ჯონ კერი - ბორის ნემცოვი ძალიან დააკლდება რუსეთს და მთელ მსოფლიოს

ბორის ნემცოვის მკვლელობას აშშ-ის სახელმწიფო მდივანი ჯონ კერი განცხადებით ეხმაურება. სახელმწიფო მდივნის განცხადებაში აღნიშნულია, რომ ამერიკის შეერთებული შტატები რუსეთის ხელისუფლებას სწრაფი მოქმედებისაკენ მოუწოდებს, რათა დროულად ჩატარდეს გამოძიება და პასუხისმგებელი პირები მართლმსაჯულებას გადაეცეს.

"შემაძრწუნა და დამამწუხრა მოსკოვის ცენტრში, რუსეთის ყოფილი ვიცე-პრემიერის ბორის ნემცოვის სასტიკი მკვლელობის ამბავმა. ბორის ნემცოვმა თავისი ცხოვრება უფრო დემოკრატიულ, წარმატებულ და ღია რუსეთს მიუძღვნა. აგრეთვე, რუსეთსა და მის მეზობელ და პარტნიორ ქვეყნებთან, მათ შორის ამერიკის შეერთებულ შტატებთან მჭიდრო კავშირს. ის თავის ქვეყანას ემსახურა როგორც მთავრობის წევრი, პარლამენტარი, ნიჟნი ნოვგოროდის გუბერნატორი, პოლიტიკური ლიდერი და აქტივისტი. ის ყველა პოსტზე ცდილობდა რუსეთის რეფორმირებას და გახსნას; რუსი ხალხის გაძლიერებას, რომ მათ მეტი ძალაუფლება ჰქონოდათ ქვეყნის ცხოვრებაში. ის ძალიან დააკლდება რუსეთს და მთელ მსოფლიოს. ამერიკის შეერთებული შტატები რუსეთის ხელისუფლებას სწრაფი მოქმედებისაკენ მოუწოდებს, რათა დროულად ჩატარდეს გამოძიება და პასუხისმგებელი პირები მართლმსაჯულებას გადაეცეს. ჩვენი ფიქრებით რუს ხალხთან, ბატონი ნემცოვის ოჯახთან და მეგობრებთან ვართ", - აცხადებს კერი.

აშშ-ს სახელმწიფო მდივნის ჯონ კერის განცხადებას საქართველოში აშშ-ს საელჩო ავრცელებს.

"ინტერპრესნიუსი"

ტეგი: ყველა სიახლე ბორის ნემცოვის მკვლელობის შესახებ