უგულავას, სანდრა რულოვსის, მერაბიშვილისა და ბოკერიას სამთავრობო აგარაკები, რომლებიც თვეში 7500 ლარად ქირავდება - რეპორტაჟი წყნეთიდან

ჟურნალისტებს დღეს ეკონომიკისა და მდგრადი განვითარების სამინისტროს წარმომადგენლებმა წყნეთის სამთავრობო აგარაკების დათვალიერების საშუალება მოგვცეს. აგარაკები წყნეთში ერთ-ერთ ყველაზე გამწვანებულ და გამორჩეულ ადგილას არის განთავსებული. წყნეთის სამთავრობო აგარაკებზე ბევრი ფეშენებელური და კარგად გარემონტებული კოტეჯია, სადაც, როგორც იქ მომუშავეებმა განგვიცხადეს, მიხეილ სააკაშვილის მთავრობის მაღალჩინოსნები ცხოვრობდნენ. "ნაციონალური მოძრაობის" მმართველობის დროსვე აშენდა წყნეთში 6 ახალი კოტეჯი. ამასთან, დაწყებულია პრემიერ-მინისტრის აგარაკის მშენებლობაც, რომელიც ხელისუფლების შეცვლის შემდეგ შეჩერებულია.

წყნეთის აგარაკებში ასულებს იქ დამსვენებლები დაგვხვდნენ. როგორც ტერიტორიის ზედამხედველმა განგვიცხადა, 2013 წლიდან სახელმწიფოსგან აგარაკების გაქირავების ნებართვა მიიღეს. აქ მომუშავეები გვიყვებიან, რომ ყველაზე იაფფასიანი კოტეჯის ქირაობა თვეში 2500 ლარი ღირს, ყველაზე ძვირადღირებული კი პარლამენტის ყოფილი თავმჯდომარის დავით ბაქრაძის აგარაკია, რომელის ქირაობაც თვეში 7500 ლარად არის შესაძლებელი. დავით ბაქრაძის აგარაკი 6 საძინებლი ოთახისგან შედგება, ყველა საძინებელს თავისი აბაზანა აქვს, არის ჯაკუზიც. ამასთან, აქვს დიდი მისაღები და სამზარეულო. აგარაკზე, რომელიც მიხეილ სააკაშვილის ხელისუფლებაში მოსვლის დროს დავით ბაქრაძის გემოვნებით გარემონტდა, მანამდე პარლამენტის სხვა თავმჯდომარეები ცხოვრობდნენ (იხილეთ ვიდეო)

ერთ-ერთი ყველაზე გამორჩეულია თბილისის ყოფილი მერის გიგი უგულავას აგარაკიც, რომელსაც ულამაზესი ეზო და ბუხარი აქვს. გიგი უგულავას აგარაკის დაქირავება 6000 ლარი ღირს (იხილეთ ვიდეო)

ჟურნალისტებმა, ჩვენი დიდი ინტერესის მიუხედავად, ვერ შევძელით იმ აგარაკის დათვალიერება, სადაც ვანო მერაბიშვილი და სანდრა რულოვსი ცხოვრობდნენ, რადგან ორივე კოტეჯი გაქირავებული იყო. თუმცა შენობის გარედან დათვალიერებისას თვალში მოგხვდებოდათ კოტეჯებთან მდგომი პატარა შენობები, რომლებშიც დაცვის წევრები ცხოვრობდნენ.

ვერ შევძელით ნინო ბურჯანაძის ყოფილი აგარაკის დათვალიერებაც, რომელიც თავის დროზე პარლამენტის ყოფილმა თავმჯდომარემ სიმბოლურ ფასად, ერთ ლარად შეიძინა. იქ მუსიკალური სკოლა ფუნქციონირებს, რომელიც მერიის დაქვემდებარებაშია. შენობის შიგნიდან დათვალიერების საშუალება კი არ მოგვეცა.

როგორც ადგილზე მომუშავეებმა განაცხადეს, მაღაჩინოსნების გარდა, წყნეთის აგარაკებით რიგითი დეპუტატებიც სარგებლობდნენ. ჩვენ ვნახეთ კოტეჯი, სადაც კობა სუბელიანი ოჯახთან ერთად ისვენებდა. ის შედარებით მოკრძალებული და ნაკლებად კომფორტული იყო. ასევე მოკრძალებული იყო აგარაკი, რომელშიც გიგა ბოკერია ისვენებდა, თუმცა როგორც ამბობენ, იგი წყნეთში იშვიათად ადიოდა.

