ფოთში კულტურული მემკვიდრეობის ძეგლის სტატუსის მქონე შენობა ინგრევა
ფოთში, ნავსადგურის მიმდებარე ტერიტორიაზე, მოდერნის სტილში, წითელი აგურითა და კირქვით ნაშენი შენობა დგას. ის 1901-1910 წლებში არქიტექტორ ედმუნდ ფრიკის ავტორობით აშენდა. შენობაში წლების განმავლობაში "სახელმწიფო უშიშროება" იყო განთავსებული. ნაგებობა, რომელიც სხვადასხვა არქიტექტურული დეტალებით, კონფიგურაციებით, დეკორატიული და მხატვრული ელემენტებით ხასიათდება, ნგრევის პირასაა. ჩამოშლილია ფასადი, დანგრეულია კედლების ნაწილი, კიბე, სარკმლები და სახურავი. კულტურული მემკვიდრეობის ძეგლის სტატუსის მქონე შენობა კერძო მესაკუთრის მფლობელობაშია. წინა ხელისუფლებამ შენობა ჯერ გაყიდა და კულტურული ძეგლის სტატუსი, გასხვისების შემდეგ მიანიჭა.
ფოთის მერიის განათლების, კულტურისა და ძეგლთა დაცვის სამსახურის უფროსის, დავით შეროზიას განცხადებით, კერძო მესაკუთრესთან შენობის ისტორული სახის შენარჩუნებასა და მოვლა-პატრონობაზე მოლაპარაკება მიმდინარეობს. რა თანხად და რა საინვესტიციო პირობით გაყიდა ხელისუფლებამ შენობა, უცნობია. მფლობელი კომპანიის დირექტორი, დოკუმენტებში მითითებული ტელეფონის ნომრებზე არ პასუხობს. კომპანია "ველაჯიო" წინა წლებში სახელმწიფოს მიერ კერძო პირებზე სიმბოლურ ფასად გადაცემული რამდენიმე ქონების მფლობელი გახდა. ის არასამთავრობო ორგანიზაცია "საერთაშორისო გამჭვირვალობა - საქართველოს" მომზადებულ ანგარიშშიც შევიდა - "ვის და რას ჩუქნიდა სახელმწიფო 1ლარად".
იმერეთის გუბერნატორის ხელფასი გაორმაგდა
ორი ობლისა და ორი ბებიას შემზარავი გასაჭირი გურიაში
