ბარაქ ობამა თურქების მიერ სომხების მასობრივი დახოცვის ფაქტზე სიტყვა "გენოციდს" არ გამოიყენებს

თეთრი სახლი ასი წლის წინ თურქების მიერ სომხების მასობრივ დახოცვას "გენოციდს" არ უწოდებს. ამის შესახებ "უოლ სტრიტ ჯორნალი" იტყობინება.

თეთრმა სახლმა გაავრცელა განცხადება ობამას ადმინისტრაციის ხელმძღვანელის, დენის მაკდონოის, ეროვნული უსაფრთხოების საკითხებში პრეზიდენტის მრჩევლის მოადგილის, ბენ როდსის და სომხური დიასპორის ლიდერების შეხვედრის შესახებ. "მხარეებმა განიხილეს საშინელი პერიოდის დროს მილიონნახევარი ადამიანის დაღუპვიდან 100 წლისთავის აღნიშნვის საკითხი", - წერს თეთრი სახლი, თუმცა განცხადებაში სიტყვა "გენოციდი" ნახსენები არ არის.

შეხვედრის შემდეგ აშშ-ში სომხეთის ეროვნული კომიტეტის ხელმძღვანელმა, არამ ჰამპარიანმა განაცხადა, რომ ამერიკელმა მაღალჩინოსნებმა მას აცნობეს თეთრი სახლის გადაწყვეტილების შესახებ, რომლის მიხედვითაც, ბარაქ ობამა არ აპირებს 24 აპრილს გენოციდის ასი წლისთავთან დაკავშირებით დაგეგმილ ღონისძიებაზე სიტყვით გამოსვლისას სიტყვა "გენოციდის" გამოყენებას. აღნიშნულის გამო სომხური დიასპორის წარმომადგენლები შეშფოთებას გამოთქვამენ. 2008 წელს ბარაქ ობამამ წინასაარჩევნო კამპანიის დროს განაცხადა, რომ ის "სომხების გენოციდს" აღიარებდა.

"ინტერპრესნიუსი"

სიახლე!

თუ დაინტერესებული ხართ მხოლოდ პოლიტიკური თემებით და არ გსურთ, მიიღოთ სხვა, თქვენთვის უინტერესო ინფორმაცია, მოიწონეთ გვერდი, რომელზეც მხოლოდ უმნიშვნელოვანესი პოლიტიკური სიახეები თავსდება.