თბილისში უძრავი ქონების ფასი დაეცა: ბაზრის სრული მიმოხილვა და ბინების ფასები უბნების მიხედვით
ეროვნული ვალუტის გაუფასურებამ თავისი კვალი უძრავი ქონების ბაზარსაც დაატყო. თბილისშიც კი, სადაც საცხოვრებელი ფართების ყიდვა-გაყიდვა, გაქირავება, დაგირავებაზე მოთხოვნა საქართველოს მასშტაბით ყველაზე დიდია, ექსპერტები უძრავი ქონების რეალიზაციის კლებაზე საუბრობენ და ამის ერთ-ერთ მიზეზად ლარის კურსის დევალვაციას ასახელებენ. მათი თქმით, 2015 წლის იანვრიდან, როდესაც ქვეყანაში ეროვნული ვალუტის რყევები დაიწყო, უძრავი ქონების გასაყიდი, თუ გასაქირავებელი ფასები მცირედით შემცირდა.
უძრავ ქონების რეალიზაციის შესახებ განსხვავებულ ინფორმაციას იძლევა საჯარო რეესტრის ეროვნული სააგენტო. უფრო კონკრეტულად კი, ოფიციალური მონაცემებით, 2015 წლის თებერვალში, წინა წლის ანალოგიურ პერიოდთან შედარებით, უძრავი ქონების ბაზარზე სარეგისტრაციო ტრანზაქციების რაოდენობა 17.0%-ით გაიზარდა და ქვეყნის მასშტაბით 45 356 ერთეული შეადგინა. რეესტრის მონაცემებით, 2015 წლის თებერვალი უპირატესი ზრდით გამოირჩევა. იანვართან შედარებით, სარეგისტრაციო ტრანზაქციების რაოდენობა 31.5%-ით გაიზარდა. საჯარო რეესტრის ეროვნული სააგენტოს მონაცემებით, ზრდა დაფიქსირდა როგორც პირველადი (46.2%-ით), ისე მეორადი (28.8%-ით) სარეგისტრაციო ტრანზაქციების რაოდენობაში.
2015 წლის თებერვლის თვეში პირველადი სარეგისტრაციო ტრანზაქციების რაოდენობამ 7 892, ხოლო მეორადი სარეგისტრაციო ტრანზაქციების რაოდენობამ - 37 464 ერთეული შეადგინა.
თუ ბინების რეალიზაციის შესახებ ვებგვერდებზე გამოქვეყნებულ განცხადებებს გავეცნობით, ჩანს, რომ როგორც წლების განმავლობაში, ამჟამადაც პრესტიჟულ უბნად კვლავ რჩება ვაკე, სადაც ახლადაშენებულ კორპუსში თეთრი კარკასის 1 კვ.მ-ის ფასი 1000 დოლარიდან იწყება და 2000 დოლარსაც კი აღწევს. რაც შეეხება ვაკე-საბურთალოს რაიონს, 1 კვადრატული მეტრის გასაყიდი ფასი საშუალოდ 800-1100 დოლარია.
საკმაოდ ძვირი ფასია უძრავ ქონებაზე დედაქალაქის ძველ უბნებში, კერძოდ, აქ 1 კვ.მ-ის ფასი 800-1100 დოლარია. რაც შეეხება დიღმის მასივს, დიდ დიღომსა და დიდუბეში ახლადაშენებულ კორპუსებში 1 კვ.მ-ს ფასი 500-დან 600 დოლარამდე მერყეობს. დიდუბე-ჩუღურეთში კი უძრავ ქონებაზე მათ შორის, მეორად ბინებაზე 1 კვ.მ-ის ფასი დაახლოებით, 600-დან 1000 დოლარის ფარგლებშია. გლდანი-ნაძალადევის რაიონში 1კვ/მ-ს საშუალო ფასი 450-დან 800 დოლარია, თუმცა აღსანიშნავია, რომ ნაძალადევში ბინის გასაყიდი ფასი გლდანთან შედარებით, მაღალია. ისანი-სამგორის რაიონში 1 კვ.მ-ის საშუალო ფასი, დაახლოებით, 400-850 დოლარია. ამასთან, უძრავის ქონების სფეროში მოღვაწეები ერთხმად აცხადებენ, რომ მომხმარებლის მხრიდან მოთხოვნა შედარებით მაღალია პატარა ფართის ბინებზე და შესაბამისად, დიდი ფართის გაყიდვაც და გაქირავებაც ყოველთვის ძნელია.
