პორტუგალიის ნაკრები სომხეთთან მატჩისთვის თბილისში მოემზადება

8 ივნისს თბილისს პორტუგალიის ნაკრები ესტუმრება. საქართველოს ფეხბურთის ფედერაციის ინფორმაციით, გუნდი საქართველოში 12 ივნისამდე დარჩება და სომხეთის ნაკრებთან 13 ივნისის მატჩისთვის "მიხეილ მესხზე" მოემზადება.

მსოფლიო ფეხბურთის ვარსკვლავი კრიშტიანუ რონალდუ და მისი ნაკრები ოთხი დღის განმავლობაში თბილისში ივარჯიშებენ, 12-ში კი პორტუგალიის ეროვნული გუნდი ერევანში გადაფრინდება, სადაც მეორე დღეს ევროპის 2016 წლის ჩემპიონატის შესარჩევ მატჩს სომხებთან ითამაშებს. პორტუგალიის ფეხბურთის ფედერაციის ტექნიკური პერსონალი ერევანს რამდენიმე თვის წინ რამდენჯერმე სტუმრობდა. ისინი, თავიანთი ეროვნული გუნდისთვის შესაფერის სასტუმროსა და სავარჯიშო მოედნებს არჩევდნენ.

"იქაური პირობებით იმედგაცრუებულნი რომ დარჩნენ, მარტში უკვე თბილისში გამოემგზავრნენ. სტუმრები თბილისის სასტუმროებს, მოედნებსა და სხვა საფეხბურთო ინფრასტრუქტურას ორი დღის განმავლობაში ათვალიერებდნენ. შემდეგ შინ გაემგზავრნენ და მალევე საქართველოს ფეხბურთის ფედერაციას ოფიციალურად დაუდასტურეს სურვილი, რომ 8-დან 12 ივნისამდე თბილისში ყოფნა და "მიხეილ მესხზე" ვარჯიში სურთ.

პორტუგალიის ფეხბურთის ფედერაციის საკმაოდ მრავალრიცხოვანი დელეგაცია მარტში გვსტუმრობდა და, ფაქტობრივად, მაშინვე გადაწყდა, რომ მათი ეროვნული გუნდი სომხეთთან შესარჩევი მატჩისთვის 8-დან 12 ივნისამდე თბილისში მოემზადება. სტუმრებმა თბილისში სასტუმროები და სავარჯიშო მოედნები დაათვალიერეს, სხვა საფეხბურთო ინფრასტრუქტურითაც კმაყოფილები დარჩნენ და საბოლოო შეთანხმებაც შედგა", - განაცხადა საქართველოს ფეხბურთის ფედერაციის პრეზიდენტმა ზვიად სიჭინავამ.

პორტუგალიის ნაკრები ევროპის ჩემპიონატის შესარჩევ ჯგუფში დანიასთან, ალბანეთთან, სერბეთთან და სომხეთთან ერთადაა. პორტუგალიის ეროვნულ გუნდამდე კი თბილისს ორ კვირაში ამავე ქვეყნის 19-წლამდელთა ნაკრები ეწვევა, რომელიც ესპანეთთან, თურქეთთან და საქართველოსთან ერთად იმავე "მიხეილ მესხის" ორ მოედანზე ევროპის ჩემპიონატის ელიტრაუნდში მიიღებს მონაწილეობას.

"ინტერპრესნიუსი"