უნგრეთის ორ რეგიონში საგანგებო მდგომარეობა გამოაცხადეს

უნგრეთის მთავრობამ ქვეყნის ორ რეგიონში საგანგებო მდგომარეობა გამოაცხადა. ამის მიზეზი "ევრონიუსის" ცნობით, ახლო აღმოსავლეთის რეგიონიდან მიგრანტების ნაკადის ზრდა გახდა.

ლტოლვილების დიდი ნაწილი უნგრეთში სერბეთიდან გადადის. როგორც უნგრეთის მთავრობაში განმარტავენ, სამართალდამცავ სტრუქტურებს ასე უფრო მიეცემათ შესაძლებლობა გააკონტროლონ არალეგალი მიგრანტების გადაადგილება. პარალელურად უნგრეთის პოლიციამ უკვე დაიწყო იმ მიგრანტების დაკავება, რომლებიც კანონის დარღვევით ცდილობდნენ საზღვრის გადაკვეთას. მხოლოდ ბოლო 24 საათის განმავლობაში 9 000-ზე მეტი მიგრანტი დააკვეს.

ლტოლვილების ნაკადის მნიშვნელოვნად ზრდის გამო, უნგრეთის მთავრობამ საიმიგრაციო კანონმდებლობაში ცვლილებებიც შეიტანა. კერძოდ, გაამკაცრა ლტოლვილებისთვის თავშესაფრის მინიჭების პროცედურები. ამას გარდა, საზღვრის არალეგალურად გადაკვეთის გამო მიგრანტს სამი წლით თავისუფლების აღკვეთა ემუქრება. უნგრეთი ახლო აღმოსავლეთიდან ევროპაში ჩასული მიგრანტების მთავარი სატრანზიტო ქვეყანა გახდა. უნგრეთში ჩასული მიგრანტები ძირითადად ავსტრიასა და გერმანიაში გადადიან.

"ინტერპრესნიუსი"