24
მაისიდღის ზოგადი ასტროლოგიური პროგნოზი
ლარის კურსი ყოველდღიურად უფასურდება, რაც ბუნებრივია, ძალიან მძიმედ აისახება მოქალაქეების ჯიბესა და განწყობაზე, მათ შორის იმ ადამიანების, ვინც "ქართული ოცნების" ხელისუფლებაში მოსვლას იმედის თვალით უყურებდა. AMBEBI.GE-მ გადაწყვიტა, რამდენიმე ადამიანისათვის ეკითხა აზრი, თუ რა შეიცვალა მათთვის მას შემდეგ, რაც "41" შემოხაზა.
მაია არდაზიანი (დიასახლისი, 45 წლის) – შეცვლით ბევრი არაფერი შეცვლილა, ოჯახის ბიუჯეტი თითქმის იგივეა, რაც მანამდე იყო. ფინანსურად ჩვენი ოჯახის მდგომარეობა ისეთივეა, რაც 2012 წლამდე, თუმცა გვაქვს იმედი, რომ ხელისუფლება სიტუაციას გამოასწორებს. ამის თქმის უფლებას მაძლევს ის პოლიტიკა, რასაც ხელისუფლება ატარებს. ვხედავ, რომ ქვეყანაში ინვესტიციები შემოდის. ლარის კურსს რაც შეეხება, ეროვნული ბანკის ხელმძღვანელი დავალებულია წინა ხელისუფლებისაგან და ისინი რასაც ეტყვიან, იმას აკეთებს, ამიტომაცაა, რომ ლარმა ასეთ უაზრო ნიშნულს მიაღწია. დარწმუნებული ვარ, ესეც გამოსწორდება.
სალომე რევაზიშვილი (სტუდენტი, 22 წლის) – ყოველთვის ვაღიარებ, რომ "41" შემოვხაზე, რადგან ბევრად მეტის იმედი მქონდა. რატომღაც მჯეროდა იმ დაპირებების, რასაც ახლანდელი ხელისუფლების წარმომადგენლები იძლეოდნენ, თუმცა აღმოჩნდა, რომ მწარედ მოვტყუვდი. ერთადერთი, რაც შეიცვალა ისაა, რომ ქუჩაში არავინ მაჩერებს და აბსურდული ბრალდებით არ მაკავებს, ასევე არ მირეკავენ ტელეფონზე და ხელისუფლების კრიტიკის გამო დაჭერით არ მემუქრებიან, მაგრამ ცალსახად გაუარესდა ფინასნური მდგომარეობა. რაიონიდან ვარ და ოჯახი ყოველკვირეულად მიგზავნის ფულს, რათა თავი შევინახო. ადრე თუ 30 ლარი მყოფნიდა, ახლა 40 ლარით ძლივს გამაქვს თავი, რადგან აბსოლუტურად ყველაფერი გაძვირდა. ახლა ამას ელექტროენერგიაც მიემატება. მთავრობის ეკონომიკური გუნდი საერთოდ არაფერს აკეთებს. როცა "41"-ს ვხაზავდი, იმედი მქონდა, რომ სამუშაო ადგილები გაჩნდებოდა, თუმცა რაც იყო, ისიც აღარაა და ახალს ვინ ჩივის.
თორნიკე კენჭიაშვილი (მცირე მეწრამე, 60 წლის) – მას მერე, რაც "41" შემოვხაზე, ერთადერთი რამე შეიცვალა – აღარავინ მოდის და გვაიძულებს, რომ მათი წინასაარჩევნო კამპანია დავაფინანსო, სხვა მხრივ თითქმის ყველაფერი ისევ ისეა, ბევრ სეგმენტში გაუარესდა კიდეც. არსადაა დაპირებული საგადასახადო შეღავათები, სამაგიეროდ გვაქვს დოლარის ისეთი კურსი, რაც პირადად ჩემ ბიზნესს ძალიან რთულ ვითარებაში აგდებს. მცირე მეწარმეებმა იმ იმედით შემოვხაზეთ "41", რომ გვქონდა იმედი, ოდნავ მაინც იზრუნებდნენ მცირე ბიზნესზე, მაგრამ მოვტყუვდით.
მარიამ კურტანიძე ( მასწავლებელი, 35 წლის) – ჩვენ სფეროში შეიცვალა საკმაოდ ბევრი რამ, უპირველეს ყოვლისა ის, რომ არჩევნების წინ არავინ მოდის და არ გვემუქრება, თუ რომელიმე კონკრეტულ კანდიდატს არ დაუჭერთ მხარს, სამსახურს დაკარგავთო. სხვა მხრივაც არის სასიკეთო ცვლილებები. მასწავლებელს, რომელსაც აქვს მაღალი კვალიფიკაცია, მოემატა ხელფასი. სიმართლე გითხრათ, როდესაც "41"-ს ვხაზავდი, ნამდვილად ვერ წარმოვიდგენდი, თუ ასე გაძვირდებოდა ცხოვრება, თუმცა იმედი მაქვს, რომ ეს დროებითია, ხელისუფლება სიტუაციის კონტროლს შეძლებს და ფასებიც დარეგულირდება. 2012 წლის არჩევნებიდან 3 წელი გავიდა და ნამდვილად არ ვნანობ ჩემს არჩევანს.
ლადო გოგოლაძე
AMBEBI.GE
