26
ივნისიდღის ზოგადი ასტროლოგიური პროგნოზი
საფრანგეთმა ბურკინა-ფასოში გაგზავნილ ორ სამხედროს უფლებამოსილება შეუწყვიტა მას შემდეგ, რაც ჯარისკაცები მცირეწლოვნების მიმართ სექსუალურ ძალადობაში დაადანაშაულეს. ამის შესახებ "გარდიანი" საფრანგეთის თავდაცვის სამინისტროზე დაყრდნობით იუწყება.
გავრცელებული ცნობით, ფრანგმა სამხედროებმა, რომლებიც დასავლეთ აფრიკის რეგიონის ქვეყანაში სპეციალური მისიით იმყოფებოდნენ, სექსუალური ძალადობა განახორციელეს ხუთი წლის გოგონაზეც, რომლის მამამ ძალადობის ამსახველი კადრები იპოვა.
"ერთ-ერთმა სამხედრომ სცენა კამერით გადაიღო მაშინ, როდესაც მეორე გოგონას შეეხო", - აღნიშნა ბურკინა-ფასოს პოლიციის წარმომადგენელმა. მისივე თქმით, გოგონას მშობლები ეჭვმიტანილი სამხედროების მეგობრები არიან. მომხდართან დაკავშირებით საფრანგეთში საქმე უკვე აღძრულია.
ბურკინა-ფასოში 220 ფრანგი სამხედროა განთავსებული, ისინი რეგიონის ხუთ ქვეყანაში საფრანგეთის მიერ ორგანიზებულ ანტიტერორისტულ ოპერაციაში არიან ჩართული. სექსუალური ძალადობის ბრალდებები ფრანგი სამხედროების მიმართ დაახლოებით ორი თვის წინაც გაისმა. მაშინ ორგანიზაცია AIDS-Free World-ის ერთ-ერთმა ხელმძღვანელმა, პაულა დონოვანმა გამოცემა "გარდიანს" მიაწოდა გაერო-ს ანგარიში, რომელშიც საუბარია ცენტრალური აფრიკის რესპუბლიკაში ფრანგი სამხედროების მიერ ბავშვთა მიმართ ძალადობის შემთხვევაზე. თავდაპირველად ფრანგებთან ერთად დანაშაულში ქართველი სამხედროების მონაწილეობაზეც იყო საუბარი, თუმცა, მოგვიანებით არ დადასტურდა.
