"სააკაშვილი დიდხანს ვერ გასტანს ოდესაში, იქ მცხოვრები ხალხი მიშას წიკებს დიდხანს ვერ აიტანს"

რუსეთში მცხოვრები ბიზნესმენი მიხეილ ხუბუტია მიხეილ სააკაშვილის ოდესის გუბერნატორად დანიშვნას ეხმაურება. ხუბუტია, რომელიც რუსეთის უმაღლეს პირებთან არის დაახლოებული, Ambebi.ge-სთან საუბარში აცხადებს, რომ კაბინეტებში და დერეფნებში სააკაშვილის გუბერნატორად დანიშვნის ფაქტს სერიოზულად არავინ აფასებს.

- ძალიან ცუდად ვაფასებ მიხეილ სააკაშვილის ოდესის გუბერნატორად დანიშვნას. ორი მიზეზი მაქვს ამისთვის. პირველი ვერსიით, ამერიკელებს მობეზრდათ უკვე სააკაშვილი რომ კბენს საქართველოს ხელისუფლებას და რუსეთს, ხელს უშლის ყველას, ამიტომ დაასაქმეს. სააკაშვილი დიდხანს ვერ გასტანს ოდესაში, იქ მცხოვრები ხალხი მიშას წიკებს დიდხანს ვერ აიტანს.

- რუსეთში როგორ აფასებენ სააკაშვილის გუბერნატორად დანიშვნას?

- მასობრივი ინფორმაციის საშუალებებში წერენ ამის შესახებ, თორემ დერეფნებში და კაბინეტებში არც განიხილავენ ამ საკითხს, მათთვის ეს სასაცილოა. ეს არის ამერიკის მხრიდან შეფურთხება რუსეთისთვის და უკრაინელი და ქართველი ხალხის დაცინვა. ქართველმა ხალხმა სამშობლოდან გააგდო ყოფილი პრეზიდენტი. აშშ და "გოსდეპი" ძალიან ძველი მეთოდებით მუშაობს, რომელიც აღარ ჭრის. ქართველმა ხალხმა გაიღვიძა, ერთადერთი რაც არ მომწონს არის ის, რომ საქართველოს ახალი მთავრობა პიარს ვერ იკეთებს. ამ მთავრობის ფანი არ ვარ, მაგრამ მათ არ შეუჩერებიათ სასარგებლო პროექტების გაკეთება და ამის სათანადო გაპიარება არ ხდება. საბედნიეროდ, საქართველოს ხელისუფლება წინასწარ ხვდება მიშას ხრიკებს. ამაზე მიუთითებს ის ფაქტი, რომ ოთხი კაცი გაიქცა "ნაციონალური მოძრაობიდან", მიშა საქართველოსთვის პოლიტიკური გვამია. ადამიანების გინება მე არ მჩვევია, მაგრამ ადამიანს, რომელიც პოლიტიკაში ფულზე იყიდება, შეუძლია ყოველდღე ადგილიდან ადგილზე გადაინაცვლოს. მე მიშას პირადად ვიცნობ და მისი ერთი სიტყვაც არ მჯერა. ის არის ადამიანი, რომელსაც სამშობლო და ოჯახი არ უყვარს. კაცს მეგობარი არ ჰყავს, გუნდის გარეშე ის ვერაფერს გაიტანს. თავის დროზე ჰყავდა იდეოლოგები, მაგალითად, გიგა ბოკერია.

- სად გაიცანით სააკაშვილი?

- როცა ის საქართველოს პრეზიდენტი გახდა, ინვესტიციების საკითხზე შემხვდა. სხვათა შორის, მაშინ კარგად დაიწყო მან მუშაობა, ბიზნესის გასაკეთებლად ყველა შეძლებული ქართველი დაპატიჟა საქართველოში, მათ შორის მეც. რამდენჯერმე შევხვდით, მაგრამ ჩვენი თანამშრომლობა არ შედგა. მე ჩემი პოზიცია მქონდა რუსეთ-საქართველოს ურთიერთობაზე, მიშას - მისი. ყველა "ნაციონალზე" ცუდს ვერ ვიტყვი, შემდგარი პოლიტიკოსია დავით ბაქრაძე. გოკა გაბაშვილი და ირმა ნადირაშვილი სახელს უფუჭებს "ნაციონალურ მოძრაობას". თუ სააკაშვილი და ესენი ჩამოშორდებიან პარტიას, მგონი ისევ წამოწევს "ნაციონალური მოძრაობა" თავს, ოღონდ პატრიოტულ კონტექსტში. პოროშენკომ დიდი ოლქი ჩააბარა სააკაშვილს, მაგრამ მას გასაქანს მაინც არავინ მისცემს. თუ ადეიშვილი დაინიშნა პროკურორად, ე.ი. გააგრძელებს იგივეს, რასაც საქართველოში აკეთებდა. სისხლის გემოს ადამიანი როცა გასინჯავს და მგელი გახდება, იმას ვერ გამოასწორებ. კულუარებიდან ვიცი, რომ "ნაციონალური მოძრაობის" რამდენიმე წევრი გაღიზიანებულია საქართველოზე, განსაკუთრებით აჭარაზე, სადაც ძალიან ცოტა ხმები აიღეს არჩევნებზე.

- ხშირად ამბობენ, რომ ოდესა "კრიმინალების ქალაქია", მიხეილ სააკაშვილი ნულოვანი ტოლერანტობით ებრძოდა კრიმინალს, ამ გამოწვევას როგორ გაუძლებს?

- მიშა არაადეკვატური ადამიანია, ზურგს უკან ძალას თუ გრძნობს, გაბედულია, თუ არადა - მშიშარა. 3-4 თვეში მიშას შიში აუცილებლად გამოჩნდება, მას უკვე ეშინია. სააკაშვილმა სუსტი კრიმინალი გაამწარა, ქურდული ინსტიტუტი თავისთავად დაირღვა, რადგან ე.წ. კანონიერი ქურდები ბიზნესმენები გახდნენ. ზოგი "შუსტრიაკი" გახდა, ზოგი ძლიერი ბიზნესმენი. მიშას ხასიათი რომ ვიცი, დაუწყებს ამ ძლიერ ბიზნესმენებს დატერორებას და ისინი აღარ აპატიებენ, ეს გამორიცხულია.

თამარ ბოჭორიშვილი

AMBEBI.GE