ვინ არის 4 ქართველი ბავშვი, რომელთა შესრულებული "Imagine" სუპერთასზე მილიარდამდე ადამიანმა მოისმინა

გუშინდელ საოცარ მატჩზე ("ბარსელონა" - "სევილია"), რომელიც თბილისში ჩატარდა და რომელსაც გრანდიოზული შოუ უძღოდა წინ, ოთხმა ნიჭიერმა ქართველმა ბავშვმა ჯონ ლენონის "Imagine" შეასრულა (ნახეთ ვიდეო). მათი ასაკი 10-13 წელია და საკმაოდ მაღალი შეფასებები დაიმსახურეს. მსოფლიოს მასშტაბით ისინი პირდაპირ ეთერში თითქმის მილიარდმა ადამიანმა ნახა, ასეთი ნახვა ალბათ, არც ერთ ქართველ მომღერალს არ ჰქონია. ისინი დათო ფორჩხიძის მუსიკალური სტუდიის აღსაზრდელები არიან.

დათო ფორჩხიძე:

- სტუდია მე და დათო ხუჯაძეს გვეკუთვნის. დაახლოებით ერთი წლის წინ გავხსენით და ბევრი ნიჭიერი ბავშვი გვყავს. როდესაც საქართველოში უეფა-ს დელეგაცია ჩამოვიდა, რომელსაც რეჟისორები, სცენარისტები ახლდნენ, ვისაც ეს ყველაფერი დაგეგმილი ჰქონდა, გაირკვა, რომ მომღერალ ბავშვებს ეძებდნენ. ვისაც ეს საქმე ებარა (ფეხბურთის ფედერაციაში), ამა თუ იმ ტელეპროეტში ნამღერი ჩვენი ბავშვების ჩანაწერები აჩვენეს. მოკლედ, მათით დაინტერესდნენ, თუმცა შემოწმება ორი კვირა მაინც გაგრძელდა.

- სიმღერის არანჟირება შენი იყო?

- კი და როცა არანჟირება გავუკეთე, ჩემს ვარიაციაში აღმოაჩინეს, რომ ერთ-ერთ ფრაზაზე 4 ნოტი მქონდა. ორიგინალში კი ის ერთი ფრაზა სამნოტიანია (ეს ამ აუდიოტრეკის მეექვსე წამია). მთხოვეს, იქნებ ის ერთი ნოტი, როგორც ორიგინალშია, ისე დავაბრუნოთო. საქართველოში ასეთ მუშაობას არ ვარ მიჩვეული, ამიტომ ვეუბნებოდი, ეს ჩემი ვერსიაა და მგონი, ცუდი არ არის-მეთქი. კარგია, მაგრამ ასე ვერ დარჩებაო.

- და ნამუშევრის გადაკეთებამ მოგიწია?

- კი, რა თქმა უნდა. ბევრი ჩემ გარშემო მეკითხებოდა, სიმღერა "Imagine" რატომ უნდა შესრულდეს, ჰიმნიაო? და რატომ არა-მეთქი? - ვპასუხობდი. ქართველებს ხომ ყველაფერზე პრეტენზია გვაქვს. ჩვენ ხომ საკუთარი შეხედულება გვაქვს სამყაროსა და მის ცენტრზე?..

საბოლოოდ მივხვდი, რომ უნდა მემუშავა და ყველა მათი დირექტივა შემესრულებინა ისე, როგორც უნდოდათ. თუ არადა, მრჩებოდა შთაბეჭდილება, რომ თუ ისე არ აკეთებ, როგორც მათ უნდათ, ე.ი. არ გამოგდის. ჰოდა, არ მინდოდა, რომ ისეთი წარმოდგენა შეჰქმნოდათ, რომ რაღაც არ შეგვიძლია.

