თამარ ჩერგოლეიშვილისა და დავით კოვზირიძის პირველი კომენტარი ლექსო მაჭავარიანის დაკავებაზე - რას ამბობს "ტაბულა" ინციდენტის დეტალებზე

კანცელარიასთან "ტაბულას" თანამშრომელი ლექსო მაჭავარიანი დააკავეს. ლექსო მაჭავარიანი დღეს დაგეგმილი აქციის ერთ-ერთი ორგანიზატორია. აქცია საღამოს, 6 საათზე არის დაგეგმილი, სადაც მცოცავ ოკუპაციას გააპროტესტებენ.

მაჭავარიანის დაკავების დროს, კანცელარიასთან იმყოფებოდა "ტაბულას" ხელმძღვანელი თამარ ჩერგოლეიშვილი, რომელიც დაკავების დეტალების შესახებ თავად გვიამბობს.

- აბსურდული, წინააღმდეგობის გაწევის ბრალდებით დააკავეს ლექსო მაჭავარიანი. არანაირი წინააღმდეგობის გაწევას არ ჰქონია ადგილი; პირიქით, - თვითონ იძალადეს ლექსოზე. ეს ყველაფერი დაკავშირებულია იმასთან, რომ მათ არ სურთ სცენა დავდგათ კანცელარიის წინ. ზღუდავენ ჩვენი გამოხატვის თავისუფლებას. ამიტომაც დაიჭირეს ჩემი პროდუსერი.

დავით კოვზირიძე: ახლა მივდივარ და უნდა გავარკვიო, რატომ დააკავეს ლექსო. არანაირი აქციის ორგანიზების გამო არ არის სამართლიანი ადამიანის დაკავება.

მომხდარზე უკვე გააკეთა კომენტარი შინაგან საქმეთა სამინისტრომ. შსს-ს ცნობით, ლექსო მაჭავარიანი დაკავებულია ადმინისტრაციულ სამართალდარღვევათა კოდექსის 173-ე მუხლის შესაბამისად, რაც სამართალდამცველების განკარგულებისადმი ან მოთხოვნისადმი დაუმორჩილებლობას გულისხმობს.

შეგახსენებთ, რომ საპროტესტო აქციის, "Stop Russia"-ს მოთხოვნებია, შეწყვიტოს აბაშიძემ კარასინთან პირისპირ საუბარი; ყველა მოლაპარაკება მოსკოვთან წარიმართოს საქართველოს სტრატეგიული პარტნიორების მონაწილეობით და პარლამენტმა მიიღოს კანონი კოლაბორაციონიზმის წინააღმდეგ.

დაინტერესებულ პირებს, აქციის შესახებ დამატებითი ინფორმაციის მიღება "ფეისბუქზე" შექმნილი გვერდიდან შეუძლიათ, - Facebook/event: Stop Russia

თამარ ბოჭორიშვილი

AMBEBI.GE