"ასკეტი ბერი გაბრიელის საფლავის მოსაწყობად 65,000 ლარის დახარჯვა იგივეა, პაციფისტის საფლავზე ტანკი რომ დადგა მემორიალად!"

ფინანსთა სამინისტრომ სამთავროს მონასტერში მამა გაბრიელის საფლავის მოწყობისთვის მთავრობის სარეზერვო ფონდიდან 65 000 ლარი გამოყო. ამ ფაქტს სოციალურ ქსელში ყოფილი პოლიტპატიმარი ცოტნე გამსახურდია ეხმაურება.

"მოეწონებოდა ეს მამა გაბრიელს? მე გიპასუხებთ: გაგიჟდებოდა! შეიძლება მოგწონდეს ან არ მოგწონდეს მამა გაბრიელი, ეთანხმებოდე ან არ ეთანხმებოდე, საღი გონებით ან ეგზალტირებული უყურებდე მის ცხოვრებას, მაგრამ ასკეტი ბერის საფლავის მოსაწყობად 65,000 ლარის დახარჯვა? დაახლოებით იგივეა, პაციფისტის საფლავზე ტანკი რომ დადგა მემორიალად!

მართლმადიდებლური კაპიტალიზმი ინ ექშენ! კიდევ ერთი ნათელი დასტური იმისა, რომ საქართველოს ოქროთი მოვარაყებულ და ჯიპზე ამხედრებულ ეკლესიაში (რომელიც ჩვენ დროში "აღორძინდა" :) ) ქრისტეს სიტყვისა და სულის ნასახიც აღარ არის!", - წერს გამსახურდია.

საქართველოს პრემიერ-მინისტრის, ირაკლი ღარიბაშვილის მიერ, 2015 წლის 7 ოქტომბერს მიღებული გადაწყვეტილებით, მამა გაბრიელის განსასვენებლისთვის მთავრობის სარეზერვო ფონდიდან 65 000 ლარი გამოიყოფა, - ამის შესახებ ინფორმაცია საქართველოს მთავრობის ვებ-გვერდზე გამოქვეყნდა.

"საქართველოს კულტურისა და ძეგლთა დაცვის სამინისტროსათვის საქართველოს მთავრობის სარეზერვო ფონდიდან თანხის გამოყოფის შესახებ სამთავროს მონასტერში, ღირსი მამა გაბრიელის, აღმსარებლის და სალოსის წმინდა ცხედრის საბოლოო განსასვენებლის მოწყობასთან დაკავშირებული ხარჯების ნაწილობრივი დაფინანსების მიზნით, საქართველოს ფინანსთა სამინისტრომ, "საქართველოს 2015 წლის სახელმწიფო ბიუჯეტის შესახებ" საქართველოს კანონით გათვალისწინებული საქართველოს მთავრობის სარეზერვო ფონდიდან, სსიპ - საქართველოს კულტურული მემკვიდრეობის დაცვის ეროვნულ სააგენტოს გამოუყოს 65 000 (სამოცდახუთი ათასი) ლარი", - ნათქვამია საქართველოს მთავრობის 2015 წლის 7 ოქტომბერის № 2176 განკარგულებაში, რომელსაც ხელს საქართველოს პრემიერ-მინისტრი, ირაკლი ღარიბაშვილი აწერს.