რამდენად მნიშვნელოვანია სახლის, მანქანისა და სამსახურის კურთხევა და რა უნდა იცვლებოდეს ადამიანის ცხოვრებაში კურთხევის შემდეგ

ბოლო პერიოდში ადამიანები სახლის გარდა, მოძღვარს ხშირად ავტომობილებსა და სამუშაო ოთახსაც  აკურთხებინებენ. საჭიროა თუ არა მათი კურთხევა და რა მნიშვნელობა აქვს კურთხევას, ამ საკითხებზე Ambebi.ge-ს ნარიყალას წმ. ნიკოლოზის ტაძრის წინამძღვარი, დეკანოზი გიორგი თევდორაშვილი ესაუბრება.

- დღეს ძალიან შაბლონური გახდა სიტყვები "მაკურთხე", "დამლოცე", თუმცა მისი მნიშვნელობა ცოტამ თუ იცის. კურთხევის აღება ნიშნავს უკვე რაღაც გადაწყვეტილების მიღებას, რომ მე მიჭირს გადაწყვეტილების მიღება და რჩევას ვეკითხები მოძღვარს. სიტყვა დამლოცე ნიშნავს იმას, რომ გადაწყვეტილება მიღებული მაქვს და მოძღვარს ვთხოვ, რომ დამლოცოს ამ საქმის წარმატებით განხორციელებაში.

- რა მნიშვნელობა აქვს სახლის კურთხევას?

- ეკლესიამ განაჩინა, რომ ქრისტიანი სადაც ცხოვრობს, მუშაობს, რითიც გადადგილდება - ეს იქნება სახლი, სამსახური თუ ავტომობილი, იკურთხოს. ადრე ნავის, ურმის კურთხევა იყო, ახლა ბუნებრივია, ურმისა და ნავის მაგივრად ადამიანი ავტომობილით გადაადგილდება. რაც შეეხება სიტყვა კურთხევას, ნუ გვგონია, რომ მაშინვე ცა გაიხსნება და ბევრი ოქრო ჩამოცვივა. ამით ვიწვევთ მფარველ ანგელოზს, რომელიც უხილავად მობრძანდება და ყოველგვარი მტრული ძალებისგან დაგვიცავს. უნდა ვიცოდეთ, რომ არსებობს უხილავი სამყარო, დაცემული ანგელოზები, რომლებიც ხელს გვიშლიან მშვიდ და პატიოსან ცხოვრებაში. როცა სახლის კურთხევა ხდება, ოჯახის წევრებმა ცხოვრების წესი უნდა გამოასწორონ. თუ იმ ოჯახში თამბაქოს ეწეოდნენ, აღარ უნდა მოწიონ, თუ 24 საათი იყო ქეიფი, სმა, ლოთობა, ბილწსიტყვაობა, ულოცველობა, ჩხუბი და კამათი, მსგავსი ქმედებები უნდა შეწყდეს.

როცა რომელიმე დაწესებულებას ვაკურთხებ ხოლმე, ვთხოვ, რომ აღარ იჭორაონ, ყავაში აღარ ჩაიხედონ, ერთმანეთი არ განიკითხონ; სხვა შემთხვევაში, რა აზრი აქვს კურთხევას? თუ მოძღვარი ოჯახში ან სამსახურში მოიყვანე, მობრძანდა მფარველი ანგელოზი და ამ დროს შენ თამბაქოს ეწევი, ილანძღები, იგინები, კურთხევას აზრი არ ექნება. ბოლო პერიოდში ალბათ შეამჩნევთ, რომ ავტომობილებს აწერია "უფალო შეგვიწყალენ", "დიდება უფალს" - ეს სასიამოვნოა, მაგრამ ამ დროს, როცა ნაკლებად მორწმუნე ხალხი გვიყურებს, ჩვენს ქმედებაზე ეცინებათ. როცა ტრანსპორტში ახლგაზრდა მზესუმზირას მიირთმევს, საღეჭ რეზინს ღეჭავს და ტაძრის დანახვისას პირჯვარს გადაიწერს, ეს ხომ სასაცილო მდგომარეობაა? იმიტომ, რომ ადამიანმა ეკლესიური ცხოვრებით უნდა იცხოვრო, რაც ნიშნავს თავმდაბლობას, სიყვარულს, მიტევებას, უბრალოებას, სიკეთეს, არგანკითხვას, ხოლო როცა სახლი, ავტომობილი ან სამსახური ნაკურთხია, იქ ადამიანები უნდა იქცეოდნენ ეკლესიური ცხოვრების წესით, სხვანაირად ეს ფარისევლობა იქნება და ვერანაირ სიკეთეს და წყალობას ვერ მივიღებთ. არ ვიცი, ამ სიტყვებს ვინ როგორ მიიღებს, მაგრამ ეს არის ჭეშმარიტება, სხვანაირად მართლმადიდებელი ქრისტიანები ვერ ვიქნებით, იმიტომ, რომ ვინათლებით - არ გვესმის, ჯვარს ვიწერთ - არ გვესმის, აღსარებას ვამბობთ - არ გვესმის, ამ ყველაფერს მაგიურად ვასრულებთ და შემდგომში, როცა საუბარი ზნეობრივ საკითხებზე ჩამოვარდება, ვაცხადებთ, რომ იცით, მე არ ვიცი და არცოდნა ხომ არცოდვააო. დღევანდელი მოარული ნათქვამი, რომ არცოდნა არცოდვაა, ვფიქრობ ყველაზე დიდი ცოდვა სწორედაც რომ არცოდნაა. როგორ შეიძლება 21-ე საუკუნის ქრისტიანმა თქვას, რომ არცოდნა არცოდვააო. თუმცა სხვა თემები, მაგალითად "მადრიდის რეალი" რამდენჯერ შეხვდა "ბარსელონას", რამდენჯერ მოუგო და ა.შ., ეს კარგად ვიცით. მაგრამ რომ კითხო, რამდენი მოციქული ჰყავდა ქრისტეს, რომელ საუკუნეში შემოვიდა ანდრია მოციქული ან ნინო ქართველთა განმანათლებელი, შეიძლება ვერ გიპასუხონ. არ მინდა ვინმეს რამე ეწყინოს, მე თვითონ ბევრი რამე არ ვიცი და ვსწავლობ, რომ მრევლს ვასწავლო. ასეთი გამოთქმა არსებობს - ვსწავლობ, რათა ვასწავლო, ვისაც სწავლა არ სჭირდება, ის სამწუხაროდ, უმეცარი ადამიანია. ერთადერთი არსება, ვისაც ცოდნის მიღება არ სჭირდება, ღმერთია, დანარჩენი კი - ანგელოზებიც, წმინდანებიც და ყველა ქმნილება განისწავლება.

