საქართველოში შემოსული უცხოური საკვების ქართული ალტერნატივა სუპერმარკეტების დახლებზე

მარილი, შაქარი, ზეთი, მაკარონი, ბურღულეული – ბრინჯი, წიწიბურა, კარაქი – ეს არის საკვები პროდუქტები, რომლებსაც ყოველდღიურად ვიყენებთ, შესაბამისად, ეს სახეობები საქართველოში იმპორტირებულ პროდუქტებში აშკარად ჭარბობს. ისინი მეტწილად შემოდის რუსეთიდან, უკრაინიდან, თურქეთიდან, საბერძნეთიდან და ა.შ. თუმცა, საბედნიეროდ, ქართველ მომხმარებელს აქვს არჩევანის უფლება, თავად გადაწყვიტოს დასახელებული პროდუქტებიდან შეიძინოს უცხოური, თუ ქართული წარმოების.

AMBEBI.GE შეეცადა გაერკვია, ზემოთ ჩამოთვლილი პროდუქტებიდან სუპერმარკეტების დახლზე რამდენია ქართული პროდუქტი და რამდენი -იმპორტირებული. ჩვენ რამდენიმე სუპერმარკეტს ვესტუმრეთ. აქედან ორი ბევრისთვის ცნობილი და მსხვილი სუპერმარკეტია, ორი კი უბნის პატარა მარკეტი. პასუხი თითქმის ყველგან ერთი და იგივე იყო.

#იყიდექართული

ამ მხრივ ქართულ ზეთს დიდი უპირატესობა აქვს, დახლებზე რამდენიმე დასახელების ქართული ზეთი შეგვხდა. ფასი 3 ლარიდან იწყება, თუმცა გვერდს უმშვენებს რუსული და უკრაინული წარმოების ზეთიც.

იგივე ითქმის ბურღულეულზეც, შეხვდებით უცხოური დასახელების, დაფასოებულ ბრინჯსა და წიწიბურას, თუმცა შეხვდებით ქართულ დასახელებასაც.

საბედნიეროდ, ფართო არჩევანია რძის ნაწარმზე, გვაქვს საქართველოში დამზადებული რძის ნაწარმი – მაწონი, კარაქი, ხაჭო.

მაკარონი – დახლზე მათი უმეტესობა რუსული, უკრაინული და იტალიური წარმოებისაა, თუმცა არის ქართული სახეობებიც, მათ შორის მარნეულის მაკარონის ქარხნის პროდუქტი "გრანდი".

გაცილებით ფართოა არჩევანი, თუ ხორცპროდუქტების შეძენას დააპირებთ. რამდენიმე სახეობის უცხოური წარმოების ძეხვეულს, თუ სხვა ხორცპროდუქტებს, კონკურენციას უწევს ქართული წარმოების ხორცპროდუქტები, მათ შორის დომინანტია "ნიკორას" პროდუქცია.

მომხმარებელს არჩევანი აქვს შაქარისა და ფქვილის მხრივაც. დახლებზე იმპორტირებულ შაქარსა და ფქვილთან ერთად ქართულ წარმოებასაც იხილავთ, მათ შორის შაქარს "აგარა" და საქართველოში წარმოებულ ფქვილს -  "პროგრესი", "მზიური ველი", "ალაფი"...

AMBEBI.GE მხარს უჭერს ქართულ წარმოებას, რადგან გვჯერა, რომ თითოეულ ჩვენგანს შეუძლია ქვეყნის გაძლიერებაში წვლილის შეტანა და ვფიქრობთ, რომ ქვეყნის გაძლიერების ერთ-ერთი "ფრონტის ხაზი" ქართულ ნაწარმზე გადის, ვინაიდან ქართული პროდუქციის ყიდვისას ფული საქართველოს ეკონომიკაში ჩაბრუნდება. ამით, პირველ რიგში, ლარზე ზეწოლა შემცირდება. თუმცა მთავარი ის არის, რომ ქართველ მეწარმეს მიეცემა ბიზნესის გაფართოების, ანუ ახალი სამუშაო ადგილების შექმნის შესაძლებლობა, სადაც შესაძლოა, დასაქმდეთ თქვენ ან თქვენი ოჯახის წევრი. ნებისმიერი ქართული საწარმოს გაფართოება ნიშნავს მეტ შემოსავალს ქვეყნის ბიუჯეტში. გარდა ამისა, გაიზრდება კონკურენცია თავად ქართულ საწარმოებს შორის, რაც ხარისხსა და ფასზე დადებითად აისახება.

დაუჭირე მხარი კამპანიას Facebook-ზე| მოიწონეთ გვერდი "იყიდე ქართული, გააძლიერე ქვეყანა"

გამოიყენეთ ჰეშთეგი #იყიდექართული

თაკო ესებუა

AMBEBI.GE