რატომ არ ქორწინდებიან საქართველოში მაისის თვეში - დეკანოზი და ასტროლოგი დამკვიდრებულ ცრურწმენაზე

წყვილების უმეტესობა მაისის თვეში ქორწინებისგან თავს იკავებს. ამ თვეში ისინი არც ჯვარს იწერენ და არც ხელს აწერენ. გავრცელებული აზრის თანახმად, თუ მაისში იქორწინებ, მთელი ცხოვრება უბედური იქნები, თუმცა ამ მოსაზრებას ცრურწმენას უწოდებს ეკლესია და წყვილებს ჯვარს მაისში სიამოვნებით წერს.

როგორც Ambebi.ge-ს დეკანოზმა გიორგი თევდორაშვილმა უთხრა, მაისის თვეში ჯვარს ერთეული წყვილები იწერენ. მისი თქმით, მაისში ქორწინებაზე უარის თქმა ცრურწმენაა, რომელიც რუსული ანდაზის საშუალებით გავრცელდა და რატომღაც წყვილებს ამის სჯერათ.

"რუსული ანდაზაა ასეთი, რომ ვინც მაისში დაქორწინდება, მთელი ცხოვრება წუხილში იქნებაო და სწორედ აქედან მოდის ეს მოსაზრება, ეკლესიასთან კავშირი არ აქვს. ძალიან სამწუხაროა, რომ მაისის თვეში ჯვარს ერთეულები იწერენ, თვით მართმადიდებლებიც კი. იციან, რომ ეს ცრურწმენაა, მაგრამ მაისში დაქორწინების მაინც ეშინიათ. სამწუხაროდ, ეს ცრურწმენაა და ძალიან ცუდია.

ეკლესია წყვილებს მაისში სიხარულით დაწერს ჯვარს, ჩვენ მხოლოდ მარხვაში არ ვწერთ ჯვარს, თორემ სხვა დროს ყოველთვის შეიძლება. მთავარია, ერთმანეთი უყვარდეთ. სამწუხაროდ, რა ევალებათ, იმას არ კითხულობენ და ყურადღებას იმას აქცევენ, რომ მაისში არ დაქორწინდნენ. არადა მთავარი ის არის, თუ როგორ ხდება ჯვრისწერა და როგორ უნდა ხდებოდეს, რა ევალება მამაკაცს, დედაკაცს, რატომ ადგამენ გვირგვინებს თავზე და ა.შ.", - ამბობს დეკანოზი გიორგი თევდორაშვილი.

მიხეილ ცაგარელის თქმით, მაისის პირველი ნახევარი ქორწინებისთვის ერთ-ერთი საუკეთესო პერიოდია მათთვის, ვინც ქორწინების დაგეგმვისას ასტროლოგიურ ფაქტორებს ითვალისწინებს.

"მაისში რომ არ ქორწინდებიან, არის მცდარი აზრიც და სწორიც, იმიტომ, რომ ოცი მაისის შემდგომ პერიოდი ქორწინებისთვის კარგი არ არის, რადგან მზე გადადის ტყუპების ზოდიაქოში, ტყუპების გაორებული ხასიათი კი სასიყვარულო ურთიერთობებს აფუჭებს. 20 მაისამდე კი ერთ-ერთი ყველაზე საუკეთესო პერიოდია ქორწინებისთვის, რომელიც აბსოლუტურად ჯდება, იმიტომ, რომ ამ პერიოდში ძალიან ცოტა ქორწინდება და ეს დიდი დანაშაულია. ეს არის პერიოდი, როცა მზე გადის კურო ზოდიაქოს ზონაში და მართავს სიყვარულისა და ერთგულების მმართველი პლანეტა ვენერა, ამიტომ მაისი 20 რიცხვამდე სასიყვარულო-საქორწინო ურთიერთობებისთვის საუკეთესოა.

ოცი მაისის მერე, კი ბატონო, ამ პერიოდში წყვილებს მაინცდამაინც არ ვურჩევ დაქორწინებას, იმიტომ, რომ ტყუპები და სიყვარული საერთოდ ვის გაუგია, ეს ცა და დედამიწაა, მაისის ოცამდე კი გადასარევი პერიოდია. რაც შეეხება ივნისს, 20-23 ივნისამდე ტყუპების ზონაა, რა თქმა უნდა ქორწინება შეიძლება, მაგრამ მე მაგალითად მიმაჩნია, რომ თუ საქმე არჩევანზე მიდგა, ქორწინებისთვის ოც მაისამდე გაცილებით უკეთესი პერიოდია, ვიდრე 20 მაისიდან 20 ივნისამდე", - ამბობს ცაგარელი.

თაკო ესებუა

AMBEBI.GE