რას ამბობს ასტრონომი გავრცელებულ ინფორმაციაზე, რომ ხვალ მარსი უკიდურესად მიუახლოვდება დედამიწას და ცაზე 2 მთვარე გამოჩნდება

პრესაში გავრცელდა ინფორმაცია, რომ 27 აგვისტოს მარსი უკიდურესად მიუახლოვდება დედამიწას, რის გამოც ცაზე ორი მთვარე გამოჩნდება...

აბასთუმნის ასტროფიზიკური ობსერვატორიის თანამშრომელი და ილიას უნივერსიტეტის პროფესორი, ასტრონომი გიორგი ჯავახიშვილი საკითხს ასე პასუხობს:

- გავრცელდა აბსურდი, თითოს 27 აგვისტოს მთვარე და მარსი დაახლოებით ერთნაირი ნათების იქნება და ცაზე ორ მთვარეს დავინახავთ. ეს შეუძლებელია, ვინ იგონებს ასეთ სისულელეებს?!

პერიოდულად წამოისვრიან ხოლმე რაღაც ჭორს და მერე ატყდება ამბავი. ასე იყო 2011 წელის 19 მარტს, მთვარე მოგვიახლოვდა და "ზედ დაგვეცემაო". რა თქმა უნდა, მაშინაც სისულელე იყო. ასტრონომები ტელევიზიებით გამოვდიოდით და ვამბობდით, ვამტკიცებდით, რომ მსგავსი რამ არ იყო მოსალოდნელი. ზუსტად იგივე ხდება ახლაც. ამ ყველაფერს ტექნიკურად რომ შევხედოთ, თუ რა ხდება ახლა, ეს ასეა:

მარსი დიამეტრით დაახლოებით დედამიწის ნახევარია, მთვარე - დედამიწის მეოთხედი, ანუ მარსი ორჯერ დიდია მთვარეზე. აქ არეკვლის კოეფიციენტია საინტერესო, ასტრონომები მას ალბედოს ვუწოდებთ, რაც დაცემული და არეკლილი სინათლის შეფარდებას ნიშნავს. მოკლედ, მარსს ეს 25 პროცენტი აქვს, მთვარეს - 7 პროცენტი. ე.ი. მარსზე დაცემული სინათლის არეკვლის კოეფიციენტი სამ-ნახევარჯერ მეტია. ყველაფერი მთლიანად რომ გამოვთვალოთ და გავითვალისწინოთ, გამოდის, რომ (მარსი რომ მოვიყვანოთ მთვარესთან ახლოს) მასრი 14-ჯერ უფრო კაშკაშა იქნება, ვიდრე მთვარეა. მაგრამ თუ მარსს დავაყენებთ რაღაც გარკვეულ მანძილზე და დავაკვირდებით იმას, როდის იქნება მთვარისხელა, კარგად რომ გამოვიანგარიშოთ, დაახლოებით, ჩვენგან მილიონ-ნახევარ კილომეტრზე უნდა მოიყვანოთ მარსი, რომ ისევე გაანათოს, როგორც მთვარემ. მარსი დედამიწასთან ძალიან ახლოსაა, 377 მილიონ კილომეტრზე, რაც დაახლოებით, 200-ჯერ უფრო შორსაა, ვიდრე იმ ადგილიდან, საიდანაც ის მთვარის ზომის გამოჩნდება.

მოკლედ, ბუნებაში არ არსებობს არანაირი ძალა, რომ მარსი "აიღოს" და მთვარესთან ასე ახლოს მოიყვანოს, თან, ისე გაანათოს, რომ მთვარესავით გამოჩნდეს. ეს შეუძლებელია მოხდეს და ამასთან, აბსოლუტურ კატასტროფას ნიშნავს, მთელი მზის სისტემის, პლანეტური სისტემის დანგრევას.

ასე რომ, პრესასა თუ ინტერნეტში გავრცელებული ინფორმაციები, აბსურდამდე მიდის. მერე სამწუხაროდ ურთავენ ისეთ კომენტარს, რომ ეს "ნასას" რომელიღაც დირექტორმა თქვა. არ არსებობენ "ნასას" ასეთი "დირექტორები". "ნასა" რასაც ამბობს, ყველაფერი მის საიტზე წერია. 27 აგვისტოს არც სავსემთვარეობაა, არც მთვარის დაბნელება, უბრალოდ, ეს აბსურდული ინფორმაცია ვიღაც სულელმა გამოისროლა.

- ე.ი. 27 აგვისტოს არაფერი მოხდება?

- მერწმუნეთ, არაფერი, ისიც კი არ ხდება, რომ მთვარე და მარსი ერთდროულად დავინახოთ. ამ დროს მარსი პატარა წერტილივით ხდება, მთვარე კი სავსემთვარეობამდე 2 დღით ადრე, საკმაოდ კაშკაშა გამოჩნდება.

- 27 აგვისტოს მთვარე, რომელსაც სავსემთვარეობამდე 2 დღე აკლდება, ღამის 2 საათზე ჩავა და მარსის ამოსვლისას (დილით) ცაზე საერთოდ აღარ იქნება?

- დიახ და ასეა ხოლმე, ალბათ არ დაკვირვებიხართ, რომ მთვარე ხან ჩანს და ხან - არა. როცა ჩადის, მაშინ არ ჩანს. მარსი დილით, 27 აგვისტოს ამოდის, მთვარე კი ღამის 2 საათზე ჩადის, ანუ მათ შორის არის ინტერვალი სამი საათი. ის სამი საათი ერთიც კი არ იქნება.

ის, რაზეც ვილაპარაკე, ეს ყველაფერი ელემენტარული არითმეტიკაა და ნებისმიერ ასტრონომიულ წიგნსა თუ საიტზე წერია. თუ წაიკითხავენ, დარწმუნდებიან, რომ ასეა. მოდი, მეტად გავერკვეთ ასტრონომიაში.

ლალი ფაცია

AMBEBI.GE