"საზოგადოება ახალი პოლიტიკური ძალის მოლოდინშია... რეიტინგი პოლიტიკური პარტიების მიმართ იმედგაცრუების გამოხატულებაა"
პოლიტოლოგ ხათუნა ლაგაზიძის შეფასებით, NDI-ის მიერ გამოქვეყნებული პარტიების რეიტინგი პირდაპირი გამოხატულებაა იმედგაცრუების, რომელიც საზოგადოებას არა მარტო მმართველი, არამედ ოპოზიციური პარტიების მიმართაც აქვს.
როგორც ლაგაზიძემ "ინტერპრესნიუსს" განუცხადა, დღეს გასაჯაროებული კვლევის შედეგები კიდევ რამდენიმე ფაქტორზე მიანიშნებს, მათ შორის იმაზე, რომ საზოგადოება ახალი პოლიტიკური ძალის მოლოდინშია და იმის შესახებაც, რომ მომავალ არჩევნებზე მრავალპარტიულ პარლამენტსა და კოალიციურ მთავრობას მივიღებთ. პოლიტოლოგის შეფასებით, პარტიების რეიტინგი დესტაბილიზაციის გარკვეულ საფრთხეზეც მეტყველებს იმ კონტექსტში, რომ გამოკითხულთა 45 %-მა ან არ იცის, რომელ პარტიას დაუჭერს მხარს საპარლამენტო არჩევნებზე, ან პასუხზე უარს აცხადებს, ან არც ერთი ძალის მხარდაჭერას არ აპირებს.
"ეს არის პირდაპირი გამოხატულება იმედგაცრუების, რომელიც საზოგადოებას აქვს არა მარტო მმართველი, არამედ ოპოზიციური პარტიების მიმართაც. შესაბამისად, ეს მაჩვენებლები დამაფიქრებელია ყველასთვის და უპირველესად ხელისუფლებისთვის, რადგან მისი რეიტინგის ასეთი მკვეთრი ვარდნა – ყოველ შემთხვევაში, ოფიციალურად გამოქვეყნებული შედეგების დონეზე, ჩვენ დღემდე არ გვინახავს. გასაგებია, რომ ეს უპირველესად ლარის კურსს უკავშირდება, მაგრამ არა მარტო ამ მიმართულებით აქვს ხელისუფლებას ჩავარდნა.
შედეგები ასევე დამაფიქრებელია ოპოზიციისთვისაც, თუმცა, მეორე მხრივ, ეს არის ძალიან მნიშვნელოვანი ფორა როგორც ნებისმიერი ახალი პოლიტიკური ძალის, ისევე უკვე არსებულისთვის, თუმცა მეორე საკითხია ის, დარჩენილ წელიწადნახევარში როგორ გადანაწილდება პოლიტიკურ ძალებზე გამოკითხულთა ის 45 %, რომელმაც ახლა არ იცის, რომელ პარტიას მისცემს ხმას საპარლამენტო არჩევნებზე, პასუხზე უარს აცხადებს ან ამბობს, რომ მხარს არც ერთს არ დაუჭერს. ეს დამოკიდებულია ბევრ ფაქტორზე. კერძოდ, თუ ხელისუფლებაზე ვსაუბრობთ, ამ შემთხვევაში ეს დამოკიდებულია იმაზე, რამდენად შეძლებს ის რადიკალური ცვლილებების გატარებას. თუ ოპოზიციაზე ვსაუბრობთ, დამოკიდებულია იმაზე, საზოგადოებისთვის რამდენად გასაგები პიარი ექნება.
რაც მთავარია, გამოქვეყნებული რეიტინგები არის იმის ნიშანი, რომ საზოგადოება სიახლის, ახალი პოლიტიკური ძალის მოლოდინშია, ამიტომ ახალი და პერსპექტიული სახეების მობილიზებისთვის ახლა ძალიან კარგი მოცემულობაა.
ამავდროულად, დაფიქსირებული 45% შეიცავს დესტაბილიზაციის გარკვეულ რისკს იმის გათვალისწინებით, რომ ამდენი ადამიანი ვერ პოულობს თავისი ხმის და თავისი ინტერესების დაცვის საშუალებას პოლიტიკურ პარტიებში. ეს, თავისთავად, ნიშნავს იმას, რომ საზოგადოებაში დესტაბილიზაციის და უკმაყოფილების მუხტი ძალიან მაღალია.
გარდა ამისა, პარტიების რეიტინგებთან მიმართებაში NDI-ის მიერ ჩატარებული კვლევის შედეგები კიდევ ერთ რამეს გვიჩვენებს. კერძოდ იმას, რომ მომავალი საპარლამენტო არჩევნების შედეგად (რადგან მეტ-ნაკლებად სუსტია ყველა პარტია) უნდა მივიღოთ მრავალპარტიული პარლამენტი და კოალიციური მთავრობა.
