28
მაისიდღის ზოგადი ასტროლოგიური პროგნოზი
ორი დღეა, სხვადასხვა საიტის საშუალებით ვრცელდება ინფორმაცია, რომ თითქოს "კომედიშოუდან" "GDS"-ზე წასული იუმორისტები უკან, "რუსთავი 2"-ზე ბრუნდებიან... ამ საკითხით ჩვენც დავინტერესდით და ერთ-ერთ მათგანს, "ბინა 18"-ის წამყვანს, ლევან გოგორელიანს (ფაქო) გავესაუბრეთ:
- გავრცელდა ხმა, თითქოს, ვინც "კომედიშოუდან" თავის დროზე "GDS"-ზე (იუმორისტები) წახვედით, შესაძლოა, უკან დაბრუნდეთ, რადგანაც ხელფასი გაგინახევრდათ. მართლია?
- მეც გავიგე ეს. სხვათა შორის, ვიღაცებმა სტატიაც დაწერეს, რომელიც ვნახე და ძალიან არ მომეწონა, რომ იქ ჩემი სახელი და გვარი ფიგურირებდა. არადა, მის ავტორებთან შეხებაც არ მქონია. ასეთ რაღაცებზე არ ვბრაზდები ხოლმე, მაგრამ ამჯერად გავბრაზდი...
ეს ყველაფერი ვიღაცის მოგონილი ზღაპარია და ეს ორი დღეა, ალბათ, ამ ზღაპრით იძინებდა... სხვათა შორის, ისიც თქვეს, თურმე ჩვენ იქ ვერაფერს ვაკეთებთ. არადა, ყოველ შაბათს, 9 საათზე, ჩვენს არხზე გადის ძალიან კარგი გადაცემა - "ბინა 18". უყურონ მას და იმ ზღაპრებით, რასაც ავრცელებენ, ნუღარ დაიძინებენ. ეყოფათ იმით საზრდოობა, ოდესღაც ხომ უნდა გაიზარდონ?!
- "ბინა 18" ხმაურიანი და სკანდალური გადაცემა კი გამოგივიდათ. ყოველ შემთხვევაში, ასე გააცნო თავი მაყურებელს...
- თავისი მაყურებელი სულ ჰყავს და არც არასდროს გვიფიქრია, ვინმესთვის მაყურებელი წაგვერთმია. მიზანმიმართული იყო ისიც, რომ გასართობი გადაცემებისთვის ყველაზე არაკომერციულ დროს, 9 საათზე დაწყებულიყო და ადამიანებს საინფორმაციო ზღაპრებისთვის კი არა, ჩვენთვის ეყურებინათ და გაამართლა.
- ანუ გავრცელებული აზრი, რომ არხი, სადაც ახლა მუშაობთ, უნდა დატოვოთ, არ არის სიმართლე, ხომ?
- ვიმეორებ, ეს აშკარად ზღაპარია!..- არც ის არის სწორი ინფორმაცია, რომ ხელფასები გაგინახევრდათ?
- მხოლოდ ხელფასი არ არის მთავარი. ამის გარდა, მეტი პასუხისმგებლობა მაქვს. ცხოვრებაში რაღაც ეტაპი დგება, როცა უნდა გაიზარდო, სხვანაირად არ გამოდის და ყველაფრის ფულით შეფასება არ შეიძლება. მე ამას ნაკლებ ყურადღებას ვაქცევ. ყველაფერს რომ თავი დავანებოთ, ბერა ჩემი ძმაკაცია და მის გვერდით დავდექი, როცა საშუალება მომეცა, ვდგავარ და ვიდგები სულ.
- დავუშვათ, დღის წესრიგში დადგა საკითხი, - საიდანაც წამოხვედით (ტელევიზიას ვგულისხმობ), ისევ იქ დაბრუნდეთ. რას იზამ?
- არა მარტო ჩემთვის, ბევრისთვის ეს უკანსვლას ნიშნავს და ამას გამოვრიცხავ. ამაზე არც მიფიქრია, მაგაზე ფიქრით დროს არ ვკარგავ. თან, არა მგონია, იქ რბილი ხალიჩები დამიგონ (იცინის) და ისე მიმიღონ, - ესეც სიმართლეა!- პირველები იყავით, ვინც იქიდან წამოხვედით... თუმცა ქართულ ტელევიზიებში არაერთი მაგალითი არსებობს, როცა ტელეწამყვანები, ჟურნალისტები უკან ბრუნდებიან ხოლმე.
- კი, ჩვენი შემთხვევა ყველასგან განსხვავებულია. იმ დროისთვის ჩვენი ნაბიჯი სასწაული "აფეთქება" იყო, რასაც ვინ აღარ გამოეხმაურა. ვინ აღარ გვდევნიდა და რას აღარ ამბობდა...- ბერა ივანიშვილს, ტელევიზიის პატრონს თუ მოსწონს თქვენი პროექტი?
- ამ გადაცემის იდეა თავად ბერას ეკუთვნის. თავიდანვე გვითხრა ამის შესახებ. იცოდა, რომ ასეთი ფრანგული გადაცემა არსებობდა, დაახლოებით მსგავსი სტილის და იდეის დონეზე გვითხრა, - ბიჭებო, ხომ არ გაგვეკეთებინაო... მერე მისი ეს ნათქვამი თემო მჟავიას გაახსენდა. მოვძებნეთ ის გადაცემა, დავუკვირდით, მოგვეწონა და - რატომაც არა, გავაკეთოთ-მეთქი და წარმატებული აღმოჩნდა.
- ბერას კორექტივები არ შეუტანია?
- კორექტივები სულ იყო, მთელი ტელევიზია ვერთვებოდით, რომ გადაცემა კარგი გამოსულიყო. იდეების გაცვლა მიდიოდა და ყველაფერი იმისთვის, რომ უკეთესი გამოსულიყო.
- თუ, ვთქვათ, ტელევიზიიდან წახვედი, იქაც არ დაბრუნდი, სადაც აქამდე მუშაობდი, რა რეზერვი გაქვს, იუმორის გარდა, რა სფეროში შეძლებ მუშაობას?
- ერთი, რაც ვიცი, ვერასდროს ვიქნები ადამიანი, რომელიც მხოლოდ ფულის შოვნაზეა ორიენტირებული. ეს არ შემიძლია, ამას კიდევ ცალკე ნიჭი სჭირდება, რაც მე არ მაქვს. ნებისმიერ შემთხვევაში, ვეცდები, ჩემი ნიჭით ამ ცხოვრებაში თავი როგორმე გავიტანო. კიდევ ძალიან მინდა, რომ მეტი რაღაცით გამოვადგე ქვეყანას. სიამოვნებით მივიღებდი მონაწილეობას რაღაც სერიოზულ საქმეში, ავიღებდი პასუხისმგებლობას.
- პოლიტიკაში წასვლა ხომ არ გინდა?
- არა, არა (იცინის). სასაცილო იქნება ჩემი პოლიტიკაში წასვლა. შეიძლება შევქმნა "ყველაზე იუმორისტული პარტია". ეს არის და ეს!
ლალი ფაცია
AMBEBI.GE
