გმირი, რომელმაც 7 ადამიანი გადაარჩინა, თვითონ კი დაიღუპა - საქართველო სტიქიისას დაღუპულ მაშველს ემშვიდობება

საქართველოს პრემიერ-მინისტრი, ირაკლი ღარიბაშვილი თბილისში მომხდარი სტიქიის სალიკვიდაციო სამუშაოების დროს დაღუპული მეხანძრე-მაშველის ზურა მუზაშვილის დაკრძალვას ესწრება.

როგორც "ინტერპრესნიუსის" კორესპონდენტი იუწყება, მთავრობის მეთაური კასპის რაიონის სოფელ აღაიანში მდებარე წმინდა გიორგის სახელობის ეკლესიაში იმყოფება.

"ეს არის ძალიან დიდი დანაკარგი ჩვენთვის. ზურა მუზაშვილი ჩვენი ქვეყნის ნამდვილი გმირია, რადგან მან გადაარჩინა რამოდენიმე ადამიანი და შემდეგ თვითონ შეეწირა ამ ტრაგედიას. მინდა მის ოჯახს, მის მშობლებს მადლობა გადავუხადო, რომ ასეთი გმირი გაუზარდეს ჩვენს ქვეყანას და ხალხს. ასევე, მინდა კიდევ ერთხელ მოვიხარო ქედი მისი სულის წინაშე. ჩვენ ღირსეულად უნდა მივაგოთ პატივი მის ხსოვნას", - განუცხადა ირაკლი ღარიბაშვილმა აღაიანში ჟურნალისტებს.

პრემიერ-მინისტრთან ერთად სოფელ აღაიანში შს მინისტრი ვახტანგ გომელაური და იუსტიციის მინისტრი თეა წულუკიანი იმყოფებიან, ასევე უმრავლესობის რამდენიმე წევრი. დაღუპულის ოჯახს სამძიმარი გამოუცხადა საგანგებო სიტუაციების მართვის სააგენტოს დირექტორმა ზვიად ქაწაშვილმაც.

ზურა მუზაშვილი საქართველოს გმირია, - ამის შესახებ ჟურნალისტებს შს მინისტრმა, ვახტანგ გომელაურმა განუცხადა. გომელაურის განმარტებით, მუზაშვილის დაღუპვა ქვეყნისთვის დიდი დანაკარგია.

"მინდა პირველ რიგში მივუსამძიმრო ზურას ოჯახს. ის იყო ჩვენი შს სამინისტროს დიდი ოჯახის წევრი. ის ღვარცოფის მოვარდნის მომენტიდან ადგილზე იმყოფებოდა და 7 ადამიანი გადაარჩინა, თუმცა სამწუხაროდ, თვითონ ვეღარ შეძლო გამოსვლა და დაიღუპა. ეს ადამიანი საქართველოს ნამდვილი გმირია", - განაცხადა ვახტანგ გომელაურმა.

შს მინისტრმა სტიქიის სალიკვიდაციო სამუშაოებში მონაწილე ყველა პოლიციელს მათ მიერ გაწეული სამუშაოსთვის მადლობა გადაუხადა.

"მინდა მადლობა გადავუხადო პოლიციის იმ თანამშრომლებს, ვინც მონაწილეობდა სამაშველო სამუშაოებში, ასევე თავდაცვის სამინისტროს ბიჭებს, ვინც წვლილი შეიტანა ადამიანების გადარჩენაში", - აღნიშნა შს მინისტრმა.