3
ივლისიდღის ზოგადი ასტროლოგიური პროგნოზი
არგუმენტი, რომ პრეზიდენტი მთავარი პროკურორის დანიშვნის პროცესში არ უნდა იყოს ჩართული, რადგან ის მთავრობის მეთაური აღარ არის, საფუძველს მოკლებულია, - ამის შესახებ ჟურნალისტებს ადამიანის უფლებების საკითხებში საქართველოს პრეზიდენტის მრჩეველმა, კახა კოჟორიძემ იუსტიციის მინისტრის განცხადების კომენტირებისას განუცხადა.
მისივე განმარტებით, პირიქით, სწორედ ეს არის ერთ-ერთი მთავარი არგუმენტი იმის დასასაბუთებლად, თუ რატომ უნდა დაასახელოს კანდიდატი პრეზიდენტმა.
"საქართველოს პრეზიდენტი მხარს უჭერს იმ წესს, რაც არჩევნებში გამარჯვების შემდეგ ჩაიწერა სამთავრობო პროგრამაში და რაც მოიწონა ამ პარლამენტმა. მხარს უჭერს იმიტომ, რომ ეს არის უკეთესი წესი, ვიდრე ის, რასაც დღეს გვთავაზობენ. საფუძველს მოკლებულია არგუმენტი, რომ პრეზიდენტი ამ პროცესში არ უნდა იყოს ჩართული, რადგან ის მთავრობის მეთაური არ არის. პირიქით, სწორედ ეს არის ერთ-ერთი მთავარი არგუმენტი იმის დასასაბუთებლად თუ რატომ უნდა დაასახელოს კანდიდატი პრეზიდენტმა", - განაცხადა პრეზიდენტის მრჩეველმა.
კახა კოჟორიძის თქმით, პროკურატურის დეპოლიტიზაციის მიზანი სწორედ ამ გზით მიიღწევა, რადგან პრეზიდენტს მთავრობისგან განსხვავებით არ ექნება პოლიტიკური გავლენის მოხდენის შესაძლებლობა.
""მე, არასამთავრობო ორგანიზაციაში ყოფნის დროსაც ეს პოზიცია მქონდა და ის დღესაც არ შემიცვლია. ხოლო იუსტიციის მინისტრი, სამწუხაროდ, იცვლის პოზიციას და დღეს ზედმეტობას უწოდებს იმას, რაც მისსავე სამთავრობო პროგრამაში შავით თეთრზე წერია", - აღნიშნა კახა კოჟორიძემ.
პრეზიდენტის მრჩევლის განცხადებით, პარლამენტის მიერ 2012 წლის 25 ოქრომბერს დამტკიცებული მოქმედი მთავრობის სამოქმედო გეგმა მთავარი პროკუროროს პარლამენტთან შეთანხმებით სწორედ პრეზიდენტის მიერ დანიშვნას ითვალისწინებს.
იუსტიციის მინისტრი თეა წულუკიანი მთავარი პროკურორის დანიშვნის პროცესში საქართველოს პრეზიდენტის ჩართულობას საჭიროდ არ მიიჩნევს. შესაბამისი შინაარსის კომენტარი წულუკიანმა დღეს ჟურნალისტებთან საუბარში გააკეთა.
""ეს არ არის საჭირო", - განუცხადა წულუკიანმა მედიის წარმომადგენლებს შეკითხვაზე, რამდენად საჭიროდ მიიჩნევს მთავარი პროკურორის დანიშვნის პროცესში საქართველოს პრეზიდენტის ჩართულობას, რა წინადადებითაც თავად პრეზიდენტის ადმინისტრაცია გამოდის.
