"ოცნება" რეალობის პირისპირ: მთავრობა უტოპიური დაპირებების ტყვეობაში და პრობლმების ნუსხა ხელისუფლების ჩაბარებიდან 3 წლის შემდეგ

მომავალ საპარლამენტო არჩევნებამდე დაახლოებით ერთი წელი დარჩა, "ქართული ოცნების" საოცნებო დაპირებების დიდი ნაწილი კი დაპირებად რჩება. მთავრობა სამწლიანი მმართველობის შემდეგ სერიოზული გამოწვევების წინაშე დგას. მოიპოვებს თუ არა იგი კიდევ ერთხელ ამომრჩევლის მხარედაჭერას? ამ საკითხს AMBEBI.GE-სთან საუბრისას ანალიტიკოსებისა და მოსახლეობის ნაწილი ეჭვისთვალით უყურებს.

რა დაპირებები ვერ შეასრულა "ქართუმა ოცნებამ" და რა პრობლემები დაუგროვდა მთავრობას ხელისუფლების ჩაბარებიდან დღემდე?

ექპერტების თქმით, პირველ რიგში საქმე ეხება ეკონომიკას. ბოლო ერთი წლის განმავლობაში ლარი დაახლოებით 34 პროცენტით გაუფასურდა. ეროვნული ვალუტის დევალვაციამ პროდუქციის და მომსახურების რამდენიმე ეტაპიანი გაძვირება გამოიწვია. ამას წინ უძღოდა უცხოური ინვესტიციების და ტურისტების რაოდენობის კლება. ეკონომიკური ვითარების გაუარესებამ დამატებითი სოციალური პრობლემებიც წარმოქმნა. საუბარი დაიწყო ელექტროენერგიის და ბუნებრივი აირის გაძვირებაზეც, რამაც მოსახლეობის უნდობლობა მთავრობის მიმართ კიდევ უფრო გააღრმავა.

"ქართული ოცნების" 2012 წლის წინასაარჩევნო დაპირებებს კი სწორედ სოციალური მდგომაორების გაუმჯობესება, ტარიფების დაწევა, პენსიების გაზრდა და საწარმოების გახსნა წარმოადგენდა. რატომ ვერ შეძლო ამ დაპირებების შესრულება? ევროსაბჭოში საქართველოს ყოფილი ელჩი, მამუკა ჟღენტი ამბობს, რომ დაპირებების დიდი ნაწილი კვლევებსა და ანალიზზე არ იყო დაფუძნებული, და ისინი უფრო მეტად პოპულისტურ განცხადებებს წარმოადგენდა. თუმცა, მისივე თქმით, იყო გარკვეული დაპირებები, რომლის შესრულებაც რეალური იყო:

"როდესაც მსოფლიო ბაზარზე ნავთობის ფასი კლებულობს, აბსოლუტურად შესაძლებელი იყო მისი ფასის შემცირება საქართველოშიც. ასევე შესაძლებელი იყო საბანკო სისტემაში საკრედიტო პროცენტის განაკვეთის შემცირების შესახებ გაცემული დაპირების შესრულებაც. იქ, სადაც რაღაცის გაკეთება შეეძლოთ, არაპროფესიონალური დამოკიდებულების გამო, ვერ შეძლეს. მიმაჩნია, რომ გარდა იმისა, რომ დაპირებები იყო საკმაოდ უტოპიური, ამას ემატება ხელისუფლების არაკომპეტენტურობა და მომავლისკენ სწრაფვის ნაკლებობა. არ შეიძლება ხელისუფლებაში მოსვლიდან სამი წლის შემდეგ კვლავ "ნაციონალურ მოძრაობაზე" ვისაუბროთ. დღეს ჩვენს მოსახლეობას აინტერესებს დღევანდელი დღე და მომავალი", - ამბობს მამუკა ჟღენტი.

