19
ივნისიდღის ზოგადი ასტროლოგიური პროგნოზი
მეფე ირაკლი ჩარკვიანის უფროსი ვაჟი მაქსიმე ჩარკვიანი საქართველოში არ ცხოვრობს, თუმცა ქართველ გოგონებში განსაკუთრებული პოპულარობით სარგებლობს. 27 წლის მაქსიმე თბილისში იშვიათად ახერხებს ჩამოსვლას. რას საქმიანობს და რა ურთიერთობა აქვს მამის ოჯახთან, ამას Ambebi.ge-ს მკითხველს თავად უამბობს.
- ოცი წელია, მოსკოვში ვცხოვრობ. ბოლო დროს ვწერ სცენარებს, ზოგჯერ რეჟისორობაც მიწევს, ვმუშაობ კლიპებზე და რეკლამებზე.
- ხშირად ჩამოდიხართ საქართველოში?
- თბილისში წელიწადში ერთხელ ჩამოვდივარ, ზოგჯერ უფრო ხშირად. გააჩნია, თავისუფალი დრო როგორ მაქვს.
- როგორი ურთიერთობა გაქვთ ბაბუასთან, უმცროს დასთან ნანასთან და ქეთათოსთან?
- არაჩვეულებრივი ურთიერთობა მაქვს ჩემს ქართულ ოჯახთან. სხვანაირად ვერც იქნება, ეს წარმოუდგენელია, თვეობით ვერ ვნახულობ მათ.
- ქეთათოს ახალ პროექტებს თუ ეცნობით, რა რჩევებს აძლევთ ერთმანეთს?
- ვიცი, თავად მიყვება მისი საქმიანობის შესახებ, სხვანაირად რუსეთში ვერც გავიგებ. რჩევებს რაც შეეხება, მე არ მიყვარს რჩევის მიცემა, მაშინაც კი, როცა ჩემი აზრი აინტერესებთ.
- წარმოუდგენელია ირაკლი ჩარკვიანის შვილი მუსიკის გარეშე, თავად წერთ სიმღერას?
- მუსიკის მიმართ გავცივდი. დიდ დროს მხოლოდ გადაღებებს ვუთმობ.
- მამასთან როგორი ურთიერთობა გქონდათ, მკაცრი იყო მეფე?
- მამასთან არაჩვეულებრივი ურთიერთობა მქონდა, ძალიან კარგი, მეგობრული, მაგრამ ამავე დროს მკაცრი მამა იყო. დიალოგით მიხსნიდა, მზრდიდა, როგორ ადამიანად უნდა ჩამოვყალიბებულიყავი.
- რამდენი წლის იყავით, როცა დედასთან ერთად მარტო მოგიწიათ ცხოვრება, როგორ გადაიტანეთ მამის გარეშე ცხოვრება ბავშვობაში?
- 7 წლის ვიყავი, როცა დედასთან ერთად მოსკოვში წავედი საცხოვრებლად. ვერც მივხვდი რა მოხდა, არაფერი განმიცდია მტკივნეულად, მთელი ოჯახის ძალისხმევით მშვიდად და წყნარად მოხდა ყველაფერი, რისთვისაც ყველას მადლობელი ვარ.
- ვისგან შეიტყვეთ მამის გარდაცვალების შესახებ?
- მოულოდნელი იყო ჩემთვის მამას გარდაცვალება. მახსოვს, სამსახურიდან დავბრუნდი, დედამ სამზარეულოში გამიყვანა და მითხრა, მამა დაიღუპაო. შემდეგ ყველაფერი ისე იყო, როგორც სიზმარში: ტაქსი, აეროპორტი, თვითმფრინავი, თბილისი, დაკრძალვა, ტაქსი, აეროპორტი და მოსკოვი... 6 თვის შემდეგ მივხვდი რეალურად, რა მოხდა. მივხვდი, რომ მე ნამდვილი მეგობარი დავკარგე.
- რა შეგრძნებაა, იყო ირაკლი ჩარკვიანის შვილი, დამატებით პასუხისმგებლობას გრძნობთ თუ...
- სიმართლე გითხრათ, მე სხვა ქვეყანაში და სხვა სამყაროში ვცხოვრობ და ვერაფერს ვიტყვი. ვფიქრობ, ნებისმიერი შვილისთვის მნიშვნელოვანია, მამამ იამაყოს მისით. იმედი მაქვს, ირაკლი, სადაც არის, თვალს მიკრავს იქედან და ამაყობს ჩემით.
- საქართველოში ძალიან დიდი ინტერესია თქვენს მიმართ, გყავთ თუ არა რჩეული და ვინ არის?
- არა, ახლა საკუთარი თავით ვარ დაკავებული. იყო გრძელვადიანი ურთიერთობები და ისინი დამთავრდა, ახლა მინდა წყნარად ვაკეთო ჩემი საქმე.
ნახეთ| ფოტოები მაქსიმე ჩარკვიანის პირადი ალბომიდან
თამარ ბოჭორიშვილი
AMBEBI.GE
