22
ივნისიდღის ზოგადი ასტროლოგიური პროგნოზი
მკვლელობა, მკვლელობის მცდელობა, ნარკოდანაშაული, კონტრაბანდა, საზღვრის უკანონო კვეთა, დოკუმენტის გაყალბება, ქურდობა, ცემა – ეს ის დანაშაულებია, რომელიც გასულ წელს საქართველოში უცხო ქვეყნის მოქალაქეებმა ჩაიდინეს.
შინაგან საქმეთა სამინისტროს საინფორმაციო-ანალიტიკური კვლევის თანახმად, 2014 წელს საქართველოს ტერიტორიაზე დანაშაულებრივი ქმედება უცხო ქვეყნის 622-მა მოქალაქემ ჩაიდინა. დანაშაული ჩაიდინა 44 ქვეყნის მოქალაქეებმა, პირველ სამეულში შედის თურქეთი, ტაჯიკეთი და რუსეთი.
დამნაშავეებს შორის ჭარბობენ მამაკაცები - 512 პირი, ქალების რაოდენობა შეადგენს 103-ს. 7 პირის შემთხვევაში სქესი უცნობია. მამაკაცებში, ისევე როგორც ქალებში, დამნაშავეთა ყველაზე მაღალი მაჩვენებელი ფიქსირდება 25-44 წლის ასაკობრივ ინტერვალში.
აღსანიშნავია ის, რომ საქართველოს ტერიტორიაზე დანაშაულის ჩადენაში ამხილეს 17 წელს მიუღწეველი უცხო ქვეყნის 8 მოქალაქე: 5 მამაკაცი, 3 ქალი.
დანაშაულის ჩადენაში მხილებული უცხო ქვეყნის მოქალაქეთა რაოდენობით საქართველოს რეგიონებს შორის პირველი ადგილი უკავიათ აჭარასა (235 პირი) და თბილისს (83 პირი), ხოლო ბოლო ადგილზეა - გურია (1 პირი).
2014 წლის განმავლობაში დაფიქსირებულია მკვლელობის 1 ფაქტი, როდესაც დანაშაული ჩანედილია უცხო ქვეყნის მოქალაქის მიერ.
მკვლელობის მცდელობის 5 შემთხვევა, მათ შორის 3, როდესაც დანაშაული ჩადენილია უცხო ქვეყნის მოქალაქის მიერ. დანაშაულები ჩადენილია თბილისში, აჭარაში, სამცხე-ჯავახეთში და ქვემო ქართლში.
მძიმე დანაშაულებიდან ფიქსირდება ნარკოდანაშაულის - 90 და კონტრაბანდის - 71 ფაქტი, როდესაც დანაშაულის ჩამდენი არის უცხო ქვეყნის მოქალაქე.
რაც შეეხება უცხოელების მიმართ ჩადენილ დანაშაულებს, 2014 წელს საქართველოს ტერიტორიაზე ჩადენილი დანაშაულებრივი ქმედების შედეგად დაზარალებულია უცხო ქვეყნის 559 მოქალაქე. დაზარალებულთა შორის 366 მამაკაცი და 191 ქალია.
ყველაზე აქტუალური დანაშაულები, რომლებზეც რაოდენობრივად ყველაზე მეტი პირი ფიქსირდება, უცხოელი მოქალაქეების მიმართ არის ქურდობა (239 პირი), თაღლითობა (44 პირი), ცემა (76 პირი), სატრანსპორტო საშუალების ექსპლუატაციის წესის დარღვევა (50 პირი), ძარცვა (37 პირი), ყაჩაღობა (24 პირი) და ხულიგობა (3 პირი).
თაკო ესებუა
AMBEBI.GE
