22
ივლისიდღის ზოგადი ასტროლოგიური პროგნოზი
"X ფაქტორში" ერთი ძალიან მაგარი ბიჭი, გიგო შიუკაშვილი მუშაობს, რომელიც დამატებითი ოთახიდან, თანაწამყვან თათუკასთან ერთად ეთერში ერთვება და კონკურსანტებს წარადგენს. მაყურებელს ეკრანზე გამოჩენისთანავე შეაყვარა თავი...
ის დღეს Ambebi.ge-ს სტუმარია. სკოლიდან ახალი მოსული იყო, რომ შევეხმიანეთ, გვითხრა, საღამოს "X ფაქტორი" მაქვს და ახლა ამისთვის უნდა მოვემზადოო.
- გიგო, "X ფაქტორი" მოგწონს?
- მომწონს. იმიტომ რომ ხალხი, ადამიანები მიყვარს...
- ხალხსაც უყვარხარ და გაფასებენ... რა მოხდა მას მერე შენს ცხოვრებაში, რაც ეკრანზე გამოჩნდი?
- ქუჩაში რომ გამოვდივარ, ყველა მცნობს. მაქებენ, მომიკითხავენ ხოლმე.
ცოტა ხნის წინ 20 წლის გავხდი, უკვე გავიზარდე და იმ დღეს ეკრანზეც ვიყავი. მომილოცეს დაბადების დღე. მაგარი ამბავი იყო, ტორტი მომიტანეს და სურვილი ჩავიფირე, კარგი რაღაცები მოხდა...
- წამყვანობა მოგწონს?
- ძალიან მიყვარს იმიტომ, რომ უკვე ჩემი სამსახურია.
- შენმა დედიკომ მითხრა, რომ გიგოს მსახიობობა უნდაო. მართალია?
- მართალია, კინოს მსახიობობა მინდა. მიყვარს ეს საქმე. დავდივარ თეატრალურ სტუდიაში - "ლურჯა ცხენები", სადაც მეგობრები მყავს, ვმსახიობობთ და ვართ ასე.
- როცა "X ფაქტორში" გამოდიხარ, იმ დღეს ამისთვის როგორ ემზადები?
- ჩვეულებრივად. თვითონ "X ფაქტორი" მომწონს, ბავშვები, მომღერლები და თათუკაც, ჩემთან ერთად რომ არის ხოლმე, ის გოგო. კარგი გოგოა. 7 წელია, "რუსთავი 2"-ში მუშაობს. ამ პროექტში პირველად არის და პირდაპირ ეთერში ერთად ვართ.
- თვითონ "X ფაქტორის" კონკურსანტები მოგწონს? როგორ აფასებ მათ?
- მე იქ იმ ბავშვებს დიდი სიყვარული და პოზიტივი უნდა ვაჩვენო, რომ არ ინერვიულონ, მთელი ამბებია... განწყობას ვუქმნი, კარგად რომ იმღერონ.
- ე.ი. პირდაპირ ეთერში მუშაობა გეადვილება?
- ეს საქმე ჩემთვის ადვილია...
- მუსიკა გიყვარს?
- მიყვარს როკიც, პოპიც, ჯაზიც და ქართული ფოლკლორიც. წაკითხული მაქვს ისტორიაში, რომ ჰამლეტ გონაშვილი მაგარი მომღერალი იყო, მერე მივისმინე მისი სიმღერები და ძალიან შემიყვარდა. ჰო, ფოლკლორული სიმღერები შემიყვრდა.
- შენთვის მღერი ხოლმე?
- კი, ჰამლეტ გონაშვილის სიმღერებს ვმღერი. გინდა, წავიმღერო?
- კი.
- "წინწყაროოო…" (მღერის). ეს მომწონს ძალიან. ტამტამებზე და ფანდურზეც ვუკრავ, თან, ვმღერი და ვცეკვავ კიდეც. იცი, რა კარგად ვცეკვავ? ქართულიც მომწონს და კინტაურიც...
