"სად არის მადლიერება, სად უმადურობა და სად დანაშაული" - ვალერი ხაბურძანია კალაძის ძმის საქმეზე

საქართველოს უშიშროების ყოფილი მინისტრი ვალერი ხაბურძანია "ფეისბუქის" პირად გვერდზე ნანუკა ჟორჟოლიანისა და კახი კალაძის დაპირისპირებას ეხმაურება.

"მე არ ვიცი მერე ვინ რა "წვლილი" შეიტანა ამ საქმის გახსნაში, მაგრამ ეს ინფორმაცია მე მომაწოდა ერთმა ჟურნალისტმა 2003 წლის ოქტომბერში, საქმე ჩვენი კომპეტენცია არ იყო და შსს იძიებდა, თან თავიანთი ვერსიები ქონდათ და რესურსიც არ ყოფნიდათ სხვა ინფორმაციის გადასამოწმებლად. ინფორმაციის ოპერატიული შესწავლა დავავალე ჩემი სამინისტროს ერთ-ერთ დანაყოფს, სადაც მოადგილე იყო ირაკლი ფირცხალავა. მოგეხსენებათ რა პროცესები განვითარდა შემდგომში, სამინისტროდან ჩემი წასვლის წინ 2004 თებერვალში მოვიკითხე ეს თემა და სამსახურის უფროსმა მითხრა, რომ ფირცხალავას დაავალა და რეალური არაფერი ჩანსო. მე საერთოდ წავედი სახელმწიფო სამსახურიდან და რამდენიმე თვეში ტელევიზიით გამოვიდა ფირცხალავა და საზეიმოდ გვამცნო კახი კალაძის ძმის საქმის გახსნა იმ სცენარით და მოქმედი პირებით რა ინფორმაციაც მათ უნდა გადაემოწმებინათ. დასკვნა... სად არის მადლიერება, სად უმადურობა და სად დანაშაული", - წერს ხაბურძანია.

შეგახსენებთ, ჟურნალისტმა ნანუკა ჟორჟოლიანმა ენერგეტიკის მინისტრ კახა კალაძეზე ვრცელი პოსტი გამოაქვეყნა, რომელშიც მისი ძმის, ლევან კალაძის გატაცების ამბავი გაიხსენა:

"კახი კალაძე დიდხანს და უშედეგოდ ეძებდა კრიმინალების მიერ გატაცებულ ძმას. ახალი ხელისუფლების მოსვლის შემდეგ, შინაგან საქმეთა სამინისტრომ ამ საქმის ხელახალი გამოძიება დაიწყო. მინისტრი ვანო მერაბიშვილი იყო. იყო ბევრი უძილო ღამე, დაკითხული ათობით მოწმე... არეული კვალი.. და მაინც არ ნებდებოდნენ პოლიციელები და გამომძიებლები. ამ პოლიციელებს შორის იყო ერეკლე კოდუა, რომელმაც მართლა ძალიან ბევრი გააკეთა, რომ ცნობილი ფეხბურთელის ოჯახს, გაეგო რეალურად რა ტრაგედია დატრიალდა მის თავს. საქმე გაიხსნა. აღარ ვყვები რამდენჯერ მოატყუეს ოჯახი, გადაახდევინეს ძალიან დიდი ფული... გადააგდეს. აღარ ვყვები, როგორ ატყუებდნენ მათ, რომ გატაცებული ბავშვი ცოცხალი იყო...

ამ ყველაფრის შემდეგ, დაჯდე და ორღობის ჭორიკანასავით ილაპარაკო ერეკლე კოდუაზე, იმაზე მეტად ტეხავს, ვიდრე რემენასთან ძმაკაცობა და ორი ავტოგოლი. როცა ხარ დაუნახავი და უმადური, ხარ ასეთი ყველასთან. როცა ამას ივიწყებ, დაივიწყებ ყველაფერს ამ ქვეყანაზე. მათ შორის ვალდებულებებსაც საკუთარი ამომრჩევლის წინაშე. დანარჩენს გავარკვევთ სასამართლოში, სადაც აუცილებლად შევხვდებით ერთმანეთს", - დაწერა ჟურნალისტმა.