კოლუმბიაში ჩამოწოლილი მეწყერის შედეგად 52 ადამიანი დაიღუპა

კოლუმბიის ჩრდილოდასავლეთ რეგიონში ჩამოწოლილი მეწყერის შედეგად 52 ადამიანი დაიღუპა, ათობით კი დაშავდა. მეწყერის ჩამოწოლა ძლიერმა გადაუღებელმა წვიმამ გამოიწვია. "დოიჩე ველეს" ცნობით, სტიქიამ ყველაზე მეტად სალგარის მუნიციპალიტეტი დააზარალა. მეწყერი მაშინ ჩამოწვა, როდესაც ყველას ეძინა.

ამ დროისათვის შემთხვევის ადგილზე სამაშველო სამუშაოები მიმდინარეობს. სტიქიის ზონაში გუშინ ქვეყნის პრეზიდენტი ხუან მანუელ სანტოსი ჩავიდა და ადგილობრივებს შევხდა. "სამწუხაროდ ჩვენ არ ვიცით იმ ადამიანების ზუსტი რაოდენობა, რომლებიც ნანგრევებშია მოყოლილი", - განაცხადა პრეზიდენტმა.

კოლუმბიის მთიან რეგიონებში უხვი ნალექის შედეგად მეწყერის შემთხვევები ხშირია. 2010-2011 წლებში მეწყერს და წყალდიდობას 1 300-ზე მეტი ადამიანი შეეწირა, 100 000-ზე მეტი სახლი კი განადგურდა.

"ინტერპრესნიუსი"