ვფიქრობ, რომ მომავალ არჩევნებზე მთავარი მიღწევა სწორედ ეს იქნება. შესაბამისად, ალბათ, ძალიან დიდი ბრძოლა წავა პრორუსულ და პროდასავლურ ძალებს შორის იმასთან დაკავშირებით, თუ ვინ იქნება კოალიციის ღერძი და შემადგენელი სუბიექტები", - განაცხადა ხათუნა ლაგაზიძემ.
მისივე განმარტებით, სრული სურათის დასახატად იმასთან დაკავშირებით, მომავალ პარლამენტში შევლენ პრორუსული თუ პროდასავლური ორიენტაციის სუბიექტები, საჭიროა ცნობილი გახდეს მონაცემები იმის შესახებაც, როგორ ნაწილდება, ერთი მხრივ, ევრაზიულ კავშირში და, მეორე მხრივ, ნატოში გაწევრიანების მომხრეები პარტიების მიხედვით.
"ეს არის ძალიან საინტერესო, რადგან კონტექსტიდან ამოგლეჯილი ერთი ციფრი არაფრის მომცემი არ არის. ქვეყნის მომავლისთვის გადამწყვეტი იქნება ის, თუ რა სუბიექტები შევლენ მრავალპარტიულ პარლამენტში - უპირატესად პრორუსული, უპირატესად პროდასავლური, ცენტრისტული თუ ა.შ. იმისთვის, რომ გავიგოთ როგორ ნაწილდება ამომრჩევლის სიმპათიები, არა მარტო პარტიების რეიტინგი უნდა ვიცოდეთ, არამედ ძალიან მნიშვნელოვანია სწორედ ევრაზიულ კავშირსა და ევროსტრუქტურებში გაწევრიანების მომხრეთა რეიტინგის პარტიული ჩაშლა – ანუ 31 %-ში, ვინც ევრაზიულ კავშირში შესვლას ემხრობა, რომელი პარტიების ამომრჩევლები შედიან. პარტიებში უნდა ჩაიშალოს ევროკავშირსა და ნატოში გაწევრიანების მომხრეთა პროცენტული მაჩვენებელიც. მეტ-ნაკლებად თვალსაჩინო სურათი, თუ როგორი შეიძლება იყოს მომავალი სამთავრობო კოალიცია, სწორედ ამის შემდეგ გვექნება", - აღნიშნა პოლიტოლოგმა.
NDI-ის გამოკითხულთა უმეტესობამ არ იცის, ხვალ რომ საპარლამენტო არჩევნები ტარდებოდეს, რომელ პარტიას მისცემდა ხმას. კითხვაზე, ხვალ რომ საპარლამენტო არჩევნები იმართებოდეს , რომელ პარტიას მისცემდით ხმას, კატეგორია "არ ვიცი" აირჩია გამოკითხულთა 27%-მა, ამის შემდეგ მოდის კოალიცია "ქართული ოცნება 24%-ით, "ერთიანი ნაციონალური მოძრაობა" - 16%. კითხვაზე პასუხზე უარი განაცხადა 12%-მა, არც ერთ პარტიას არ მისცემდა ხმას 6%, რესპონდენტთა 5% მხარს დაუჭერდა "თავისუფალ დემოკრატებს", 4% - "პატრიორტთა ალიანსს", 3% - კი "ლეიბორისტულ პარტიას". რაც შეეხება დანარჩენ 3%-ს - ის მოდის კატეგორიაზე "სხვა".
რაც შეეხება შეკითხვას, "ხვალ რომ საპარლამენტო არჩევნები ტარდებოდეს, მიიღებდით თუ არა მონაწილეობას", გამოკითხულთა 56 პროცენტი არჩევნებზე წავიდოდა, 44 კი - მონაწილეობას არ მიიღებდა.
ამასთან, კვლევების მიხედვით, კითხვაზე - ხვალ რომ საპარლამენტო არჩევნები ტარდებოდეს, რომელ პარტიას მისცემდით ხმას, პასუხებმა - "არ ვიცი", "უარი პასუხზე" და "არც ერთ პარტიას", ჯამში 45 პროცენტი შეადგინა.
ნახეთ| NDI-ს განაჩენი: კვლევის ყველაზე საყურადღებო მაჩვენებლები
NDI-ის კვლევის საველე სამუშაოები 27 მარტი - 19 აპრილის პერიოდში, საქართველოს მასშტაბით 4360 პირისპირ ინტერვიუს წარმომადგელობითი შერჩევის საფუძველზე ჩატარდა.
სიახლე!თუ დაინტერესებული ხართ მხოლოდ პოლიტიკური თემებით და არ გსურთ, მიიღოთ სხვა, თქვენთვის უინტერესო ინფორმაცია, მოიწონეთ გვერდი, რომელზეც მხოლოდ უმნიშვნელოვანესი პოლიტიკური სიახლეები თავსდება.
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
უკრაინის პროკურატურამ მიხეილ სააკაშვილის მიმართვაზე საქმე აღძრა
