ბატონო პრეზიდენტო, მე შეგიფარებთ, ყოველდღე ვარიებს ვერ დაგიკლავთ, მაგრამ დაუმადლებელ ყველს და პურს არ მოგაკლებთ
დანებდება?! არ დანებდება?! გადავა?! არ გადავა?! - ეს ის კითხვებია, რომელიც პრეზიდენტ მარგველაშვილის ირგვლივ ისმის. სადაო საგანი პრეზიდენტის რეზიდენციაა, რომელიც ავლაბარში მდებარეობს, ხოლო მთავრობა მიიჩნევს, რომ პრეზიდენტმა ეს რეზიდენცია უნდა დატოვოს და ათონელის ქუჩაზე ახლად გარემონტებულ შენობაში გადავიდეს. სამწუხაროა, რომ რასაც მთავრობა მიიჩნევს, ჭეშმარიტება ჰგონია და თეორიულადაც არ უშვებს იმის ალბათობას, რომ ცდება. არადა, მართალია გიორგი მარგველაშვილი არ არის ყველა ქართველის არჩევანი, მაგრამ საქართველოს არჩევანია და პატივისცემას ნამდვილად იმსახურებს. საუბედუროდ, მთავრობა ამდენს ვერ, ან არ ხვდება, უფრო დიდი უბედურება კი ის არის, რომ მთავრობის ბევრი მომხრეც მთავრობას ბაძავს.
სამწუხაროა, რომ პრეზიდენტის ამჟამინდელი საცხოვრებელი ბევრისთვის ისევ "მიშას სასახლესთან" ასოცირდება, არადა ეს ადგილი საქართველოს პრეზიდენტის რეზიდენციაა და ის მთელ საქართველოს ეკუთვნის. ხელისუფლების უმაღლესი პირები ამბობენ, რომ მარგველაშვილი ვალდებულია თამაშის წესებს დაემორჩილოს და რეზიდენცია დატოვოსო. გულწრფელად მაინტერესებს, თუ არ დატოვა და თქვა: აქა ვდგავარ და სხვაგვარად არ ძალმიძსო, სააღსრულებლო ბიურო მივა და გამოასახლებს?! იმედია, ასე არ მოხდება, თორემ მერე მართლა გავაოცებთ ევროპას.
ბევრი წერს, რომ პრეზიდენტი თითქმის უფუნქციოა და რაში სჭირდება მას ამხელა რეზიდენციაო. ამ ლოგიკით ათონელის ქუჩაზე არსებული რეზიდენციაც საკმაოდ დიდია და მაშინ სადმე "ხრუშჩოვკა" ვუქირაოთ ბატონ პრეზიდენტს და პრობლემაც გადაიჭრება. სხვათა შორის, ამავე ლოგიკით თუ ვიმსჯელებთ, მაშინ პარლამენტიც უნდა გამოვასახლოთ, რადგან მართალია ფუნქცია აქვთ (თან დიდი), მაგრამ მაგათი გაკეთებული საქმე ჩემმა დასაფსებმა თვალებმა ჯერ ვერ დაინახა.
უბედურებაა, როდესაც ქვეყანა ამხელა გამოწვევების წინ დგას და კამათი ასეთ პრიმიტიულ თემებზე მიდის და ამაში უამრავი რესურსი იხარჯება. ერთი წერს, გამოვიდეს, მეორე ვიღაცას ავალებს, რომ უპასუხე არ გამოვალო და ასე პასუხის-პასუხებით ამომრჩეველი ვიქცევთ თავს. უკვე თითქმის ორი წელია გიორგი მარგველაშვილი პრეზიდენტია და მთავრობის მხრიდან ერთი ფაქტიც არ მახსენდება, როდესაც პრეზიდენტის ინსტიტუტის მიმართ პატივისცემა გამოხატეს, პირიქით კი იცოცხლე, რამდენიც გინდა, თითები არ გეყოფა ადამიანს ჩამოსათვლელად.
ფაქტია, მარგველაშვილზე ყოველი თავდასხმა მის რეიტინგზე ასხამს წყალს, რადგან ჩაგრული ადამიანები ქართველებს ყოველთვის გვეცოდება და ხშირად ეს სიბრალული სიყვარულში გადადის. ასეა ამ შემთხვევაშიც და მე თუ ვხვდები ამდენს, დავიჯერო ხელისუფლების ის პირები ვერ ხვდებიან, ვისაც მარგველაშვილის დისკრედიტაცია აქვთ განზრახული?
ომარ ხაიამს აქვს ერთი რობაი, რომელიც ასე სრულდება:
"....რა ვქნა, არ მესმის, ეს უგნური ღვინის ვაჭარი,
ღვინოს რომ ყიდის, იმაზე კარგს იყიდის რამეს?"
გიორგი მარგველაშვილის გამოსახლებას რომ აპირებთ, გულწრფელად მაინტერესებს, მთავრობის წევრებიდან, უკეთესი ვინ უნდა შეასახლოთ იქ?!
პ.ს. ბატონო პრეზიდენტო, ოჯახში ვცხოვრობთ სამი ადამიანი (მე, მეუღლე და 3 წლის ნენე), მაგრამ არაა პრობლემა, მეოთხესაც მივიღებთ. ასე რომ, მიეცით მაგათ ეგ სასახლე (თუ ასე უნდათ) და მობრძანდით. ვერ დაგპირდებით, რომ ყოველდღე ვარიებს დაგიკლავთ, მაგრამ დაუმადლებელ ყველს და პურს არ მოგაკლებთ. ჩემი მისამართის გაგება ძალიან იოლია და მორიდებით ნუ მოგერიდებათ, პირიქით, ძალიან გამახარებთ თქვენი სტუმრობით.ლადო გოგოლაძე
AMBEBI.GE
ასევე იხილეთ| საქართველოს პრეზიდენტი მზად არის, ბიძინა ივანიშვილს უმასპინძლოს
საჭირო ბმულები მეტი ინფორმაციისთვის:
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
უკრაინის პროკურატურამ მიხეილ სააკაშვილის მიმართვაზე საქმე აღძრა
