"ყურები უნდა დაგვახიონ", "მე უნდა დავსისხლიანდე"- გვარამიას, ჩერგოლეიშვილისა და სუბელიანის ცინიკური დიალოგი დღის სკანდალზე

სახელმწიფო უსაფრთხოების სამსახურის კონტრდაზვერვის დეპარტამენტის მიერ ჩატარებული ოპერატიულ-სამძებრო ღონისძიებებისა და მედიის მიერ გავრცელებული ინფორმაციის საფუძველზე გამოძიება დაიწყო.

როგორც სახელმწიფო უსაფრთხოების სამსახურიდან გვაცნობეს, გამოძიება საქართველოს სსკ-ის 315-ე მუხლის პირველი ნაწილით მიმდინარეობს, რაც გულისხმობს შეთქმულებას სახელმწიფო ხელისუფლების დასამხობად ან ხელში ჩასაგდებად.

იხილეთ მნიშვნელოვანი ბმულები თემასთან დაკავშირებით:

• სუს-მა "შეთქმულებაზე სახელმწიფო ხელისუფლების დასამხობად" გამოძიება დაიწყო
• უკრაინული ვიკილიქსი - სააკაშვილი სახელმწიფო გადატრიალებას გეგმავს
• "ნათელი მაგალითი, როგორ გაგიჟდნენ და დაკარგეს გონება" - აჟიოტაჟი "ფეისბუქზე" სუს-ის განცხადების შემდეგ

გადაწყვეტილებას გამოძიების დაწყებასთან დაკავშირებით, რომლის შესახებ საზოგადოებას ლევან იზორიამ ამცნო, "ფეისბუქზე" "რუსთავი 2"-ის გენერალური დირექტორი ნიკა გვარამია ეხმაურება.

"იმ იდიოტურ ტექსტში, სააკაშვილის, ბოკერიას, ჩერგოლეიშვილის და ჩემს გარდა, პრეზიდენტი მარგველაშვილიც შეთქმულად გამოიყურება. ნეტა იმპიჩმენტის პროცედურის ინიცირებას ხომ არ გეგმავენ მეჭიაური, ვოლსკი და კვაჭანტირაძე?", - წერს გვარამია.

გვარამიას სტატუსს კობა სუბელიანის და თამარ ჩერგოლეიშვილის ცინიკური გამოხმაურებები მოჰყვა.

კობა სუბელიანი: ყურები უნდა დაგვახიონ.

თამარ ჩერგოლეიშვილი: [@ნიკა გვარამია], მოდი, უნდა მოგკლა.

ნიკა გვარამია: [@თამარ ჩერგოლეიშვილი], ნუ გადაუხვიე გეგმას - მე უნდა დავსისხლიანდე. შვილების დედა უნდა მოკლა. გთავაზობ ეკა კვესიტაძეს.

თამარა ჩერგოლეიშვილი: ა ბოდიში. ამერია, დაკვირვებით ვერ წავიკითხე გეგმა.

შეგახსენებთ, რომ მედიაში გუშინ გავრცელდა ინფორმაცია, რომლის თანახმადაც, თითქოსდა საქართველოს ყოფილი პრეზიდენტი მიხეილ სააკაშვილი უშიშროების საბჭოს ყოფილ მდივანს გიგა ბოკერიას 22 ოქტომბერს, სტამბულის ათა-თურქის აეროპორტში ესაუბრება. საუბრის სტენოგრამაში სააკაშვილისა და ბოკერიას მიერ საქართველოში სახელმწიფო გადატრიალების მომზადების გეგმაზეა საუბარი. მედიით გავრცელებულ სტენოგრამაში ასევე ნახსენებია საქართველოს პრეზიდენტი გიორგი მარგველაშვილიც.