კაპრალ რამაზ დავითაიას გარდაცვალების გამო თბილისში აშშ-ის საელჩოში დროშა დაუშვეს

ამერიკის შეერთებული შტატების ელჩი საქართველოში, რიჩარდ ნორლანდი დაღუპულ კაპრალ რამაზ დავითაიას ოჯახს უსამძიმრებს. როგორც რიჩარდ ნორლანდმა განაცხადა, დღეს ძალიან სამწუხარო მოვლენა მოხდა. "მრავალი რამ ხდება დღეს საქართველოში, მაგრამ ძალზედ სამწუხარო მოვლენა მოხდა, რომელმაც დაგვამწუხრა მე, ჩემი მეუღლე და ამერიკის შეერთებული შტატები. გორის სამხედრო ჰოსპიტალში ჭრილობების გამო გარდაიცვალა კაპრალი რამაზ დავითაია. გვქონდა შესაძლებლობა რამაზი გაგვეცნო რამდენიმიე წლის წინ, როდესაც იგი გერმანიიდან საქართველოში დაბრუნდა, სადაც გადიოდა მკურნალობას. ეს იყო შესანიშნავი ახალგაზრდა, რომელიც მიღებული ჭრილობების შედეგად დღეს გარდაიცვალა. ჩვენ ვიზიარებთ მწუხარებას და თანაგრძნობას გამოვხატავთ მისი ოჯახის, დედ-მამის, ძმის მიმართ. დღეს გამოვიყენე ჩემი ელჩის უფლებამოსილება და აშშ-ს საელჩოში დავუშვით დროშა პატივისცემის ნიშნად", - განაცხადა რიჩარდ ნორლანდმა.

კაპრალ დავითაიას ხსოვნის პატივსაცემად, აშშ-ის საელჩოს დროშა 24 საათის განმავლობაში დაშვებული იქნება ISAF-ის მისიაში დაჭრილი კაპრალი რამაზ დავითაია გორის სამხედრო ჰოსპიტალში დღეს გარდაიცვალა. საქართველოს თავდაცვის სამინისტროს ინფორმაციით, რამაზ დავითაია მე-2 ქვეითი ბრიგადის 23-ე ბატალიონის შემადგენლობაში, ავღანეთში, ჰელმანდის პროვინციაში ასრულებდა მისიას. 2012 წლის 20 ივნისს ქართველი სამხედრო მოსამსახურე პატრულირების დროს მძიმედ დაიჭრა. რამაზ დავითაია თავდაპირველად გერმანიაში ჰაიდელბერგის ამერიკულ კლინიკაში მკურნალობდა, შემდგომში კი რეაბილიტაციას "ნიუ ჰოსპიტალში" და თავდაცვის სამინისტროს სამხედრო ჰოსპიტალში გადიოდა. მიმდინარეობდა მუშაობა აშშ-ის მთავრობასთან და საქართველოში აშშ-ის საელჩოსთან ერთად კაპრალ დავითაიას ამერიკაში სამკურნალოდ შესაძლო გადაყვანაზე.

რამაზ დავითაია შეიარაღებულ ძალებში 2007 წლის 26 ივნისიდან ირიცხებოდა. დაჯილდოებულია ვახტანგ გორგასლის III ხარისხის ორდენით, მედლით "სამშვიდობო ოპერაციებში მონაწილეობისთვის" და უწყებრივი მედლით "საბრძოლო იარისათვის".

"ინტერპრესნიუსი"