს იყო ყველაზე საშინელი პერიოდი. სწავლისთვის ძალიან ცუდი პირობები გვქონდა. თუმცა, უნივერსიტეტის დამთავრება მაინც მოვახერხე.

- რომელ უცხო ენას ფლობ?

- პროფესიით ინგლისური ენის პედაგოგი ვარ.

- ამ პროფესიით ოდესმე გიმუშავია?

- არასდროს და სიმართლე გითხრათ, სურვილიც არასდროს გამჩენია.

იღბალი და საქმის სიყვარული ... განაგრძეთ კითხვა