ნემცოვის მკვლელობა უკრაინელი ოლიგარქების შეკვეთილია - სად მიყავს რუსულ მედიას პოლიტიკოსის მკვლელობის კვალი

"ბორის ნემცოვის მკვლელობა უკრაინელი ოლიგარქების შეკვეთილია" - აცხადებს გაზეთ "იზვესტიეს" წყარო.

გამოძიების ერთ-ერთი ვერსიით, ბორის ნემცოვი უკრაინელი ოლიგარქების ბრძანებით შეიძლებოდა მოეკლათ, იმის გამო, რომ ოპოზიციონერმა ვერ შეძლო რუსეთში დესტაბილიცაზიის გამოწვევა, - ამის შესახებ რუსული გაზეთი "იზვესტიე" წერს და მიუთითებს, რომ უკანასკნელი პერიოდის განმავლობაში ნემცოვი დიდ დროს ატარებდა უკრაინაში, სადაც ხშირად ხვდებოდა ადგილობრივ პოლიტიკოსებსა და ოლიგარქებს.

"მათ შეეძლოთ ნემცოვისთვის, რუსეთში დესტაბილიზაციის გამოსაწვევად საჭირო საშუალებები მიეყიდათ. გაღებული ფულით უკრაინელი ოლიგარქები მისგან რუსი საზოგადოების გახლეჩას ელოდნენ. თუმცა, არანაირი გახლეჩა არ მოხდა, პირიქით, საზოგადოების კონსოლიდაცია მოხდა. როდესაც მიხვდნენ, რომ შედეგს ვერ მოაღწევდნენ, ნემცოვის მოშორება იმ პოლიტიკოსებს შეეძლოთ, რომლებმაც დავალება ვერ შეასრულეს" - ამბობს გამოცემის წყარო.

"კომერსანტი" სამართალდამცავი ორგანოების წყაროზე დაყრდნობით წერს, რომ ბორის ნემცოვი არაპროფესიონალი ადამიანების მოკლულია, რაზეც ბალისტიკური ექსპერტიზის მონაცემებიც მეტყველებს.

გაირკვა, რომ ოპოზიციონერს ზურგიდან ესროლეს. ექვსი ნასროლი ტყვიიდან მას მხოლოდ 4 მოხვდა, რომელთაგან ერთი გული მოხვდა და სასიკვდილო აღმოჩნდა.

გამოცემა აღნიშნავს, რომ ბოროტმოქმედი 9 მილიმეტრის კალიბრის ტყვიებს იყენებდა. რომელთაგან ოთხი 1986 წელს იყო დამზადებული, ხოლო ორი 1992 წელს. სპეციალისტების აზრით, ეს იმაზე მიუთითებს, რომ დამნაშავეებს არ ჰქონდათ წვდომა საბრძოლო მასალაზე. სამართალდამცავთა თქმით, გასროლის შემდეგ, მკვლელმა იაღარი მდინარეში გადააგდო.

"მკვლელობა, როგორც პროვოკაცია, ქვეყანაში არსებული პოლიტიკური ვითარების დესტაბილიზაციისთვის. ნემცოვის ფიგურა შეიძლებოდა გამხდარიყო ერთგვარი საკრალური მსხვერპლი მათთვის, ვინც ვერანაირად ვერ მოახერხა საკუთარი პოლიტიკური მიზნების მიღწევა.

ყურადღებით მუშავდება ასევე ექსტრემისტ-ისლამისტებთან დაკავშირებული ვერსია. საქმე იმაშია, რომ გამოძიებას აქვს მონაცემების იმის შესახებ, რომ ნემცოვი იღებდა მუქარებს, "შარლი ებდოსთან" დაკავშირებით არსებული პოზიციის გამო. გარდა ამისა, მოწმდება ვერსია, რომელიც უკრაინაში მიმდინარე შიდა მოვლენებთან არის დაკავშირებული" - აცხადებს რუსეთის ფედერაციის საგამოძიებო კომიტეტის ოფიციალური წარმომადგენელი ვლადიმერ მარკინი.

ტეგი: ყველა სიახლე ბორის ნემცოვის მკვლელობის შესახებ

AMBEBI.GE