- სკოლაში როგორ სწავლობ?
- ათებზე. სულ ათები და ათები მაქვს, სიგელებიც. მომავალ წელს ატესტატი მინდა ავიღო და ტელეწამყვანი და მსახიობი უნდა გავხდე.
- როგორი როლები მოგწონს?
- ჩემი აზრით, ჩარლი ჩაპლინი მაგარი მსახიობია. ისტორია მოვისმინე ნატო ვაჩნაძეზეც. ხომ იცი, მუნჯი კინო რომ იყო. ის ფილმები მომწონს. კიდევ მიყვარს ევროპული კინოები, იტალიური, ესპანური, ამერიკული და ა.შ.
- ინგლისური იცი?
- ნაწილობრივ ვიცი და ახლა ვსწავლობ...
- ბერი მეგობარი გყავს?
- თეატრალურ სტუდიაში ბევრი მეგობარი მყავს და კიდევ "რუსთავი 2"-ში შევიძინე ახალი მეგობრები. ადრე "რუსთავი 2" მომწონდა, მერე დაიწყეს, ეს ტელევიზია არ მიყვარსო. ახლა ნელ-ნელა შევაყვარე იმათაც, ვისაც არ უყვარდა. მე ხომ იქ ვმუშაობ?
- ჟიურიდან რომელი წევრი იქცევს შენს ყურდღებას?
- მომწონს გიორგი გაბუნია, ანრი ჯოხაძე, თამთა გოდუაძე და სოფო ნიჟარაძე. ყველას ვიცნობ და მიყვარს. იქ კიდევ ორი წამყვანია - რუსკა მაყაშვილი და გიორგი ყიფშიძე. რუსკა მაყაშვილი ძალიან მიყვარს.
- ამ პროექტში რა არ მოგწონს?
- ბავშვებს რომ აგდებენ და სახლში უშვებენ. მინდა, რომ დარჩნენ პროექტში.
- ახლა ჩვენს მკითხველს რას ეტყოდი?
- ხო, გითხარი, ხალხი, ადამიანები მიყვარს. ისინი მთელ მსოფლიოში მიყურებენ და მადლობა მინდა ვუთხრა. შექება მიხარია და ადამიანებთან ურთიერთობა. უყურონ იმ გადაცემას, სადაც მე ვმუშაობ ორშაბათს, 10 საათზე, არ არის პრობლემა.
- "რუსთავი 2"-ის დირექტორს სახეში ტორტი რომ შეაზილე. როგორი იყო? [ვიდეო]
- ჰო, გამახსენდა (იცინის), მაგარი ღადავი იყო. იმ დღეს 21 წლის გახდა "რუსთავი 2", დაბადების დღე ჰქონდა. სტუდიაში შემოვიდა ნიკა გვარამია, თქვა, რომ დაბადების დღე აქვს ჩვენს ტელევიზიასო, მერე ტორტი ჩამოჭრა, ის ნაჭერი მომაწოდა და რაც გინდა ქენიო. ავიღე და სახეში შევაზილე. იმიტომ შევაზილე, რომ გვარამია ძალიან შემიყვარდა. ადრე ჩემი დედიკოს მინისტრი იყო. ახლა ტელევიზიის დირექტორად მუშაობს.
- გიგო, გისურვებ, მალე მიგეღწიოს შენი მიზნისთვის, მსახიობი გამხდარიყავი, წამყვანიც და ბევრი სიკეთე გქონდეს.
- ოჯახი? რატომ გამოგრჩა?
- შეყვარებული ხარ?
- კი.
- ვინ გიყვარს?
- საიდუმლოა. იმან იცის, რომ მიყვარს. თეატრალურ სტუდიაში ერთად დავდივართ, "ლურჯა ცხენებში" გავიცანი...
- კარგი გოგოა.
- აბა, რა... მაგარი.
- ჰოდა, დიდ სიყვარულს გისურვებ.
- დიდი მადლობა.
ლალი ფაცია
AMBEBI.GE
