გია სურამელაშვილს ოქროულობა დაუმალეს - "ჩემი იმიჯი ყველა პარამეტრით შეიზღუდა"

დღეს, "პალიტრა ტვ"-ს ეთერში, 22:30 წუთზე აზარტული და პოპულარული შოუს - "მიმიხვდის" მორიგი გადაცემა გავა, რომელშიც ტრადიციულად ბევრი ცნობილი ადამიანი მონაწილეობს, მაგრამ განსაკუთრებული აღნიშვნის ღირსია მომღერალ გია სურამელაშვილის შოუში ჩართულობა და აზარტულობა. პროექტში მონაწილეობით უზომოდ კმაყოფილია და სიამოვნებით იხსენებს იქ გატარებულ ერთ საათს:

- არ მოველოდი, თუ ასე გავერთობოდი. არადა, გადაცემის დაწყებამდე ვნერვიულობდი, შეუძლოდაც ვიყავი, ნაბახუსევზეც გახლდით, მაგრამ გადაცემის ავტორებს პატივს ვცემ და უარი ვერ ვუთხარი.

მხნეობისთვის ცოტა გადავკარი კიდეც... მეწყვილედ გიორგი წერეთელი მყავდა, რომლის იმედიც მქონდა და ამიტომაც ვთხოვე, ჩემთან ერთად მიეღო შოუში მონაწილეობა. მაგრამ ისეთი მობილიზება შევძელი, რომ თავად გავოცდი, - მართლა არ მეგონა, გიორგის თუ ვაჯობებდი. ის ცოტა დაიბნა, მოკლედ, მასზე უკეთ ვითამაშე. ყველაფერი შებრუნებით მოხდა... ძალიან ვინერვიულე. მაგარ მუღამში შევედი, არადა, აზარტული არ ვარ. ბევრიც ვიცინე, - მომეწონა მსახიობ როლანდ ოქროპირიძის თამაშიც, მაგარი სასაცილო იყო, ჭკუა გადამეკეტა. საერთოდ, კარგი წყვილები ვიყავით შერჩეულები და ძალიან კმაყოფილები წამოვედით. ''მიმიხვდი'' სახალისო შოუა.

- თავს რომ გაართმევდით, მაგის მჯერა, რადგანაც მსახიობი ხართ, თეატრალური განათლებაც გაქვთ... ამ შოუში მსახიობის გამოცდილებაა საჭირო.

- არტისტი კი ვარ, მაგრამ ეს არ არის საკმარისი, - არ უნდა დაიბნე. თან, თამაში აქამდე არ მქონდა ნანახი და პირაპირ ჩავერთე, მაგრამ კარგად რომ ჩავერთე, ეს შოუზეც აისახა. არ მეგონა, თუ ამდენი სახელის გამოცნობას შევძლებდი.

VIDEO: "მაგარი დონე მოდელიორია" - გამოიცანით, ვისი პიჯაკი აცვია გია სურამელაშვილს

- თამაშის ერთ-ერთი პირობა, მორიგ ტურში ის არის, რომ მონაწილეებს თეთრ ხალათებს აცმევენ. მათ ხელები გაკრული აქვთ, რომ ჟესტებით არ მიანიშნონ რაიმე. როგორ გრძნობდით თეთრ ხალათში თავს?

- გუშინ გადაცემის რეკლამა ვნახე და მართლა კომედიაა - მე, ხელებშეკრული, თეთრ ხალათში. ამ სანახაობას აშკარად რეიტინგი ექნება, - მე ხომ შოუების რეიტინგების მეფეს მეძახიან?

- გარდა იმისა, რომ არასტანდარტული იმიჯი გაქვთ, ასეთივე არასტანდარტულ შოუსაც დგამთ ხოლმე...

- ჰო (იცინის). ამ გადაცემაში მაინც საოცარი გიჟის აზარტი მქონდა. ისე, რატომ არის ასე მოფიქრებული, რომ ხალათებს აცმევენ და ხელებს უკრავენ, თუმცა მაგარი სასაცილოა... გიორგიც სასაცილო იყო, თავგადახოტრილი, თეთრ ხალათში. ამბობდა, - კლინიკიდან გამოქცეულს ვგავარო...

VIDEO: "ტყ..." - რის თქმას ცდილობს ხალათში "გაკოჭილი" გია სურამელაშვილი

- ცნობილია ასევე თქვენი ოქროს სამკაულები, რომელზეც შოუებში ხშირად გიწევთ საუბარი. ხალათით რომ დაგიმალეს ისინი. ეგ როგორ? ეს ერთადერთი შოუ აღმოჩნდა, სადაც თქვენი ოქროულობა დაიმალა...

- ჰო, ასეა. ხალათში, ხელებშეკრული ვიყავი და ჩემი ძვირფასეულობა არ ჩანდა. თან, თეთრი სათვალითაც ვიყავი, რაღაცები რომ წამეკითხა. მოკლედ, ყველა პარამეტრით, ჩემი იმიჯი შეიზღუდა. ჩემს სტილში არ ვიყავი, თუმცა ეს ყველაფერი ალბათ მოუხდა კიდეც გადაცემას.

ლალი ფაცია

AMBEBI.GE