უძრავის ქონების ბაზარზე დღეს არსებულ ვითარებასთან დაკავშირებით, Ambebi.ge განცხადებების პორტალ Saqme.ge-ს განვითარების მენეჯერს ნიკა ჯაფარიძეს ესაუბრა. ჯაფარიძე აცხადებს, რომ ბოლო პერიოდში უძრავის ქონებასთან დაკავშირებული განცხადებების რაოდენობა შემცირებული არ არის, თუმცა ბინები, რომლებიც სარეალიზაციოდ რამდენიმე თვის წინ გამოიტანეს, განცხადების სახით ისევ დევს. აქედან გამომდინარე, შეიძლება გამოიტანო დასკვნა, რომ ის ბინა არ გაყიდულა და ამ ეტაპზე ბინების გაყიდვას ცოტა უჭირს.
"საიტზე დაყრდნობით შეიძლება ითქვას, რომ ბინები არ იყიდება იმ რაოდენობით, როგორც იყიდებოდა, ანუ კლება არის. თუ ადამიანი ბინას ყიდდა ერთ, ან ორ თვეში, ახლა ასე სწრაფად ვეღარ ყიდის, ანუ გაყიდვის რაოდენობის კლების ტენდენია არსებობს", - აცხადებს ჯაფარიძე.
მისივე ინფორმაციით, იქედან გამომდინარე, რომ გაყიდვები შეჩერებულია, გასაქირავებელი და გასაყიდი ბინების ფასები მცირედით დაკლებულია.
ექსპერტი ემზარ ჯგერენაია Ambebi.ge-სთან უძრავ ქონებაზე 7 წლის წინ დაწყებულ ფასების მომატებაზე საუბრობს, რომელიც მისი თქმით, იმ ნიშნულზე აღარ დაბრუნებულა, რაც 2008 წლამდე იყო.
"უძრავი ქონების ბაზარზე აქტივობა 2014 წელს კიდევ შემცირდა იმის გამო, რომ მოსახლეობაში ფული ნაკლებად არის. ეს მთლიანად წაიღო საბანკო დავალიანებებმა, თუ სესხების მომსახურებამ. ლარის კურსის დაცემამ გაამძაფრა სიტუაცია, რომელიც არც მანამდე იყო სახარბიელო", - განაცხადა ჯგერენაიამ.
იმისთვის, რომ უძრავი ქონების ბაზარი გამოცოცხლდეს, ექსპერტი 2 ფაქტორს ასახელებს - საკანონმდებლო ცვლილებებს და ე.წ. იაფსა და გრძელ ფულს.
"პირველი - ეს არის საკანონმდებლო ცვლილებები, რასაც მთავრობა აკეთებს და რომელიც ბინის გაქირავებაზე გადასახადის შემცირებას გულისხმობს, ანუ ადამიანმა უნდა იფიქროს, ბინაზე, როგორც ინვესტიციაზე და მეორე - მოსახლეობაში იაფი და ე.წ. გრძელი ფული უნდა გაჩნდეს. თუ მოსახლეობასა და ბანკებს გრძელი ფული და იაფი ფული არ ექნათ, წარმოუდგენელია, ლაპარაკი ბინათმშენებლობაზე. აქ ნაკლები პრობლემაა გაცვლითი კურსი, ყველაზე დიდი პრობლება გრძელი და იაფი ფულია", - განაცხადა ჯგერენაიამ.
ნათია რუხაძე
AMBEBI.GE
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
