31
მარტიდღის ზოგადი ასტროლოგიური პროგნოზი
ნინო ჯაჯანიძე 29 წლის არის, პროფესიით ჟურნალიტია, როგორც ამბობს, ტელევიზიაში მუშაობის გამოცდილებაც აქვს, თუმცა "ტვ 3" დაიხურა (სადაც ბოლოს მუშაობდა) და ახლა სახლშია. ჰყავს მეუღლე და სამი წლის ალექსანდრე.
შესაძლოა უკვე მიხვდით კიდეც, ვისზეც არის საუბარი, მაგრამ მათ, ვინც ამას ვერ მიხვდა, ვეტყვი, რომ ნინო გია ჯაჯანიძის უმცროსი ქალიშვილია და ფიქრობს, თავის არაოდინარულ მამას რაღაცით თავადაც ჰგავს, რადგანაც მამის მსგავსად, ხანდახან საკუთარ თავში უცნაურ თვისებებს აღმოაჩენს ხოლმე.
- სკანდალური, ეპატაჟური, არაორდინარული ადამიანის შვილი ხარ. რას ნიშნავს ეს შენთვის?
- როგორც აღნიშნეთ, მართლა განსხვავებული ადამიანია და მე მას ბავშვობიდან ასეთს ვუყურებ, ამიტომ ჩემთვის სიახლე და გასაკვირი ამაში არაფერია. შეჩვეული ვარ, რომ ასეთი მამა მყავს. ამასთან, მომსწონს კიდეც, რომ არასტანდარტულია და არაფრით ჰგავს სხვების მამებს...
ალბათ, ისიც იშვიათია, რომ შვილის მშობიარობას მამა დაესწრება, არა? ჰოდა, პატარა ალექსანდრე რომ გავაჩინე, გია ჩემ გვერდით იყო და მამხნევებდა, ძალას და ენერგიას მმატებდა...
- მეუღლე სად იყო?
- თავიდან ის შემოვიდა, მაგრამ ჩემს საშინელ ტკივილსა და ემოციურ განცდებს ვერ გაუძლო და გავიდა. მერე ვითხოვე, - მამა შემოსულიყო. ტკივილისგან რომ ვყვიროდი, მეჩხუბებოდა, - ხომ გეუბნებოდი და იცოდი, რომ გათხოვდებოდი, რა გელოდაო... მერე ტკივილი ცოტა რომ მინელდებოდა და ამოსუნთქვის საშუალება მქონდა, ორივე ერთად ვიცინოდით... კი მიყვიროდა, მეჩხუბებოდა, მაგრამ შინაგანად მაინც მშვიდად იყო და ეს მეც მამშვიდებდა.
ბლოკში რომ გადამიყვანეს, იქაც შემოვიდა, ექიმი გაოცებული უყურებდა და გაკვირვებული ამბობდა, ჩემი შვილის მშობიარობას როგორ უნდა დავესწრო, არც კი ვიციო?!
- დედაზე რას გვეტყვი. ვინ არის ის?
- დედაჩემი - ნანა ჯინჭარაძე ჭიათურის თეატრის მოქმედი მსახიობია. თეატრალური ინსტიტუტი რომ დაამთავრა, ჭიათურაში ჩავიდა (იქ გაანაწილეს) და მას მერე იქ ცხოვრობს. მეც იქ გავიზარდე და სკოლაც იმერეთში დავამთავრე. შემდეგ თბილისში ჩამოვედი და ჯავახიშვილში ჟურნალისტიკის ფაკულტეტზე ჩავაბარე.
- რამდენი ხანი იყვნენ შენი მშობლები ერთად?
- ჩემი მშობლები როდის დაშორდნენ, არც ვიცი, რადგან ისე გავიზარდე, რომ ეს არც მიგრძვნია. მართლა არ ვიცი, ეს როდის მოხდა, ან რატომ, რა მიზეზით. ამას არც დედაჩემს ვეკითხები და არც - მამაჩემს. არასდროს მიგრძვნია მათი ერთმანეთის მიმართ ცუდი დამოკიდებულება. მერე უბრალოდ, როცა გავიზარდე და გავიგე, რომ ქალსა და მამაკაცს შორის სხვა ურთიერთობებიც არსებობს, მივხვდი, რომ ერთად არ იყვნენ.
