რეალური ისტორიები დასახიჩრებული ბავშვების თავზარდამცემ ფოტოებზე, რომლებმაც ქართული ინტერნეტსივრცე მოიცვა
ფოტოები, რომლებმაც Facebook-ის ქართული აუდიტორია მოიცვა და მას ინტერნეტმომხმარებელთა ნაწილი ასირიელ ქრისტიანთა წამების ამსახველ ფოტოებად მიიჩნევს, შოკისმომგვრელია, თუმცა მათ რეალურად, სრულიად სხვა ისტორიები აქვთ. Ambebi.ge ამ სტატიაში ცნობილი ფოტოების ბევრისთვის უცნობ ისტორიებს მოგითხრობთ.
სირიის ოპოზიციონერმა აქტივისტმა ბავშვები "ისლამური რესპუბლიკის" მებრძოლების ფორმაში გამოაწყო და გალიაში ჩასვა, ცეცხლწაკიდებული ჩირაღდნის ფონზე. ამგვარი პერფორმანსით მან სცადა, გაეპროტესტებინა "ისლამური რესპუბლიკის" ტერორისტების მიერ, 2015 წლის თებერვალში მომხდარი მკვლელობა, რომლის დროსაც მათ იორდანელი პილოტი მოაზ ალ-კასასბი ცოცხლად დაწვეს. გარდა ამისა, მან სცადა მიეპყრო საერთაშორისო მედიის ყურადღება აღნიშნულ პრობლემასთან დაკავშირებით. შეგახსენებთ, რომ იორდანიის ხელისუფლებამ პილოტის დაწვის კადრების სინამდვილე მალევე დაადასტურა.
ფოტო, სადაც პატარა ბიჭუნა საკუთარ დის დაცვას ცდილობს, ინტერნეტში გავრცელებული რესურსების მიხედვით, სირიაშია გადაღებული, თუმცა, უცნობი რჩება სურათის აუთენტურობა და ვითარებები, რომლის დროსაც სურათი გადაიღეს.
სურათი 2013 წელს პაკისტანში განვითარებულ მოვლენებს ასახავს, რომლის დროსაც თვითმკვლელმა ტერორისტმა შიიტი მუსულმანებით დასახლებულ პუნტქში აიფეთქა თავი. 82 ადამიანი გარდაიცვალა. ტერორისტულ აქტზე პასუხისმგებლობა სუნიტურმა რადიკალურმა ჯგუფმა Lashkar-e-Jhangvi-მ აიღო, რომელიც 1996 წელს პაკისტანში ჩამოყალიბდა და შიიტი მუსლიმების წინააღმდეგ იბრძვის.
სირიის დედაქალაქ დამასკოს გარეუბანში, სირიის სამთავრობო ძალების მიერ ქიმიური იარაღის გამოყენებას ასობით ადამიანის სიცოცხლე შეეწირა. მშვიდობიანი მოსახლეობის დაღუპვა, სავარაუდოდ, საბრძოლო ნერვულ-პარალიტიკურმა აირმა, "ზარინმა" გამოიწვია. 2013 წლის 21 აგვისტოს, გამთენიისას, დამასკოს შემოგარენში მძინარე მოსახლეობას სულის ხუთვა დაეწყო.
პანიკაში მყოფი ხალხი თავის გადასარჩენად სარდაფებში ჩავიდა, როგორც ამას დაბომბვების დროს აკეთებდა, თუმცა ეს ბევრისთვის საბედისწერო აღმოჩნდა, რადგან სარდაფებში მხუთავი აირი სწრაფად დაგროვდა. გადარჩნენ ისინი, ვინც ინსტინქტურად შენობის სახურავზე ავიდნენ და შედარებით სუფთა ჰაერი ჩაისუნთქეს.
P.S. ის, რომ აღნიშნული ფოტოები სინამდვილეში არ ასახავს ასირიელი ქრისტიანების წამების ფაქტებს, ბუნებრივია, სულაც არ გამორიცხავს, რომ მსგავსი ფაქტები იქ რეალურად ხდება.
AMBEBI.GE
საჭირო ბმულები მეტი ინფორმაციისთვის:
9 წლის გოგონებს ერთი საათით "ათხოვებენ" - ჟურნალისტებმა ერაყში შემზარავი მასალა გადაიღეს
მოსკოვში ხანძარს 4 ბავშვი ემსხვერპლა - "უყურადღებოდ იყვნენ დარჩენილი, რადგან დედა ან მეზობელთან იყო გასული, ან ნასვამს ეძინა"
