"მწვანეთა პარტიის" ლიდერის გია გაჩეჩილაძის განცხადებით, საქართველოს ტერიტორიის 70%-მდე სტიქიის არეალშია მოქცეული. როგორც დამოუკიდებელმა დეპუტატმა პარლამენტის პლენარულ სხდომაზე სიტყვით გამოსვლისას განაცხადა, "მწვანეთა პარტია" პრემიერ-მინისტრის ირაკლი ღარიბაშვილის მიერ გაერო-ს სამიტზე გაკეთებულ განცხადებას მიესალმება იმასთან დაკავშირებით, რომ მწვანე განვითარებისთვის საქართველოს მხარდაჭერა ურყევი იქნება და იგი საქართველოში მწვანე ეკონომიკის აღორძინებას მხარს უჭერს.
"ჩვენ ამას მივესალმებით არა მარტო იმიტომ, რომ ეს "მწვანეთა პარტიის" იდეოლოგიის ნაწილია, არამედ იმიტომაც, რომ ეს მიგვაჩნია, საქართველოს განვითარების ერთადერთ სწორ გზად, ქვეყნის ევროპული ორიენტაციის დადასტურებადაც", - განაცხადა გაჩეჩილაძემ. მისივე თქმით, 2011 წელს, წინა ხელისუფლების დროს, მაშინდელმა პარლამენტმა მიიღო ცვლილება "გარემოს დაცვის კანონში", მას დაამატა მუხლი -შეთანხმება გარემოს დაცვის სფეროში, რაც გაჩეჩილაძის შეფასებით, "ინდულგენცია იყო ბუნების მკვლელობაზე".
"ამის საშუალებით, თუ ადამიანი გადაიხდიდა ფულს, მას ყველაფერის უფლება ეძლეობა - "წითელ წიგნში" შეტანილი ცხოველების დახოცვისა და ეროვნულ პარკში ხეების მოჭრის ჩათვლით და ა.შ. საბედნიეროდ, "მწვანეთა პარტიის" საკონსტიტუციო სარჩელი 2013 წელს დააკმაყოფილა საკონსტიტუციო კომისიამ და აღიარა, ეს როგორ არაადამიანური და სახელმწიფოს წინააღმდეგ მიმართული ფაქტი", - განაცხადა გაჩეჩილაძემ. როგორც გაჩეჩილაძემ აღნიშნა, ის პრემიერ-მინისტრს ეთანხმება იმაში, რომ საქართველო კლიმატური ცვლილებებისგან საკმაოდ დაუცველი ქვეყნაა.
"ქვეყნის ტერიტორიის 70%-მდე არის მოქცეული სტიქიის არეალში. 3000-მდე დასახლებული პუნქტია ამ არეალში და 400 000 ოჯახი ცხოვრობს. სამწუხაროა ის, რომ მსხვერპლი არსებობს. ჩვენ გვაყავს 50 000-ზე მეტი ეკოდევნილი. გლობალური დათბობის შედეგად, ბოლო კვლევევის მიხედვით, საქართველოში გვალვიანი პერიოდის საშუალო ხანგრძლივობამ მოიმატა 54 დღიდან 72 დღემდე. თუ ადრე მძლავრი გვალვები 15-20 წელიწადში ერთხელ იყო, ბოლო პერიოდში ასეთი მოვლენები 6 წელიწადში ერთხელ ხდება. ქარიშხალების განმეორებადობა საქართველოს ტერიტორიაზე 5-ჯერ გაიზარდა და სოფლის მეურნეობას, ჩვენს მოსახლეობას უდიდეს პრობლემებს უქმნის", - განაცხადა გაჩეჩილაძემ.
როგორც გაჩეჩილაძემ აღნიშნა, "მწვანეთა პარტია" მზად არის ამ მიმართულებით ითანამშრომლოს ხელისუფლებასთან, გამოიყენოს საკუთარი გამცდილება და საერთაშორისო კონტაქტები აღნიშნული პრობლემების მოგვარების მიზნით.