მათ ახლაც კარგი ურთიერთობა აქვთ, ასევე ნათიას დედასთანაც (გიას უფროსი შვილი, რომელიც პირველი მეუღლისგან ჰყავს. - ავტ.) და რეჟისორ მარინა ხონელიძესთანაც (მამაჩემის მესამე ცოლი).
- მეოთხეს მოყვანასაც აპირებს. რას იტყვი ამაზე?
- როცა ამას ამბობს, ვფიქრობ, რომ აუცილებლად უნდა მოიყვანოს. რატომაც არა, მაგრამ ისეთი ადამიანია, რომ მგონია, ცოლი არ უნდა ჰყავდეს. თავისუფალია, შეზღუდვები არ უყვარს. თუმცა თუ მოიყვანს, ძალიან გამიხარდება. არ მინდა, მარტო იყოს...
- შენ და ნათიას როგორი ურთიერთობა გაქვთ?
- კარგი და ესეც იმან განაპირობა, რომ ზაფხულობით მამაჩემს ჭიათურაში ჩამოჰყავდა, ანუ ბავშვობიდან გვაქვს ურთიერთობა. როცა თბილისში ჩამოვდიოდი, მაშინ გიას მივყავდი ნათიასთან და დედამისთან. მათთან ვრჩებოდი. რაც გავიზარდეთ და წლები მოგვემატა, ახლა უკვე მეგობრული ურთიერთობა ჩამოგვიყალიბდა. მას ორი შვილი ჰყავს.
- გიას ახალი ხმაურიანი და სკანდალური შოუ მიჰყავს. თავისუფალი დრო ვიცი, რომ ცოტა აქვს. ალბათ იშვიათად ნახულობთ ერთმანეთს.
- კი, დატვირთული რეჟიმის გამო ჩვენთან ურთიერთობას ვერ ახერხებს. ადრე უფრო ხშირად მივდიოდით მასთან, ან თვითონ მოდიოდა ჩვენთან. ახლა ამ დაკავებულობის გამო სახლში არ არის, რომ მივიდე და ვნახო. როცა ვურეკავ და ვეუბნები, თუ სახლში ხარ, მოვალთ-მეთქი, მპასუხობს: მოდი, ოღონდ, მალე წადი. როცა მივდივართ, ვიბრძვით, რომ მასთან რაც შეიძლება დიდხანს დავრჩეთ (იცინის).
- სურპრიზებს არ გიკეთებთ?
- კი, როგორ არა. ვთქვათ, უცხოეთიდან საჩუქარი ჩამოგვიტანა, თვითონ არ გადმოგვცემს, ბებიასთან ტოვებს. მერე ბებო მირეკავს და მეუბნება, - გიამ რაღაც დაგიტოვა, მოდი და წაიღეო...
- როდესაც ვიღაცები მას უარყოფითად აფასებენ, რას განიცდი?
- ვიცი, რომ ნეგატიური აზრი არსებობს, რადგანაც ადამიანი ზოგადად ყველას ვერ მოეწონება, მაგრამ იმას არასდროს შევსწრებივარ, რომ ჩემთვის პირადად რაიმე ეთქვათ. მხოლოდ ორი შემთხვევა იყო ასეთი: უნივერსიტეტში პირველ ლექციაზე რომ მივედი, გვერდით გოგო მეუბნებოდა სხვა გოგოზე, - ეს იცი, ვინ არის? გია ჯაჯანიძის შვილიაო. ვინ გია ჯაჯნიძის-მეთქი? ვკითხე, ვიფიქრე, ალბათ ვიღაც კიდევ არის გია ჯაჯანიძე-მეთქი. იმ პერიოდში მამაჩემი "პირველ არხზე" მუშაობდა. მაშინვე მივხვდი, რომ რაღაც ცუდის თქმას აპირებდა. უხერხულ მდგომარეობში რომ არ ჩავარდნილიყო, სიტყვის თქმა აღარ ვაცალე და ვუთხარი, რომ მე ვარ გიას შვილი-მეთქი. არ დაიჯერა სანამ პირადობის მოწმობა არ ვაჩვენე. მეორედაც ერთი პიროვნება უხერხულ მდგომარეობაში ჩავრდნას გადავარჩინე. რაღაცების თქმას აპირებდა და ამის საშუალება არ მივეცი...
- შენს აზრს გია თუ ითვალისწინებს?
