''მეორედ რომ არ გავთხოვილიყავი, მამამთილმა სასიკვდილოდ გამიმეტა...''

ძალადობის მსხვერპლი ქალების ისტორიები ჩვენს ქვეყანაში აღარავის უკვირს, მაგრამ ამ მხრივ გამორჩეული შემთხვევები მაინც რეგიონებში ხდება. თინა 30 წლისაა და ამბობს, რომ ცხოვრების თავიდან დასაწყებად მთავარი მონდომებაა. თუმცა იყო პერიოდი, როდესაც სიკვდილს ებრძოდა...

- დასავლეთ საქართველოს ერთ-ერთ რაიონში დავიბადე. უზრუნველი ბავშვობა არ მქონია, მაგრამ არც ისე გვიჭირდა, რომ სახლიდან 18 წლის გავქცეულიყავი და ცოლად 13 წლით უფროს მამაკაცს გავყოლოდი. არადა, ჩემს მამამთილს რომ ჰკითხო, სწორედ გაჭირვებას გავექეცი. ნუგზარი სასტიკი ქმარი იყო, გათხოვებიდან სამ თვეში შინ თითქმის არ მოდიოდა. სადღაც საყვარელი ჰყავდა და იმ ქალთან ატარებდა დიდ დროს.

- კი, მაგრამ ცოლად ასეთ კაცს როგორ გაჰყევი?

- 4 წლის ვიყავი, მამა რომ დამეღუპა, დედა მე და ჩემს დას წვალებით გვზრდიდა. მამა ავარიაში დაიღუპა, როდესაც დედას მშობლებთან სტუმრად მიდიოდნენ. მამის მშობლებმა დედას დააბრალეს შვილის სიკვდილი. შენ რომ არ წაგეყვანა თქვენებთან, ჩვენი შვილი ცოცხალი იქნე-ბოდაო. რა სისულელეა, ბედისწერას წინ ვინ დაუდგებოდა. ყველამ უარყო და დედა ორ შვილს დამოუკიდებლად გვზრდიდა. ჩვენი უპატრონობით ჩემმა ყოფილმა ქმარმა ისარგებლა და მომიტაცა. სამი დღე რომ არავინ მომაკითხა, დავრჩი.

- თუ არ უყვარდი, საყვარელი ჰყავდა, ცოლად რატომ მოგიყვანა?

- მშობლები დაქორწინებას აძალებდნენ. ციხიდან ახალი გამოსული იყო და სწორედ იქიდან გაუცნია ტელეფონით თავისზე უფროსი ქალი, ვისთანაც დადიოდა. იმას ცოლად არ მოაყვანინებდნენ და შემთხვევით ამარჩია. სადღაც დამინახა ალბათ. მალე დავფეხმძიმდი, ამის შემდეგ ხომ საერთოდ ახლოს არ მეკარებოდა ნუგზარი. თითქოს მთავარი ბავშვი იყო. არც იმაზე ზრუნავდა, რომ შემყვარებოდა და საერთოდ არაფრად მაგდებდა. გოგონა შემეძინა, რაც დედამთილ-მამამთილს არ გაუხარდათ. არც იმაზე ჰქონდათ რეაქცია, რომ მათი შვილი ასე მექცეოდა. მოკლედ, იმ ოჯახში ნივთივით ვიყავი და დედაჩემი მოსვლასაც ვერ ბედავდა. სამ წელიწადში ჩემი ქმარი მეორედ დაიჭირეს და 16 წელი საყვარლის სასტიკად მკვლელობისთვის მიუსაჯეს. კიდევ რამდენიმე მუხლი ჰქონდა, მაგრამ ვერ დაუმტკიცეს. დღემდე არ ვიცი, რა მოხდა და ციხეში ორ წელიწადში გარდაიცვალა. მიზეზად ინფარქტი გვითხრეს.

იხილეთ გაგრძელება