თუ ჩვენ ვერ შევქმნით სახელმწიფოს, სადაც განსხვავებული ტიპის ადამიანები თავს დაცულად იგრძნობენ, შევარყევთ თვითონ სახელმწიფოს ფუნდამენტს და მდგრადობას, - ამის შესახებ საქართველოს პრეზიდენტმა გიორგი მარგველაშვილმა სასტუმრო "ქორთიარდ მარიოტში" სახალხო დამცველის აპარატის მიერ ორგანიზებულ ადამიანის უფლებათა დაცვის საკითხებზე გამართული დებატების დროს განაცხადა.
საქართველოს პრეზიდენტმა განსხვავებული ორიენტაციის ადამიანების შესახებაც ისაუბრა.
"შემაშფოთებელია აგრესია განსახვავებული სქესის, განსხვავებული რელიგიის წარმომადგენლის ან განსხვავებული ეთნიკური წარმოშობის ადამიანების მიმართ. ეს სახელმწიფოებრივად ძალიან საშიშია საქართველოსნაირი ქვეყნისთვის, არა მარტო ადამიანის უფლებების დაცვის ლოგიკიდან, ღირებულებებიდან გამომდინარე, არამედ სახელმწიფოს უსაფრთხოების, მდგრადობის ინტერესებიდან გამომდინარე.
ასეთი შემთხვევები უნდა იყოს განხილული სერიოზულად. ასეთი შემთხვევები უნდა იყოს განხილული სერიოზულად. ჩვენ ვართ მრავალრელიგიური საზოგადოება, რომელიც ახლა არ ჩამოვყალიბებულვართ ასეთად", - განაცხადა საქართველოს პრეზიდენტმა.
მისივე განცხადებით, იდეოლოგია, რომელიც უკავშირდება განსხვავებულების მიმართ დამოკიდებულებას, არის შემაშფოთებელი.
"თუ ჩვენ ვერ შევქმნით სახელმწიფოს, სადაც განსხვავებული ადამიანები თავს იგრძნობენ დაცულად, შევარყევთ თვითონ სახელმწიფოს ფუნდამენტს და მდგრადობას. აუცილებლად მიმაჩნია, რომ ამ საკითხებს მიმართ იყოს საგანგებო ყურადღება, ეს საკითხები სერიოზულად უნდა იყოს განხილული", - განაცხადა გიორგი მარგველაშვილმა.
თუ დაინტერესებული ხართ მხოლოდ პოლიტიკური თემებით და არ გსურთ, მიიღოთ სხვა, თქვენთვის უინტერესო ინფორმაცია, მოიწონეთ გვერდი, რომელზეც მხოლოდ უმნიშვნელოვანესი პოლიტიკური სიახლეები თავსდება.