საპარლამენტო უმრავლესობის წევრებს ზუგდიდში საპროტესტო აქციით შეხვდნენ
საპარლამენტო უმრავლესობის წევრების, ეკა ბესელიასა და გია ვოლსკის ზუგდიდში ვიზიტს "ერთიანი ნაციონალური მოძრაობის" მხარდამჭერები აპროტესტებენ. ისინი შოთა მესხიას ზუგდიდის სახელმწიფო სასწავლო უნივერსიტეტის წინ იმყოფებიან, სადაც საპარლამენტო უმრავლესობის შეხვედრა უნდა გაიმართოს.
აქციის მონაწილეებს ხელში წითელი ბარათები უჭირავთ და ხელისუფლების გადადგომას ითხოვენ. მათ უჭირავთ ბანერები, სადაც დეპუტატების სახელები და გვარები წითელი კალმით არის გადახაზული. შეკრებილები, რომელთა შორის ანი ნადარეიშვილის ორგანიზაციის "თავისუფლების და მხარდაჭერის ცენტრის" წევრებიც არიან, შეძახილებითა და სტვენით შეხვდნენ გია ვოლსკისა და ეკა ბესელიას, რომლებმაც შენობაში შესვლა პოლიციის დახმარებით შეძლეს. აქციის მონაწილეები მოითხოვენ შენობაში შესვლას, რის უფლებასაც მათ პოლიცია არ აძლევს. შეკრებულების თქმით, მათ სურთ პირადად დაუსვან დეპუტატებს კითხვები.
"ეს მთავრობა უნდა წავიდეს, რადგან ქვეყანაში არის მძიმე სიტუაცია. ძალიან დამძიმებულია კრიმინალური სიტუაცია და ეს ხელისუფლება უნდა გადადგეს. გია ვლსკი არის ეფესბეს აგენტი", - განაცხადა "თავისუფლების და მხარდაჭერის ცენტრის" წარმომადგენელმა ლევან თორიამ.
თავიმხრივ დეპუტატები აცხადებენ, რომ ეს არის "ნაციონალური მოძრაობის" მორიგი პროვოკაცია. გია ვოლსკის განმარტებით, რჩება შთაბეჭდილება, რომ ეს ადამიანები აქ არა კონკრეტული კითხვებით, არამედ სწორედ პროვოკაციის მოსაწყობად მოვიდნენ. ეკა ბესელიას თქმით, დღევანდელ აქციაზე ძირითადად "ახალაიების" მხარდამჭერები მოვიდნენ. "სამეგრელოში ახალაიების ეპოქა "ქართულმა ოცნებამ" დაასრულა და ის უკან არასდროს დაბრუნდება", - განაცხადა დეპუტატმა.
ამ წუთებში უნდა დაიწყოს უნივერსიტეტში შეხვედრა, რომლის ეზოშიც საპროტესტო აქცია
გრძელდება. შენობაში შესასვლელს პოლიცია რკინის ჯებირების დახმარებით აკონტროლებს.
წყარო: livepress.ge
იმერეთის გუბერნატორის ხელფასი გაორმაგდა
ორი ობლისა და ორი ბებიას შემზარავი გასაჭირი გურიაში