- მასთან სტუდენტობისას რომ ვცხოვრობდი, ძალიან მიხაროდა, როდესაც სადმე მიდიოდა და მე მეკითხებოდა, ამ ფეხსაცმელს ვთქვათ, რომელი შარვალი მოუხდებოდა. ჩემი რჩევა ხშირად გაუთვალისწინებია. ისე კი, პირიქით, რჩევებს აქეთ გვაძლევს ხოლმე.
- თავის სკანდალურ გადაცემასთან დაკავშირებით არაფერს ეუბნები?
- ჟურნალისტი ვარ და პროფესიულად როდესაც ვსაუბრობთ და უკვე ეთერში გასულ გადაცემას განვიხილავთ, ვეუბნები, რომ ახლა ეს ჯობდა, ან ეს-მეთქი (ანუ რა მომეწონა და რა - არა). მიხარია, რომ რასაც ვეუბნები, ვხვდები და ვგრძნობ, რომ იმას ითვალისწინებს.
- გადაცემაში ზოგჯერ ისეთი თემა აქვთ, რომ მაყურებლის უარყოფით ემოციას იწვევს...
- ქალბატონმა მაიამ, პროექტის პროდიუსერმა თქვა - შოუში მზადდება ის თემა, რასაც მაყურებელი უკვეთავს. 80 პროცენტს ასეთი გადაცემები ალბათ, აინტერსებს, არ ვიცი. ფაქტია, რომ ძალიან მაღალი რეიტინგი აქვს მათ შოუს. თუმცა ბევრი ისეთი თემაც ჰქონიათ, რომელიც ძალიან დახვეწილი, გემოვნებიანი ყოფილა, მაგრამ მასზე ნაკლები მოთხოვნილება ყოფილა...
- როგორ გგონია, გავხარ მამას?
- გარეგნულად ძალიან არ ვგავარ, მაგრამ ხასიათებში ცოტა უცნაურობა მეც მაქვს (იცინის)...
- შენც ისევე იმოსები ხოლმე?
- მინდა, მაგრამ არ გამომდის (იცინის)...
- გია თავის ასაკს ხშირად უსვამს ხაზს. იმასაც ამბობს, რომ არის ბაბუა. რას იტყვი, როგორი ბაბუაა?
- მგონია, რომ ბავშვებთან საკუთარი დამოკიდებულება რაღაც არ უნდა, რომ ბოლომდე გამოხატოს, თუნდაც, რომ ეთამაშოს... როდესაც მასთან სახლში მივდივართ, ხომ იცით, როგორი სახლიც აქვს, პატარებმა რაიმე რომ არ გატეხონ, დააზიანონ, ეუბნება, ეს არ გააფუჭოთ, გადავირევიო. არადა, ასე რომ მოხდეს, არა მგონია, მართლა გადაირიოს.
- გია მსახიობიც არის, რეჟისორიც, ფსიქოლოგიც, ამიტომ ლავირება შეუძლია. ამის გამო ბევრი ამბობს, რომ ის ხშირად თამაშობს და რეალურად კი სხვა ტიპია.
- რეალურად ისეთია, როგორსაც იცნობენ. თუ სადმე უცნაურად ჩაცმული მიდის, ამას იმით ხსნის, რომ იმ სიტუაციისთვის ასე იყო საჭიროო. თუმცა, ალბათ, თქვენც გინახავთ კლასიკურად ჩაცმული გია...
მისი ერთი თვისებაც გამახსენდა: სტუდენტობის პერიოდში როცა მასთან ვცხოვრობდი, თვითონაც ჩააბარა ფილოსოფიის ფაკულტეტზე, ჰოდა, მე მაკითხებდა თავის კონსპექტებს ხმამაღლა, ანუ იმას, რაც სასწავლი ჰქონდა. შოკში ვიყავი, ნერვები მეშლებოდა...
- გტანჯავდა?..
- (იცინის) კი. თან, არ მეუბნებოდა, ამას რატომ აკეთებდა. დრო რომ გავიდა, მივხვდი, ჩემთვისაც აკეთებდა, რადგანაც მეც მქონდა ფილოსოფიაში გამოცდა და რასაც ვუკითხავდი, იქიდან მერე მასალა მეც გამომადგა. ასეთი რაღაცები ხშირად ხდება ხოლმე, მერე კი ხვდები, რომ ყველაფერი - კარგიც და იმ წუთში უსიამოვნოც შენს სასარგებლოდ გააკეთა...
ლალი ფაცია
AMBEBI.GE