ეკონომიკური პრობლემების გარდა, ქვეყნის მთავარ გამოწვევად იქცა საგარეო ურთიერთობებიც. "ქართული ოცნების" მთავრობაში მოსვლის შემდეგ ქვეყანამ თითქოს რუსეთთან ურთიერთობის დალაგება დაიწყო, თუმცა, ამან უარესი შედეგი მოგვცა. ბოლო ერთი წლის განმავლობაში მოსკოვმა ჯერ აფხაზეთთან, მოგვიანებით კი ე.წ სამხრეთ ოსეთთან გააფორმა ე.წ თანამშრომლობის ხელშეკრულებები, რაც ერთობლივი თავდაცვითი და უსაფრთხოების სივრცის შექმნას ითვალისწინებს, აღნიშნული ე.წ შეთანხმებებით, მოსკოვმა კიდევ უფრო გაამყარა ოკუპირებულ რეგიონებთან კავშირი. ბოლო რამდენიმე თვეა კი რუსეთი ე.წ სამხრეთ ოსეთის ადმინისტრაციულ საზღვარს ეტაპობრივად სწევს.

"თავდაპირველად მთავრობამ რუსეთთან მიმართებაში საკმაოდ თამამი ნაბიჯი გადადგა და ურთიერთობის დალაგება სცადა, მაგრამ რაღაც პერიოდის შემდეგ მიხვდნენ, რომ რუსეთისთვის არ აქვს მნიშვნელობა საქართველოს ხელისუფლებაში იქნება სააკაშვილი თუ ივანიშვილი. მას თავისი საგარეო პოლიტიკური სტრატეგია გააჩნია საქართველოს მიმართ და ეს არის მტრული და აგრესიული პოლიტიკა. ამის საპასუხოდ საქართველოს ხელისუფლება ჩამოუყალიბებელია. ჩვენ ვერ ვხედავთ საკითხის მოგვარების მიმართ მთავრობის კონსოლიდირებულ პოზიციას", - აღნიშნა მამუკა ჟღენტმა.

მისივე თქმით, რა სფეროშიც "ქართულ ოცნებას" პროგრესი ჰქონდა, წინა ხელისუფლებასთან შედარებით, ახლა ამ კუთხითაც პრობლემებია:

"ქართული ოცნების" გარკვეული წარმატება იყო ასე ვთქვათ "თავისუფლად სუნთქვა" და მარწუხების მოხსნა. მაგრამ ბოლო პერიოდში მედიაზე განხორციელებული ზეწოლის მაგალითებიდან გამომდინარე, ვხედავთ, რომ ეს სფეროც კი, რაც მათ რეალურად განასხვავებდა "ნაცმოძრაობისგან", საკმაოდ პრობლემატურია".

ექსპერტები "ქართული ოცნების" ერთ-ერთ მთავარ პრობლემად ასახელებენ ასევე ხელისუფლების სხვადასხვა წარმომადგენლებს შორის მუდმივ კინკლაობას, რაც ქვეყნის საერთაშორისო იმიჯზე უარყოფითად აისახება.

ექსპერტ კახა გოგოლაშვილის თქმით, თუ მთავარი პრობლემები მაინც არ გამოსწორდა, მმართველი პარტია ელექტორატს დაკარგავს.

"უსაფრთხოება და ტერიტორიული მთლიანობა არის პრობლემა, რომელიც ყველაზე ძლიერი ფაქტორია, რაც ზემოქმედებას ახდენს მთავრობის მიმართ ნდობაზე. მეორეს მხრივ არის პრობლემა ეკონომიკის კუთხით, მოსახლეობას სტაბილური შემოსავლები არ აქვს. ამის განცდა თუ არ აქვს ამომრჩეველს, ის არ მისცემს მთავრობას ხმას. სხვა პრობლემებიც იქონიებს არჩვენებზე გავლენას, მაგრამ თუ არა ეს ორი ფაქტორი, იგი ნდობას დაკარგავს", - ამბობს კახა გოგოლაშვილი.

მალე წინაასაარჩევნო პერიოდი დაიწყება, რასაც ახალი დაპირებები მოჰყვება. თუმცა, დაიჯერებს თუ არა ელექტორატი "ქართული ოცნების" დაპირებებს, ამას მომავალი არჩევების შედეგები გვიჩვენებს. მანამდე კი მმართველ გუნდს დაახლოებით ერთი წელი დარჩა არსებული პრობლემების მოსაგვარებლად.

თამთა ჯიჯავაძე

AMBEBI.GE