ნოდარ ხადური - ავეჯი საჭიროა იმისთვის, რათა სახელმწიფო კანცელარიამ ნორმალურ ვითარებაში გააგრძელოს ფუნქციონირება

ავეჯი საჭიროა იმისთვის, რათა სახელმწიფო კანცელარიამ ფუნქციონირება ნორმალურ ვითარებაში გააგრძელოს, - ამის შესახებ ფინანსთა მინისტრმა ნოდარ ხადურმა "ნაციონალური მოძრაობის" მიერ მთავრობის ადმინისტრაციის მე-11 სართულისთვის შესყიდული რბილი ავეჯის შესახებ გამოქვეყნებული ინფორმაციის კომენტირებისას განაცხადა. როგორც ფინანსთა მინისტრმა აღნიშნა, ეს ავეჯი ადრე იყო ნაყიდი.

"მინდა გითხრათ, რომ ეს არის ადრე ნაყიდი. თავისთავად ცხადია, რომ ავეჯი საჭიროა იმისთვის, რათა ფუნქციონირება სახელმწიფო კანცელარიამ გააგრძელოს ნორმალურ ვითარებაში. თქვენ იცით, რომ იქ რემონტი მთავრდება და თავისთავად ცხადია, რომ ასეთი ხარჯებისგან არავინ არ არის დაზღვეული", - განაცხადა ხადურმა.

დღეს "ნაციონალურმა მოძრაობამ" მთავრობის ადმინისტრაციის მე-11 სართულისთვის შესყიდული რბილი ავეჯის შესახებ ფინანსური ინფორმაცია გამოაქვეყნა. როგორც პარტიის ერთ-ერთმა ლიდერმა ირმა ნადირაშვილმა დღეს გამართულ პრესკონფერენციაზე განაცხადა, შექმნილი ფინანსური კრიზისის პირობებში, პრემიერ-მინისტრისთვის იტალიაში დეკემბერში განხორციელებული შესყიდვების საფუძველზე 181 401 ლარის რბილი ავეჯის შეძენა განხორციელდა.

"ინტერპრესნიუსი"

სიახლე!

თუ დაინტერესებული ხართ მხოლოდ პოლიტიკური თემებით და არ გსურთ, მიიღოთ სხვა, თქვენთვის უინტერესო ინფორმაცია, მოიწონეთ გვერდი, რომელზეც მხოლოდ უმნიშვნელოვანესი პოლიტიკური სიახეები თავსდება.