- რამდენჯერ უნდა იკურთხოს სახლი?

- პატრიარქის კურთხევით ერთხელ არის აუცილებელი, ორჯერაც შეიძლება, მაგრამ ისე არა, რომ დიდი წვეულება მაქვს და ბარემ სახლსაც ვაკურთხებ. სახლის კურთხევის დროს სასურველია იყვნენ ძალიან ახლობლები და რა თქმა უნდა, ოჯახის წევრები. მათ უნდა მოუსმინონ მამაოს, რას ეტყვის, რას დაარიგებს და კარგი იქნება ეს ყველაფერი შეასრულონ, ხოლო თუ არ შეასრულეს, სახლის კურთხევას მაგიური დანიშნულება ექნება.

- ადამიანები ავტომობილსა და სამსახურსაც აკურთხებენ, ეს რამდენად სწორია?

- რა თქმა უნდა, მისაღებია. როცა მოძღვარმა ავტომობილი გვიკურთხა, გაგვაფრთხილა, რომ დავემორჩილოთ საგზაო წესებს, არ ვმართოთ მანქანა ნასვამ მდგომარეობაში, სწრაფად არ ვიაროთ, თუ ამის საპირისპიროდ მოვიქცევით, მაშინ ღმერთი ვერ კი არა, აღარ დაგვიცავს იმიტომ, რომ ამ ყველაფერს ჩვენი უგუნურობით ვაკეთებთ. თუ გონივრულად მოიქცევი, ბუნებრივია, საფრთხეც აღარ შეგემთხვევა. ბევრი შემთხვევა ყოფილა, რომ ღმერთს ადამიანი ამ დგომარეობაშიც გადაურჩენია, მაგრამ ჩვენ მაგის იმედი არ უნდა გვქონდეს. მიდგომა - რადგან მანქანა ვაკურთხე და როგორც მინდა ისე ვმართავ, მიუღებელია. კურთხევა ნიშნავს წესრიგს, გონების გახსნას, მორჩილებას. სამსახური იკურთხა? კეთილი უნდა ინებოს უფროსმა და უფრო თავმდაბალი და ხელქვეითების მიმართ მოსიყვარულე გახდეს, მან არ უნდა იფიქროს, რომ მათი უფროსია და ყველაფრის უფლება აქვს. უფროსად დაადგინა ღმერთმა, რომ ემსახუროს თავის ხელქვეითებს, როგორც მოძღვარი თავის მრევლს ემსახურება.

სამწუხაროდ საწყენია, როცა ხედავ, რომ ოჯახი, ორგანიზაცია ან ავტომობილი ნაკურთხია, მაგრამ ისეთი ხალხი მუშაობს და გადაადგილდება, რომ მერე ეს ნაკლებად მორწმუნე ადამიანებში განკითხვას იწვევს. როცა გარედან დაწესებულება იქნება, სამინისტრო თუ თუნდაც ადამიანი, ლამაზად გეჩვენება, შიგნით შეხვალ და არის ჭორაობა, განკითხვა, ჩხუბი, დაბეზღება - ეს ყველაფერი უნდა გამოვასწოროთ. აღარ ვიჭორაოთ, გავლანძღოთ ვინმე, უნდა გამოვასწოროთ ჩვენი თავი, ოჯახი, ამით ჩვენი ქვეყანაც გამოსწორდება და ყველაფერი კარგად იქნება.

თაკო ესებუა

AMBEBI.GE

ფოტოზე გამოყენებულია სქრინები დეკანოზ გიორგი სხირტლაძის Youtube-არხიდან (დეკანოზი გიორგი სხირტლაძე - სახლის კურთხევა) და PIA-ს Youtube-არხიდან (მანქანის კურთხევა)