31
მაისიდღის ზოგადი ასტროლოგიური პროგნოზი
დმანისის მუნიციპალიტეტში სარწყავი არხების რეაბილიტაციის დროს სამარხები და სამაროვნები აღმოაჩინეს, - ამის შესახებ "ინტერპრესნიუსს" სოფლის მეურნოების სამინისტროდან აცნობეს.
უწყების ინფორმაციით, საქართველოს კულტურისა და ძეგლთა დაცვის მინისტრმა მიხეილ გიორგაძემ და სოფლის მეურნეობის მინისტრმა ოთარ დანელიამ დმანისის მუნიციპალიტეტის სოფელ განთიადთან და სოფელ ბოსლების მიმდებარე ტერიტორიაზე აღმოჩენილი ნამოსახლარები და სამაროვნები დაათვალიერეს.
საქართველოს სოფლის მეურნეობის სამინისტროს შპს "საქართველოს მელიორაციის" მიერ დმანისის მუნიციპალიტეტის სოფელ განთიადის და სოფელ ბოსლების მიმდებარე ტერიტორიაზე სარწყავი სისტემის რეაბილიტაციისას წარმოებული მიწის სამუშაოების დროს მიკვლეულ იქნა სამაროვნების კვალი.
უწყების ინფორმაციით, სოფლის მეურნეობის სამინისტროს მხარდაჭერით, საქართველოს ეროვნული მუზეუმის არქეოლოგიური ექსპედიციის მიერ ობიექტის შესწავლის შემდეგ აღმოჩენილ იქნა გვიან ანტიკური პერიოდის და ადრე შუა საუკუნეების ნამოსახლარები და სამაროვნები. მათგან აღსანიშნავია მდინარე მაშავერას მარცხენა ნაპირზე, ადგილ ყანჩაანთსოფელში აღმოჩენილი ორი სამაროვანი, სადაც იმ დროისათვის შეძლებული ადამიანები იყვნენ დაკრძალულნი. ორმოსამარხებში ჩატანებული აღმოჩნდა: სხვადასხვა ფერისა და ფორმის მინის სანელსაცხებლები, ბრინჯაოს ზარაკები, ირმის ქანდაკებები, საკიდები, ბეჭდები, ოქროს საკიდი და საყურეები, ვერცხლის რომაული მონეტები, რკინის საბრძოლო იარაღები და თიხის ჭურჭელი.
"ქვემო ქართლის რეგიონში აქტიურად მიმდინარეობს სამელიორაციო სამუშაოები - 22 მლნ ლარის ღირებულების პროექტი ხორციელდება. დმანისი-განთიადის მონაკვეთზე მუშაობისას სასიამოვნო მოულოდნელობის წინაშე აღმოვჩნდით. დავაფინანსეთ ექსპედიცია, რომლის შედეგადაც უნიკალური ნიმუშები აღმოჩნდა - დააახლოებით I-IV საუკუნეებით დათარიღებული ნივთები. შესწავლა დაწყებულია და თუ საჭირო აღმოჩნდა ექსპედიცია გაგრძელდება. ასევე აღსანიშნავია, რომ სამელიორაციო სამუშაოები არ შეფერხებულა და დასრულებული პროექტის შედეგად, ქვემო ქართლის რეგიონის მოსახლეობამ 30 წლის შემდეგ მიიღო სარწყავი წყალი და უნიკალური კულტურული აღმოჩენა", - განაცხადა ოთარ დანელიამ.
თავის მხრივ, მიხეილ გიორგაძემ აღნიშნა, რომ სოფლის მეურნეობის სამინისტროს სარწყავი სისტემების აღდგენის დროს I-IV საუკუნეების ნამოსახლარი - უძველესი სამაროვნები აღმოჩნდა.
"როგორც მასალა მოწმობს, ამ ტერიტორიაზე ძალიან განვითარებული დასახლება იყო. აღმოჩენილია ოქროსა და ვერცხლის ნივთები, მონეტები, სხვადასხვა სახის სამკაულები, სამეურნეო და საბრძოლო იარაღი, ნელსაცხებლები. დასტურდება, რომ დასახლება იყო ძალიან მდიდარი. მუშავდება გეგმა ახალი ექსპედიციის და ვფიქრობთ დაუზიანებელ სამარხებთან ერთად კიდევ უფრო მეტი მასალა იქნება აღმოჩენილი, რაც კვლევის კიდევ უფრო მეტ საშუალებას მოგვცემს", - განაცხადა მიხეილ გიორგაძემ.
მოპოვებული მასალის მიხედვით, ნათლად ჩანს, რომ დმანისის რეგიონში, იმ დროისათვის საკმაოდ განვითარებული და სოციალურად დაწინაურებული საზოგადოება ცხოვრობდა, რომელსაც მჭიდრო კულტურულ-ეკონომიკური კავშირები ჰქონდა, როგორც საქართველოს რეგიონებთან, ასევე რომთან და სირიასთან. აღმოჩენილი არქეოლოგიური ნივთები, სავარაუდოდ, ახალი წელთაღრიცხვის I-IV საუკუნეებით თარიღდება.