თავიდან არანჟირება, როგორც ორიგინალშია, როიალით არ დამიწყია, ჩავრთე ორღანი და საკმაოდ საინტერესოდ ისმინებოდა. ამაზეც მათი აზრი ორად გაიყო - საბოლოოდ კი მითხრეს, ჩვენ მოგვწონს, მაგრამ შვეიცარიიდან გვეუბნებიან, როიალის ხმით უნდა დაიწყოსო. გადაკეთებაში 6-7 ღამე არ მძინებია. თითოეულ ფრაზასა და ნოტს დასდევნენ.

მერე მითხრეს, რომ კიდევ რომ დაგვჭირდეს ასეთი პატარები, გვიპოვიო? ერთს კი არა, 100 ბავშვს ვუპოვი. ოღონდაც, დასჭირდეთ. ჩვენთან უამრავი ნიჭიერი ბავშვია.

- გაგვაცანი ის ოთხეული, ვისაც გუშინ მსოფლიომ მოუსმინა.

- გიორგი ქალდანი შარშან ზუგდიდში ვიპოვე, რომლის მშობლებიც მეუბნებოდნენ, რომ თბილისში სამსახური და სახლი არ ჰქონდათ, რომ გიორგის აქ, სტუდიაში ევლო. მერე იმდენი ვეხვეწე, ვუხსნიდი, რომ უნიკალური ხმის პატრონია-მეთქი და მთელი სანათესაო დაეხმარა, რომ თბილისში ერთი წელი, ჩემს სტუდიაში ემეცადინა. გიორგი პაპოშვილი რუსთავიდან დადის, ნატალი მაქაცარია აფხაზეთის წარმომადგენელია, ერთ ბავშვზე კი ნეპოტიზმს მივმართე, თუმცა ძალიან ვნერვიულობდი, ის ჩემი შვილია, ნანუკა ფორჩხიძე. მაგრად მღერის და ცოტა ხანში საქართველო დარწმუნდება, რომ დამსახურებულად მონაწილეობდა ამ გრანდიოზულ შოუში.

- ისე, საზოგადოებრივ მაუწყებელზე, მათი ნამღერი ასინქრონით გავიდა. გამოსახულება არ ემთხვეოდა აუდიოვერსიას.

- ჩართული მყავდა ხალხი, რომლებიც მსოფლიოს სხვადასხვა არხზე თვალყურს ადევნებდა ტრანსლაციას და ყველგან ხარისხიანი სიგნალი მიდიოდა, ვიდეოც და აუდიოც სრულ სინქრონში იყო. სამწუხაროდ, ჩვენს არხზე, საზოგადოებრივ მაუწყებელზე ხშირად ხდება ხოლმე ასე, - ვიზუალი აუდიოს არ ემთხვევა. ამიტომ იქმნებოდა შთაბეჭდილება, რომ ბავშვები ცალკე პირს აღებდნენ. მუსიკა დაგვიანებით მოდიდოდა, ამ ტექნიკურ გაუმართაობაზე მათ ბევრი ინერვიულეს. ვიმეორებ, ასეთი რამ ჩვენს ქვეყანაში პირველად არ ხდება. თუმცა ინტერნეტში უკვე გავასწორებინე ის ჩანაწერი და ყველაფერი სინქრონში დაჯდა. მოკლედ, სტადიონის დეფექტი იყო.

- მიუხედავად ამისა, გავიგე, რომ ბავშვებმა მაღალი შეფასებები მიიღეს.

- მათ ისე იმუშავეს, რომ ყველა გააოცეს. წავიკითხე და მოვისმინე კიდეც კომენტარები, რომ მათი მისამართით მაღალი შეფასებები გაისმა. ყველაფერი ზუსტად ისეა, როგორც ქართველებს შეჰფერისო. რუსმა კომენტატორმა нтв-ზე თქვა, ეს პატარები ნამდვილი ქართული ხმებია და დროა სერიოზული კარიერით დაკავდნენო. ესპანეთიდან, ინგლისიდან აღფრთოვანებულებმა დამირეკეს...

არა, მართლა ნიჭიერი ხალხი ვართ და ყველაფერი გამოგვდის. შეგვიძლია ინგლისელებს მათივე სიმღერა მოვაწონოთ...

ლალი ფაცია

AMBEBI.GE