გარდა ამისა, წყნეთის აგარაკებზე არის დახურული აუზები და სპორტული მოედანი. იქ დასვენებისა და ცხოვრების მსურველებს ყველა პირობა აქვთ იმისთვის, რომ თავი თბილისთან ახლოს, სუფთა ჰაერზე, კომფორტულად იგრძნონ.

როგორც ტერიტორიის ზედამხედველმა დავით დარახველიძემ განგვიცხადა, "ქართული ოცნების" ხელისუფლებაში მოსვლის შემდეგ სამთავრობო აგარაკით არცერთ მაღალჩინოსანს არ უსარგებლია.

ოთარ ავაზაშვილმა, რომელიც უკვე 45 წელია წყნეთის სამთავრობო აგარაკების მოვლა-პატრონობაზე ზრუნავს, ტერიტორიის ისტორია გვიამბო. იგი ამბობს, რომ აგარაკები ჯერ კიდევ სტალინის დროს აშენდა და მას შემდეგ იქ მთავრობის წარმომადგენლები ცხოვრობდნენ. მისი თქმით, ოჯახთან ერთად ცხოვრობდა აგარაკზე ცეკას ყოფილი მდივანი კანდიდ ჩარკვიანი. კოტეჟებით ასევე სარგებლობდნენ იმდროინდელი მთავრობის წევრები.

"ძველად ტერიტორია ზონებად იყო დაყოფილი, იყო მინისტრების ზონა, იყო ცენტრალური კომიტეტის ზონა, სადაც ისვენებდნენ საქალაქო კომიტეტის მდივნები. წლების წინ სიძველის გამო ერთი შენობის დამონტაჟი მოხდა, რომელშიც ისვენებდა საქართველოს პირველი პრეზიდენტი ზვიად გამსახურდია. როდესაც მიხეილ სააკაშვილი მოვიდა ხელისუფლებაში, მისი მთავრობის წევრები ისვენებდნენ", - განაცხადა ოთარ ავაზაშვილმა.

სამთავრობო აგარაკების მიწის საერთო ფართობი 100 475 კვ.მ. შეადგენს. სამთავრობო კომპლექსი 21 კოტეჯისგან შედგება. შენობა-ნაგებობების საერთო ფართი კი 8041.8 კვ.მ-ია.

"ქართული ოცნების" მთავრობის წევრებმა წყნეთის სამთავრობო აგარაკებიდან ორი გააჩუქა, ერთში ზვიად გამსახურდიას ქვრივი მანანა არჩვაძე-გამსახურდია ცხოვრობს, მეორე კი გარდაცვლილი პრემიერ-მინისტრის ზურაბ ჟვანიას ოჯახს გადასცეს.

ეკონომიკისა და მდგრადი განვითარების სამინისტროს სსიპ "სახელმწიფო ქონების ეროვნულმა სააგენტომ" წყნეთის სამთავრობო აგარაკები საპტივატიზაციო ობიექტთა ნუსხაში შეიტანა. ეკონომიკის მინისტრმა განაცხადა, რომ წყნეთის სამთავრობო აგარაკების ტერიტორია მომავალში საზოგადოებრივი დანიშნულების ადგილად უნდა გამოიყენონ და უნდა მოხდეს დასასვენებელი კომპლექსის მოწყობა.

როგორც წყნეთის სამთავრობო აგარაკებზე მომუშავენი აცხადებენ, ტერიტორიის სანახავად ბევრი უცხოელი მოდის. მათივე ინფორმაციით, გასულ კვირას ტერიტორიას არაბი ინვესტორები სტუმრობდნენ. ადამიანები, რომლებიც წლებია წყნეთის სამთავრობო აგარაკების მოვლა-პატრონობაზე ზრუნავენ, იმედოვნებენ, რომ ახალი მეპატრონის მოსვლის შემდეგ სამსახურებს შეინარჩუნებენ და ადგილი, რომელსაც უკვე ისტორიული მნიშვნელობა აქვს, არ განადგურდება.

თეა ბითაძე

AMBEBI.GE