"ეს ჩვენი საქმეა" - როგორ მოახერხა აჩიკო გულედანმა მუსიკოსების დათანხმება, რომელთა საქართველოში ჩამოყვანა ერთგვარი სენსაციაა

ფესტივალის "Tbilisi Open Air Alter/Vision" ორგანიზატორებმა ღონისძიებების შესახებ ინფორმაცია საზოგადოებას უკვე აცნობეს. "ზღვა, მზე, გემოვნებიანი მუსიკა და მსოფლიოს წამყვანი მუსიკოსები" - ეს ის არის, რასაც რიგით მეექვსე ფესტივალზე მსმენელი მოისმენს. ფესტივალის ორგანიზატორის, აჩიკო გულედანის თქმით, "Tbilisi Open Air 2015" 3 ივლისიდან 7 ივლისის ჩათვლით, თბილისის ზღვის ახალ ქალაქში გაიმართება. მასში 70-ზე მეტი მუსიკოსი იქნება ჩართული. მათ შორის, PLACEBO, ARCHIVE, ZEMFIRA , BETH HART, BLACK LABEL SOCIETY, AQUARIUM... მანამდე კი ქართველი ნიუ ქამერების შერჩევა მოხდება, რომლებიც ამიერკავკასიის მასშტაბურ მუსიკალურ სცენას დაიკავებენ.

ბილეთების გაყიდვა ონლაინსივრცეში და სპორტის სასახლის სალაროებში უკვე დაიწყო.

- ამიერკავკასიაში ყველაზე მასშტაბური მუსიკალური მოვლენა წელს, როგორც გაირკვა, ხუთდღიანია. ისეთი მუსიკოსები ჩამოგყავთ, რომელთა აქ ჩამოყვანა ერთგვარი სენსაციაც კია. როგორ მოახერხეთ ეს და ამ პროექტზე რამდენ ხანს იმუშავეთ; როგორ გახვედით ამ კავშირებზე?

აჩიკო გულედანი:

- ეს ჩვენი ჩვეულებრივი საქმეა, რომელსაც წლებია, ვაკეთებთ. წლიდან წლამდე აქტიურად ვმუშაობთ იმისთვის, რომ ახალ-ახალ ეტაპებზე გავიდეთ. ამ პროექტზე შარშანდლიდან ვმუშაობთ. როგორც კი დამთავრდა ფესტივალი, ერთ თვეში უკვე გვქონდა პროექტის მონახაზი, - როგორი და რანაირი უნდა ყოფილიყო წლევანდელი საფესტივალო დღეები. ვიმეორებ, ეს ჩვენი საქმეა.

- მუსიკოსებთან მოლაპარაკებისას რაიმე პრობლემა, წინააღმდეგობა ხომ არ შექმნილა?

- არა, ეს ყველაფერი ცოტა სხვანაირად ხდება ხოლმე. დიდი ხანია ამ სფეროში ვმუშაობთ და პირველად არ ვაკეთებთ ამ საქმეს, უკვე კარგად გვიცნობენ. 2013 წლიდან იმ ეტაპზე გადავედით, რომ ინფორმაციის გაცვლა-გამოცვლა პრობლემა არ არის.

ასეთ პროექტზე მუშაობას მაქსიმალურად 7-8 თვე სჭირდება. მთავარი, რაც უნდა ვთქვა, წელს ჩვენი წარმდგენია ''ჰუალინგ-ჯგუფი''. ამასთან, გვაქვს ახალი ლოკაცია, - ფესტივალი თბილისის ზღვის ახალ ქალაქში გაიმართება. ასე რომ, მწვანე მინდორთან ერთად, წყალიც დაგვემატა. ძალიან მაგარი ადგილია, ამას ნახავენ და ამაში დარწმუნდებიან.

ამ ყველაფერს ველოდით, რომ კარგი გამოხმაურება ექნებოდა. სიახლეებიც არის და ყოველგვარი თავმდაბლობის გარეშე ვიტყვი, რომ ამ რეგიონისთვის ასეთი "ლაინ-აფი" აქამდე არ არსებობდა. ახლა უკვე არსებობს და გვიხარია, რომ ეს საქართველოში ხდება. საქართველოში ბევრი ადამიანი ჩამოვა და ჩვენი ქვეყანა რაღაცნაირად წინ კიდევ ერთი ნაბიჯის გადადგმას მოახერხებს. ფესტივალისთვის და ქვეყნისთვის მაინცდამაინც უმნიშვნელო რამ არ არის და საინტერესოა.

- აჩიკო, თქვენი ჯგუფის ("Green Room") ბოლო ვიდეო რას მიუძღვენით, ძალიან საინტერესო ნამუშევარია...

- ამით მხარს ვუჭერთ შესანიშნავ პროექტს, რომელიც თავის მხრივ მხარს უჭერს მსოფლიო მასშტაბის პროექტს Wings for Life World Run-ს. ერთ დღეს, მსოფლიოს რამდენიმე ქვეყანაში ცდილობენ, რომ დაეხმარონ სხვა ადამიანებს და ეს თავისთავად კარგია. გადავწყვიტეთ, რომ ამ ყველაფრისთვის მხარი ჩვენც დაგვეჭირა და ამ კომპოზიციას 3 მაისს დავუკრავთ. ეს ვიდეო ჩვენი ფროდაქშენია, "გრინ რუმის".

ლალი ფაცია

AMBEBI.GE